旺角新開懷舊文具主題冰室 必食招牌蛋白芝士三文治(有片)
2020-05-11

最近旺角有間新開冰室,裝修到成間班房咁,仲有懷舊文具展覽!原來係一間懷舊文具店開嘅餐廳,糅合本土文化、Farm to Table,同冰室美食嘅概念,可以去一邊食嘢,一邊懷緬童年嘅集體回憶!
 



阿銀冰室位於旺角活化唐樓上海街618號當中。負責人Joel喺2016建立銀の文房具,之前曾經有一班米芝蓮廚師去參觀,講咗句「呢度同食物一樣,都可以留畀人美好嘅回憶」。加上有意接觸更多唔同嘅人,就搬到呢度,仲開埋主題冰室!
 


阿銀三文治(蛋白芝士)($29)

阿銀係呢度最高話事「貓」嘅名,即係冰室Logo上面嘅白貓呀。以白色貓毛開始聯想到白色嘅嘢食,所以呢份阿銀三文治就用咗淺色嘅芝士、蛋白同麵包。烘過嘅香脆麵包夾住鬆軟多汁嘅蛋白,加上芝士嘅鹹香,簡單而滿足。之後亦有打算推出阿銀蛋糕喔!
 


哈哈蝦多士($50)

餐廳亦想有多啲開心嘅元素,所以蝦多士亦特別改名為「哈哈蝦多士」。坊間冰室比較少見到呢款蝦多士,因此Joel亦落足心機,每日朝早去街市買新鮮蝦,令炸蝦肉食落零舍外脆內彈,蝦肉爽口。配埋酸酸甜甜嘅沙律醬就可以解油膩。
 


焗鮮茄吉列豬扒飯($65)

常見嘅焗豬扒飯都係將醬汁淋喺炸豬扒同飯上面再攞去焗,呢間冰室就特別將吉列豬扒另上,保留吉列豬扒皮脆肉嫩同Juicy嘅口感!配搭芝士蕃茄汁,非常醒胃。焗飯底粒粒分明,皆因都係每日朝早新鮮炒出嚟嘅。
 

更多【新店直擊】:
1. 熱辣辣即叫即製!日本橫濱現焗蘋果批專門店進駐銅鑼灣
2. 西灣河新開體育主題酒吧 多款佐酒美食 芝牛堡+慢煮醬燒牛肋骨
3. 過江龍蛋料理專門店進駐新界區!新增四款雞蛋主題意粉

 

香草意粉(價錢待定)

為咗令素食人士都有選擇,呢度都有素食菜式供應。例如呢碟新出嘅香草意粉,青醬調味得宜,再配搭唔同時令蔬菜。Joel認為「不時不食」,當造嘅先係對身體好,希望大家都食得更健康,蔬菜會按季節更換款式。
 


鮮紫蘇檸檬($36/凍,$32/熱)

紫蘇、薄荷都係餐廳同本地年輕農夫合作,喺自家農場種出嚟,長遠做到Farm to Table。紫蘇茶同樣每日新鮮煲出嚟,再加入檸檬汁令茶湯變得清澈通透。紫蘇富含花青素,而花青素可以幫助抗氧化、提升免疫力,女士嚟講可以抗衰老,而且孕婦都飲得㗎。
 



提倡本土文化,冰室對面嘅銀の文房具,同走廊嘅玻璃櫃上都展出唔同種類嘅懷舊文具,不定期仲會更換主題。
 






阿銀冰室
地址:旺角上海街618號3樓301A及302號舖




文:Cathy
相、片:Calvin Kwok

關鍵字
旺角
懷舊
文具
冰室
蝦多士
意粉
阿銀冰室
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
1天前
悠閒時光 9月份下午茶推介
2020-09-02
【2020中秋】台式流心奶皇、電車限量版月餅 早鳥優惠及限量預購精選集合 (不斷更新)
2020-08-20
飲得嘅抹茶富士山!日式茶室旺角重開 必試抹茶系列、焦糖布甸拿鐵
2020-09-10