母女檔新開貴族茶室 主打正宗英式三層架下午茶+手工蛋糕 (有片)
2019-04-01

各位ladies,如果同姊妹、閏蜜去下午茶聚已經成為生活日常嘅話,咁呢間喺尖沙咀新開嘅茶室你哋一定要知啦,主打正宗英式下午茶,三層架嗰隻呢,仲要一入到去成間店嘅裝修都好鬼高貴好鬼靚,超多打卡位!

水晶吊燈、復古傢具、光猛純白主調……好似去咗轉英國,真係做咗貴族一樣。喺呢個咁好氣氛嘅環境下食個tea,都零舍優雅同有氣派。而呢間餐廳原來係由一對母女合作經營,媽媽Vicky係係做蛋糕高手,而女女Katrina則協助營運工作。

「我好細個都已經開始好鍾意做蛋糕,(開店)呢個都係我夢想嚟。」Vicky做咗18年蛋糕,今日終於夢想成真。佢最初只係喺圖書館借啲曲奇、烘焙嘅書返嚟自己跟住整,後嚟就不停跟唔同師傅去學做蛋糕。「每個師傅如果做同一樣嘢做30年,其實佢未必有太多經驗去話畀你聽點樣係好同唔好,但如果我學10個至30個,我就可以知道晒人哋當中有好多好同唔好嘅嘢,我再將佢集合咗,就有自己嘅方法。」所以,Vicky手下嘅每款蛋糕,都可以話係集各家之大成!

英式三層點心架下午茶係茶室嘅皇牌菜式,由最底層嘅鹹點食起,分別有蜜瓜帕馬火腿、迷你小牛漢堡同香煎蟹肉餅。

然後係第二層富有果香嘅甜點,包括草莓撻、意式奶凍同軟心朱古力撻,前兩者都比輕身,而朱古力撻就好甜咯,甜魔會鍾意。

而最頂層就有招牌伯爵茶戚風蛋糕、歌劇院蛋糕同拿破崙,拿破崙好夠酥脆啊,招牌伯爵茶戚風蛋糕以澳洲乳酪,茶味濃香之餘口感亦相當輕盈軟熟。

另外仲有蛋香味十足嘅焦糖燉蛋同帶有微溫而外脆內軟嘅英式鬆餅配玫瑰紅桑子,非常豐富,全部都係每日新鮮製造,記得要預留定多啲quota去食呢個tea set啊。

如果食完個tea覺得啲蛋糕太細件,得一兩啖仔唔夠喉,呢度其實都有全個蛋糕可以買走呀。焦糖海鹽伯爵茶戚風蛋糕,以手工製造,採用天然成分,冇任何添加劑。配上研製多年嘅海鹽焦糖醬做夾心、外層嘅焦糖醬則混合咗法國優質半甜鮮忌廉,令到整體味道鹹甜交替、口感軟滑,並滲有煙燻味同醇厚茶香。

送畀特別嘅人就要送特別嘅蛋糕,伯爵茶戚風蛋糕仲有特別版!一朵朵金黃色玫瑰唧花相當細緻,再加入白珍珠造型朱古力同金箔,感覺好elegant。

呢度對於茶葉亦同樣講究,選用傳統英國皇室御用品牌Fortnum & Mason。四款經典選擇包括辛香嘅伯爵茶、滲出天然果香嘅蜜桃茶、甘醇嘅錫蘭茶,同埋混合少量乾燥玫瑰嘅玫瑰包種茶。


Victorian Rose Tea Room
地址:尖沙咀山林道38號銀座38 17樓


文:Kar
相、片:Tom Li


關鍵字
尖沙咀
下午茶
甜品
蛋糕
打卡
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
1天前
悠閒時光 9月份下午茶推介
2020-09-02
【2020中秋】台式流心奶皇、電車限量版月餅 早鳥優惠及限量預購精選集合 (不斷更新)
2020-08-20
和牛及海膽主題菜單 尖沙咀西京燒専門店夏日新菜式
2020-09-02