對住啲大大碗，啲料又多到滿瀉嘅丼飯，幾時都咁難抵抗。嗱，機會嚟喇飛雲！沙田有間日本餐廳，最近推出限定優惠，兩款爆丼$100都唔使！
呢兩款可以堪稱為「火山系爆丼」，粒粒日本珍珠白米上面，舖滿魚生同三文魚子，滿瀉嗰隻，又真係幾似座小火山。兩款爆丼分別係三文魚親子同吞拿魚蓉三文魚子，後者更係以日本新鮮吞拿魚製作成魚蓉，加入人手拆松葉蟹肉，連埋鹹鮮又帶油香嘅三文魚子一啖吞落去，係滿足感啊！兩款都係賣$98，每日限量20客。
餐廳除咗有丼飯外，亦有鐵板燒同多款刺身供應。鹿兒島A4和牛牛肩胛都做緊優惠，$108/80g，仲平過喺超巿買塊返屋企自己煮啊。而且用鐵板燒燒過，油脂散發得更香口，同樣都係每日限量20客咋。
鐵板活鮑魚（$78/2隻）口感亦夠鮮爽
就連原隻活海膽（$78/隻）都有！即叫即開，自己直接喺海膽殼中，逐瓣逐瓣咁嗶出嚟食，硬係覺得會滋味啲。
嚟自日本九州長崎嘅原條池魚刺身（$88），每條約重400g，口感清爽，魚肉肥厚，不過呢個就要等多陣，7月2號先開始供應。
北海道食堂
地址：沙田橫壆街2-16號沙田中心商場3樓50及57號舖
文、相、片：Kar