尖沙咀呢間新開嘅泰國餐廳主打正宗泰北風味船麵同冬陰湯麵，湯底得兩款但配料就選擇多多，由唔同級別嘅牛肉去到霸氣十足嘅原隻波士頓龍蝦都有！背後原來多得一位成日去泰國嘅老闆，同一班嚟自泰國嘅廚師呀。
 

泰濃麵由幾位嚟自泰國嘅廚師主理，主打兩款湯底都落足心機，好似船麵湯底就用咗南薑、香茅、青檸、花椒、八角、桂葉、丁香、胡椒、芫荽等多種材料。當中仲有三至四種秘密香料從泰北運過嚟，再加豬紅同30斤豬骨熬八個鐘，保證風味正宗又夠濃郁。
 

飛驒和牛船麵（$128）

泰國船麵配料一開始以牛肉為主，知各位香港人特別嘴刁，牛肉有美國肥牛、頂級安格斯牛肉，同最貴嘅飛驒和牛！湯底飲落有相當濃郁嘅香料味道，口感偏厚，無加味精所以濃得嚟飲完唔會口渴，不過小心越飲越辣呀。加埋配料有新鮮金不換、炸蒜粒同炸豬皮，非常香口。
 

黑豚肉船麵（$68）

照顧埋唔食牛嘅為食友，配料有豬肉、雞肉同海鮮選擇，日本黑豚肉唔會太肥而軟嫩有肉味。另外配料仲有魚蛋、蔥粒、通菜，特別加埋秋葵令碗麵豐富啲又健康啲。
 

原隻波士頓龍蝦海鮮冬陰功湯麵（$168）

怕食唔慣正宗泰國船麵嘅話，仲有香港人比較習慣嘅冬陰功揀，湯底用上全隻基圍蝦增添香味。香茅香味突出，酸辣醒胃，而原來要做到酸而清新，秘訣係用原隻泰國青檸榨汁。而原隻波士頓龍蝦分量十足，切半擺面就已經遮住成個碗，打卡首選！不過留意返原隻波士頓龍蝦數量有限，冬陰湯麵同船麵每日各限十碗呀。
 

 

泰式鳳爪（$48）

青木瓜沙律（$48）

除咗麵之外仲有唔少小食，有炸芝士雲吞、炸豬皮等香口小食，想清新啲就有青木瓜沙律，酸中帶少少辣味。而泰式鳳爪就更辣，最啱鍾意「泰」惹味嘅朋友。
 

泰式香茅班蘭梳打（$28）

香茅加上泰國樽裝梳打，飲落估唔到又幾清新，班蘭味就唔係好明顯，勝在Sparkling口感特別爽特別消暑呢。
 

泰濃麵
尖沙咀樂道7號嘉樂大廈地下A舖

文、相、片：Cathy