每日手工製作四色芋圓 深水埗新開台式飲品店(有片)
2019-05-29

鍾意食芋圓嘅朋友注意喇,深水埗呢間新店主打手工芋圓,有一碗碗嘅芋圓甜品,亦有一杯杯飲得嘅迷你芋圓奶茶!仲有透明珍珠,同樣每日自家鮮製無加任何焦糖色素,食得更放心啦。
 


純•手作芋圓珍珠位於深水埗西九龍中心美食廣場,店如其名主打自家製芋圓同珍珠,每日新鮮製作、唔加防腐劑、無添加色素。而且粒粒真材實料,將蒸好嘅芋頭或者番薯壓成泥,再加入糖、木薯粉同澱粉,搓成均勻粉團再切成塊或細粒。
 


綜合芋圓仙草凍($20)

一碗有齊四色:芋圓、紫薯圓、黃色番薯圓、橙色番薯圓,特別製成方塊而唔係圓形係想增加咬口。果然芋圓咬落煙韌Q彈,而且食到食材天然原味,特別係芋頭同橙色番薯各自香味都幾突出。
 


番薯圓亦食得到少少番薯肉,證明真材實料。仙草凍用台灣直送仙草汁製作,口感滑溜但略嫌味道較淡,加埋花奶一齊食會比較好。
 


紫薯芋圓鮮奶($30)

同樣有齊芋圓、紫薯圓、黃色番薯圓、橙色番薯圓,不過今次係飲品用嘅迷你版!大細同一般飲品用嘅珍珠差唔多,一粒粒可以輕易用粗飲管食到,分量仲有差唔多三分之一杯。四色芋圓軟硬度啱啱好,有咬口得嚟帶淡淡甜香,同鮮奶都幾夾。
 


芋圓番薯圓鮮奶($30)

呢杯就少咗紫薯圓,只有芋圓同雙色番薯圓,因為番薯圓嘅甜度同香味都比較突出,呢杯亦比紫薯芋圓鮮奶稍甜。除咗鮮奶,亦可以選擇鮮奶茶或鮮奶綠茶底。
 

更多【新店直擊】:
1. 大坑搵食 新開日本割烹料理 鮮甜海膽龍蝦湯啫喱回味無窮
2. 韓國過江龍SSOJA TOAST & HOTDOG抵港!熱辣辣即製韓式多士及熱狗
3. 奶蓋千層蛋糕、豐富All Day Breakfast 人氣網店觀塘工廈開Cafe

 

珍珠益力多($20)

自家製透明珍珠唔太甜,因而非常百搭,加落任何飲品度都得,呢杯珍珠益力多就係例子之一。透明珍珠口感比芋圓硬,適合鍾意搵嘢咬、或者鍾意有嚼勁嘅朋友。
 


檸檬熱情果($25)

用台灣檸檬汁同熱情果汁調配而成,飲第一啖會覺得檸檬香比較突出,飲多幾啖熱情果嘅甜味就慢慢平衡返口腔裡面嘅酸味,整體酸香醒神,仲有熱情果籽增加咬口。
 




純•手作芋圓珍珠
地址:深水埗欽州街37號西九龍中心8樓美食廣場58號舖




文、相、片:Cathy

關鍵字
深水埗
芋圓
珍珠
甜品
台灣菜
西九龍中心
純•手作芋圓珍珠
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
6天前
【6月生日優惠】免費食酒店龍蝦自助餐 100樓望維景食嘢8折
2020-06-02
食豪啲啲 城中5間海鮮+肉扒父親節自助餐
2020-06-10
5月份好評餐廳十強
2020-06-05
至甜初夏 6月下午茶推介
2020-06-15