一講涮羊肉，好多人都以為係源自北京嘅美食，但其實涮羊肉起源於內蒙古，係一種喺戰地時發明嘅美食。想試下正宗涮羊肉？旺角就有間採用蒙古走地羊嘅羊肉火鍋店啦。
呢度標榜原汁原味食羊肉，唔提供任何蘸料比食客。主打湯底有麻辣湯同藥膳湯，所有湯底都以老雞、牛棒骨、枸杞、紅棗等36種配料每日用6個鐘新鮮熬製，所以唔使蘸料都夠晒濃味。
呢度嘅羊肉全用蒙古直送走地羊，喺蒙古有自家牧場放養6個月大幼羊，肉質嫩滑，加上自家牧場嘅草無汙染，所以幼羊肉唔膻唔腥。單係羊肉已經有近十幾款選擇。呢款塔拉上的快樂卷以幼羊腩、前腿同腰脊肉組成，口感軟嫩。
而呢款羔羊肋卷嘅味道同肉質就比較平庸，不過勝在抵食。
呢款黃金羊王價錢較貴，但肉味最濃郁並帶有油香，大大盤羊肉排成花形幾有睇頭。
除咗羊肉，仲有其他邊爐配料可以選擇。呢個快樂丸滑拼盤提供多款手打丸，其中墨魚丸大粒彈牙味道鮮。而小油條賣相雖然可愛，但唔吸湯之餘亦略嫌唔夠香脆。
特色小食方面，呢個蒙式烤串非常值得推介。烤串即叫即烤，灑上孜然粉烤製，再放喺鐵板上上菜。羊肉熱辣辣，肉汁非常豐富，入口仲好香肉味。
另外呢款蒙式烤羊排皮脆肉嫩，用手撕住一塊塊羊排嚟食又幾有風味。
餐廳裝修都好有心思，走清新風，以乾花佈置，加上所有火鍋爐邊都安裝咗抽氣系統，食完火鍋之後身上都唔會有氣味。呢度環境寬敞，有3層樓，座位舒適，適合聚餐。
地址：豉油街60-104號鴻都大廈部分地下至2樓
文、相、片：Kenna