香港有唔少特色日系cafe，今次幫大家整理咗幾間人氣日式咖啡店，咁weekend就可以約埋朋友去打卡，又或者自己一個靜靜地嘆杯咖啡，感受濃濃日系氣息～
榻榻米日系Cafe 汐
圖：裝潢用木系設計，仲有吧枱同榻榻米位，坐落去好有日本家庭餐廳嘅感覺，舒服又chill～最出名就係佢哋嘅夕陽富士山系列，用蝶豆花米飯砌成富士山造型，再配上帶子、八爪魚、蟹籽、蟹柳同沙律，面頭加埋蛋白同溏心蛋黃，好啱打卡。主食方面蒜香辣椒蜆肉意粉配軟殼蟹就相當惹味，蟹炸得香脆，意粉乾身帶微辣；蒲燒鰻魚丼飯肉質軟嫩肥美，配埋燒玉子、木魚絲同昆布，滋味滿分！甜品則有檸檬蛋糕、Tiramisu等，質感輕盈唔會膩。飲品選擇都幾有特色，好似靜岡抹茶豆乳、福岡士多啤梨波子汽水鮮奶，夠晒清新。
昭和風喫茶店 Find The Way
圖：主打昭和風喫茶氛圍，木系裝潢加上柔和日文歌聲，坐落去已經好有置身日本舊式茶館嘅感覺。座位以吧枱為主，可以近距離睇住店主即場烹調甜品同飲品，好治癒。必試嘅厚鬆餅真係水準超高，蛋香濃郁帶少少檸檬清香，口感軟綿，而且鬆厚得嚟唔死實，熱辣辣上枱再淋楓糖漿，幸福感爆棚，而且外形真係同emoji鬆餅一模一樣㗎！布甸同樣出色，奶香濃滑，甜度啱啱好。飲品方面藍橙汽水同蜜瓜汽水係經典喫茶店款式，清爽解渴，加埋自家製雪糕更添風味。整體價錢合理，環境舒服又有溫度，無論係慢慢食甜品抑或同朋友傾偈放鬆都好合適。
復古風木系咖啡店 楓子珈琲
圖：環境走懷舊復古風，碗碟同擺設都充滿日系小店氣息，打卡一流！主食方面必試虎蝦喇沙意粉，醬汁濃郁鹹香帶少少辣味，三隻大虎蝦爽口彈牙，味道意外地同意粉好夾；櫻花蝦豆乳擔擔讚岐湯烏冬鋪滿櫻花蝦，豆乳同擔擔醬融合得香濃惹味，烏冬滑溜彈牙，再加埋肉碎同豆腐，層次豐富。甜品推介焦糖布蕾巴斯克芝士蛋糕，外層微焦香脆，內裡軟滑creamy，芝士味濃郁，甜而不膩；另外開心果忌廉戚風蛋糕味道清淡少少，口感輕盈，唔會太甜。
寵物友善人氣cafe 十常八九
圖：喺深水埗時已經好有人氣嘅日系咖啡店，最近搬咗去旺角，店舖面積大咗好多，坐得舒服之餘餐點選擇亦更加豐富～必試烏魚子鯷魚意大利粉，將烏魚子切片再磨成微粒，鹹香獨特，意粉煙韌掛汁，擺盤都夠用心。甜品方面北海道奶油泡芙外脆內滑，奶香濃郁唔會死甜；芒果四季柑芝士蛋糕清爽creamy，加入柑橘mousse多一份果香，好啱夏天食。新店選用木系裝修、自然採光夠，加埋街景好啱打卡。雖然熱門時段要等位，出餐時間會耐啲，但整體性價比高，想嘆吓日式咖啡店氣氛絕對值得一試。
開心果軟芝士蛋糕 伊間珈琲
圖：同樣走日式復古風，以蛋糕、曲奇同吐司為主，其中必試分成兩層嘅開心果軟芝士蛋糕，上層係開心果Cream Cheese，輕盈順滑；下層就係口感厚實嘅開心果Terrine，堅果味香濃，再加上滿滿開心果碎，味道同口感都好滿足。小山園焙茶巴斯克芝士蛋糕同樣受歡迎，表面微微焦香，中間保留少少軟心，芝士香同焙茶香平衡得啱啱好，唔會互相搶味。飲品方面可以試吓抹茶椰子飲，清爽又解膩，配甜品一流～
文: Yanica
