最Sweet復活節朱古力復活蛋/造型蛋糕推介

就快就到復活節，除咗可以同朋友嘆復活節下午茶，同屋企人一齊食朱古力復活蛋或者特別造型蛋糕，過返個甜蜜復活節都係個唔錯嘅選擇啊。

朱古力復活蛋

呢個喺香港自設廠房嘅朱古力品牌今次復活節就推出好玩又好味嘅敲敲復活蛋，敲開裡面有椰子味兔仔、芒果熱情果味雞仔、紅蘿蔔造型朱古力同迷你復活蛋，送畀小朋友一流。另一款藝術塗鴉棉花糖朱古力蛋裡面就係色彩繽紛嘅迷你棉花糖，同樣有驚喜。

品牌今年特別同本地藝術家Zoie Lam合作推出全新復活彩蛋DIY限量套裝，畀各位大小朋友發揮創意，用食用朱古力顏色筆創作獨一無二嘅復活蛋！另外亦有朱古力小脆蛋禮盒，復活蛋罐裡面有三款唔同口味嘅小脆蛋，最啱開心Share。

嚟自比利時嘅著名朱古力品牌就推出期間限定嘅春季復活蛋形朱古力禮盒，禮盒佈滿珠片同花瓣裝飾，亮眼又有春天氣息，食完朱古力個盒更可以變成首飾盒唷。而裡面係五款迷你復活蛋造型嘅朱古力，有覆盆莓黑朱古力、餅乾慕絲牛奶朱古力等唔同味道。

三個唔同顏色嘅朱古力復活蛋分別用咗優質牛奶、香濃黑朱古力及柔軟白朱古力，以古董模具手工製成，而裡面更有可愛動物造型嘅朱古力零食！而另一款Happy Bunnies Milk Chocolate Easter Egg就係裡面有四隻手工製朱古力兔子嘅金箔朱古力復活蛋。

本地純素烘焙店今年推出三款唔同口味嘅半蛋殼造型蛋糕，當中以玫瑰忌廉裝飾嘅雲呢拿蛋糕Secret Garden Egg Cake，同芒果口味嘅Garden Egg Cake都不含乳製品。而Black Forest Egg Cake更係純素黑森林蛋糕，照顧有唔同飲食需要嘅朋友。

精緻可愛嘅蹦跳小兔，真身係荔枝紅桑子慕絲蛋糕，外面白色嘅係荔枝慕斯，配搭裡面微酸嘅紅桑子醬，味道清甜。而復活兔子派對即係復活蛋造型嘅菠蘿甘筍芝士蛋糕，比起坊間一般只用甘筍同芝士，餅店就特別加入甜中帶酸嘅菠蘿，增加味道層次。

黃色禮物盒造型嘅蛋糕唔單止搶眼，亦好有春日Feel呀。仔細睇上面更有復活蛋、復活兔、紅蘿蔔等裝飾，相當別緻。而蛋糕係用濃郁開心果醬搭配大溪地雲呢拿，再加入韓國士多啤梨，甜酸交織。1.5磅蛋糕之外，亦有綠色嘅迷你版蛋糕選擇。

文：Cathy.H