朝早食好啲! 港島區5大早餐精選
2020-10-30

正所謂一日之計在於晨,早餐作為每日嘅第一餐,當然要食得豐富滿足啲,先有能量開展一日嘅工作嘛。(加上見到軒公張敬軒最近嘅IG早餐照,就更加明白一個amazing嘅早餐係幾咁重要)就等開飯仔為大家介紹幾間精選嘅早餐店,講咗港島區先啦~

綿密熱粥    海匯粥品

 圖:kkkkkk.manivyc1120

好多人早餐都鍾意食碗熱粥,一嚟清淡啲二嚟暖下胃,鰂魚涌呢間粥店裝修新潮,坐得幾舒服,仲開好早添~ 7點就開門。每碗粥都係熱辣辣上枱,米味香濃,口感仲好綿密添。唔似得軒公嗰碗咁 #粥勁稀。一碗生滾及第粥都係30零蚊,足料,手打肉丸又彈牙,仲有多款懷舊粥舖嘅小食好似牛脷酥、白糖糕等。

滑牛通粉  茶咖里

 圖:Shinchan1993FoodShiba

好多就算唔係西營盤區嘅朋友,都會慕名而嚟呢間餐廳。格局似冰室又似大排檔,經典常餐、菠蘿包同全日早餐等都有得食。滑牛通粉係唔錯嘅選擇,滑牛真係滑嘅,肉質夠嫩,仲輕輕煎香過。湯底濃得嚟有奶香。想要西式少少嘅都有,牛油果醬炒蛋鬆餅,雖然就唔算好滑,但就幾有蛋香。

足料三文治  幸福單品咖啡

 圖:dandeliondayssherryyu01

三文治其實都幾蝦人整,簡簡單單搽下果jam、夾下片芝士、或者啲(燶邊)火腿都可以叫做三文治,但夾餡嘅配搭絕對可以令兩塊平平無奇嘅白方包,變到啖啖幸福感。好似呢間細細間嘅舖仔就做到,佢哋款款三文治都好足料,方包唔飛邊都好食係好難得。招牌「幸福三文治」,夾齊餐肉、炒蛋、青瓜、芝士、火腿等,豐富到以為自己去咗台灣啲早餐店度食咁。牛油果炒蛋芝士三文治亦係佢哋另一人氣招牌。

純素生酮 Vibes the place

 圖:MomoSpeckingKathyPun

如果有朝唔使返工/或者返晏,可以瞓得晏少少,時間鬆動少少嘅,建議可以嚟呢間咖啡店過返個good morning呀。開10點,木系治癒風格,一入到去已經有種relax嘅感覺,加上佢哋仲有個singing bowl喺枱面,好啱做meditation。食物方面,有個純素版嘅all day breakfast,仲加入生酮麵包添,清新健康,麵包鬆軟。嘆多杯粉紅色嘅鮮榨紅菜頭玫瑰latte,心情特別療癒。

澳洲風味    NINETYs  

 圖:natalir

可能好多咖啡迷都會去過呢間café到食下午茶或者晚餐,但佢哋嘅早餐一樣值得早啲起身去試。Brunch board可以揀4至6道菜,視乎你有幾大食啦。就連麵包都有好多款選擇,Sourdough同朱古力味嘅最多人鍾意,外脆內軟。主食無論係鹹蛋黃龍蝦定係牛油果滑蛋等都吸引。另外,早餐食碗yogurt都唔錯,以希臘乳酪做base,加埋各種水果或莓果,又靚樣又健康。


文:Kar

關鍵字
早餐
港島
西營盤
灣仔
張敬軒
三文治
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
1天前
悠長假期 復活節下午茶推介
2021-03-26
【2021生日優惠】超爽著數!免費任飲任食日式燒肉/火鍋(持續更新)
2天前
【只想專注做好牛腩】金融經紀轉行灣仔開濃湯牛腩麵店 招牌牛骨濃湯崩沙腩河
2021-04-01
【最平$298最貴$938】佐敦新開日式和牛燒肉放題 獨家引入鹿兒島小田和牛
4天前