今年情人節再度遇上疫情，選擇留喺屋企煮飯仔慶祝嘅話，最後當然要有情人節蛋糕為大餐畫上甜蜜句號。開飯仔幫大家精選唔同主題嘅浪漫蛋糕，唔少都加入女士們最愛嘅玫瑰或者士多啤梨元素啊。亦可以送甜點禮盒表達心意，一齊過個最Sweet嘅情人節！
 

打卡蛋糕

玫瑰士多啤梨生酮蛋糕  INFINITI C

夢幻玫瑰士多啤梨無麩質生酮蛋糕

呢間主打無麩質蛋糕嘅Cafe推出夢幻玫瑰士多啤梨無麩質生酮蛋糕，上面嘅藍色同粉紅色分別係以蝶豆花同粉紅火龍果嘅天然色素染色，而蛋糕裡面更有自家製慢煮士多啤梨醬，無額外添加糖，啖啖自然酸甜香氣！買原個蛋糕更送玫瑰護膚品唷。
 

日本淡雪巴斯克蛋糕  Soulgood Bakery

日本淡雪之花巴斯克芝士蛋糕，⽩朱古⼒⼠多啤梨巴斯克芝⼠蛋糕

由網店起家嘅手工蛋糕店主打近年大熱嘅巴斯克芝士蛋糕，今年兩款情⼈節限定都配搭士多啤梨。日本淡雪之花巴斯克芝士蛋糕唔單止上面會有淡雪士多啤梨。蛋糕裡面更有士多啤梨流心醬！另一款⽩朱古⼒⼠多啤梨巴斯克芝⼠蛋糕配搭經典，味道香甜。
 

栃木+福岡士多啤梨蛋糕  La Viña  

Monogram草莓蛋糕

中環呢間蛋糕麵包店就同試業中、走日本明治時期和洋折衷風格嘅摩登會館Maison Meiji聯乘推出情人節限定嘅Monogram草莓蛋糕，頂部鋪滿日本栃木同福岡縣嘅士多啤梨，經過嚴選每粒都飽滿紅潤、酸甜多汁！下面係海綿蛋糕、牛油忌廉同新鮮士多啤梨夾心啫喱。
 

立體玫瑰花瓣蛋糕  GREEN   

「玫瑰絮語」雲呢嗱玫瑰黑朱古力蛋糕，「桃香玫瑰」日本香桃海綿忌廉蛋糕

情人節當然唔少得花，尖沙咀呢間酒店餐廳更以可食用玫瑰花瓣層層交疊出玫瑰花立體蛋糕！再以金箔點綴，打卡絕對夠搶鏡呀。內層係海綿蛋糕、雲呢嗱忌廉同果肉，有雲呢嗱玫瑰黑朱古力、士多啤梨，同日本香桃三款口味選擇。
 

茶香士多啤梨蛋糕  TEA WG  

茶意永恆茶香草莓香草蛋糕，茶香馬卡龍

新加坡創立嘅百年茶葉品牌就以自家調配茶製作蛋糕。茶意永恆茶香草莓香草蛋糕以杏仁酥餅同海綿蛋糕為底，配搭士多啤梨醬同檸檬忌廉，外層係茶意永恆茶香慕斯，紅茶香加上水果嘅酸甜，唔會太甜又有層次。外脆內軟嘅茶香馬卡龍以好啱兩個人配茶當下午茶啊。
 

聯乘九龍麵粉廠  The Place    

榛子朱古力慕絲蛋糕，玫瑰士多啤梨雲呢嗱慕絲蛋糕

唔講都未必知道，原來九龍麵粉廠係香港現時唯一一間本地麵粉廠，而旺角呢間酒店餐廳就佢哋合作，以招牌藍水仙低筋麵粉炮製一系列精緻蛋糕，包括配搭64%單一產地馬達加斯加朱古力嘅榛子朱古力慕絲蛋糕。另外亦有情人節限定嘅玫瑰士多啤梨雲呢嗱慕絲蛋糕。
 

甜蜜雪糕蛋糕  Häagen-Dazs  

「熊粉愛侶」雪糕蛋糕，「紅玫魅影」雪糕蛋糕

呢間雪糕連鎖店今年推出兩款Be My Valentine雪糕蛋糕，「熊粉愛侶」就夠可愛，心形粉紅雲石鏡面蛋糕上有一對小熊裝飾，裡面係士多啤梨同黑朱古力杏仁口味嘅雙層雪糕。「紅玫魅影」好浪漫，立體紅玫瑰造型裡面係士多啤梨口味雪糕，甜蜜滿足。
 

紅寶石朱古力蛋糕  A-1 Bakery

GODIVA 瑰麗巧克力蛋糕

紅寶石朱古力係世界上第四種朱古力，帶天然粉紅色澤同淡淡果酸，用嚟做情人節蛋糕就啱喇。呢間連鎖麵包店同朱古力名店GODIVA聯乘，推出瑰麗巧克力蛋糕，頂層係紅寶石朱古力忌廉同朱古力忌廉，再撒上玫瑰花瓣點綴，下層係朱古力海綿蛋糕同雜莓醬，甜中帶酸、層次豐富。
 

精選甜品

清酒酒心朱古力  WAKO SAKE IZAKAYA & WAKO SAKE LABO • SUSHI  

日本酒酒心朱古力

如果另一半係「酒鬼」，送呢盒日本酒酒心朱古力就啱喇！呢間日本酒體驗店兼餐廳今年首度推出日本酒酒心朱古力，以大吟釀清酒、梅酒及燒酎配搭70%委內瑞拉朱古力，本地人手製作成三款口味嘅酒心朱古力。一咬即有流心效果，酒香喺口腔爆發，浪漫醉人。
 

意式甜蜜朱古力  Venchi

情人節巧克力禮盒，薄荷黑巧克力口味意式雪糕

情人節想要傳遞濃情蜜意，一齊食入口即溶嘅朱古力係個唔錯嘅選擇。呢個意大利百年品牌今年亦推出唔同包裝嘅情人節禮盒，都以紅色或粉紅為主加上花卉圖案，打開再見到心形朱古力真係心都融埋。想特別啲亦有全新嘅薄荷黑朱古力Gelato！

文: Cathy.H