中菜咁多派系，潮州菜都可以話係其中一個港人最常食嘅，最近呢間人氣潮州菜館進駐尖沙咀！餐廳主打正宗功夫潮州菜，由有名氣嘅中菜大師、餐廳行政總廚許美德師傅主理，除咗供應一系列招牌菜，仲有兩款全新菜式，咁啱就嚟父親節，帶埋家人去食就至啱。
蟹黃脆皮海參伴柚皮（新菜式）（$150）
每年嘅五丶六月都係膏蟹當造嘅季節，用每日新鮮生拆嘅蟹黃炮製蟹黃芡，搭配來自澳洲嘅豬婆參，每條成一斤咁重，海參用蝦米、火腿、雞腳及魚骨等食材先炆後炸，外脆內軟。最後伴以蟹籽柚皮，成道菜清新解膩。
木瓜盅燉燕窩 （新菜式）（$300）
平時嘅木瓜盅燉燕窩都係甜嘅，呢度就特別啲製成鹹食，又幾有驚喜。以夏威夷木瓜搭配滋補養顏嘅印尼燕窩，湯頭屬「頂湯」，用一斤肉料煲成一斤湯再加上金華火腿汁調味，令湯頭更加濃郁鮮甜。
滷水鵝肉拼盤（$118小/$168例牌）
講到潮州菜又點少得滷水，餐廳鵝隻選用來自汕頭市澄海區嘅獅頭鵝，肉質嫩滑；而餐廳嘅滷水膽有成五十多年歷史，濃淡恰到好處。滷水拼盤除咗鵝肉，仲有滷蛋、豆腐及墨魚。
手打魚丸津菜煲（$78小/$108例牌）
湯頭用上芹菜、大地魚、豬骨及雞骨熬製而成，鮮香味濃，入面嘅魚蛋及魚片係用黃門鱔自家手打而成，好重魚味，搭配天津大白菜及草菇，吸收晒湯頭精華！
糖醋伊麵（$98小/$128例牌）
先將潮州伊麵炸香，再用上湯煨煮至軟稔，再下鍋煎香至金黃色，真係少啲功夫都唔得～搭配埋糖及醋一齊食，酸甜香脆。
潮州蠔烙（$78小/$98例牌）
傳統潮州蠔烙鮮以新鮮蠔仔入饌，先以清水輕輕浸洗，以保留蠔仔嘅原味同質感。加入番薯粉及雞蛋後下鍋煎至兩面金黃酥脆就上碟，配埋魚露食更能突顯蠔肉鮮味。
潮州反沙芋條 （$78）
反沙芋要好食，由揀芋頭已經好重要，以輕身為首選！同埋淨係保留芋頭中間最粉糯嘅部分製作，外脆內粉。
地址: 尖沙咀彌敦道132號美麗華廣場一期食四方4樓405 號舖
文: Yanica
相: Tom Li