教主朱古力+台灣手信 2022新春送禮懶人包
2022-01-25

拜年點可以兩手空空呢?送禮除咗體面,更可以令家人及朋友感受到新一年嘅祝福。不過有時要揀禮物都幾頭痛㗎,開飯仔今年繼續為大家搜羅多款賀年禮盒,無論係想送畀長輩、朋友同小朋友都總有一款啱心水。

致:同伴

望月 曲奇禮盒+蝴蝶酥禮盒

呢個本地品牌唔止出月餅,重有推出多款曲奇、脆脆同蝴蝶酥等特色產品。今年曲奇系列包括經典一口曲奇禮盒及日本茶一口曲奇禮盒,前者有伯爵茶、雙重朱古力同杏仁3款口味,至於後者則有抹茶、焙茶同玄米茶3款日系茶味曲奇,茶香濃郁~今年仲有新出嘅芝士椒麻曲奇,用上4款芝士加上4款辣椒,芝香濃郁同時有麻辣後勁!
另外當然唔少得蝴蝶酥禮盒,選用紐西蘭牛油配上焦糖,獨特之處在於烘焙得比坊間常見嘅金黃色深少少,令蝴蝶酥充分焦糖化。新出嘅焦糖肉桂蝴蝶酥更增添肉桂嘅獨特香氣,送畀為食嘅朋友們就最啱~



Valérie Valerie 酥Yummy雜錦禮盒

送想得體啲,呢間餅店咩都有嘅酥Yummy雜錦禮盒絕對係好選擇~一盒包晒招牌蝴蝶酥、菠蘿金酥同五款曲奇,其中菠蘿金酥係全新產品,味道、口感同外型同台灣鳳梨酥都有唔同,牛油嘅香氣配上清新嘅土鳳梨內餡,甜而不膩,愈食愈開胃。而且包裝都好吸睛,寓意團圓嘅燈籠紋理燙上金色嘅蝴蝶如意結,紅色禮盒配上手挽,就好似一個福袋咁,有誠意又豪華。


致:甜品控女生

當文歷餅店   幸運紅甲蟲新年禮盒

呢間餅店啲包裝年年都好靚,今年就選擇咗代表住幸運同財富嘅紅甲蟲。打開紅甲蟲嘅翅膀,上層有2款色彩鮮艷嘅手工軟心朱古力,優雅寶石綠色嘅係開心果軟心黑朱古力,金黃色嘅則係柚子軟心白朱古力;而下層則放有杏汁年糕,味道香甜,帶有淡淡杏仁香,收到嘅朋友仔一定感受到你畀佢嘅幸福呢。


Paul Lafayet 繽紛虎年甜點禮盒

呢間糕店品牌今年特意搵嚟法籍插畫家Emilie Sarnel合作,繪畫兩隻可愛老虎喺色彩繽紛嘅叢林中快樂咁跳舞,同時享受住品牌嘅甜點,畫面充滿法式幽默。包裝更以夢幻嘅粉紅色為主調,好有少女心~雙虎迎春禮盒包含將馬卡龍同曲奇二合為一嘅「Cookiron」、茶葉、蜜糖以及虎年卡通碟一隻;另外仲有單買嘅馬卡龍禮盒及曲奇禮盒添!


致:神徒

GODIVA 新年限量朱古力禮盒

神徒們神徒們準備好未!呢間朱古力專門店今年真係不得了,搵嚟Mirror嘅成員Anson lo為大家送上甜蜜驚喜,2022新年限量朱古力禮盒以紅金色為主調,高貴得嚟又有新年氣氛。特別係今年仲有幾款全新限量版口味,包括酸甜清新嘅覆盆子香橙白朱古力、口感香脆嘅胡桃牛奶朱古力同香氣四溢嘅朱古力醬85%黑朱古力!Come on!準備接受教主嘅祝福啦~



致:旅伴

台灣有禮 九九金燒、富貴堅果塔、芋香流芯酥、麻荖

呢個台灣精品品牌同台灣多個知名商戶有緊密合作關係,就算去唔到旅行都買到台灣本地嘅新年禮盒!特別推介台中久久津嘅九九金燒,內餡為濃郁芝士加Q彈麻糬,味道鹹鹹甜甜,最驚喜係有拉絲啊;拉菲樂嘅富貴堅果塔,單純以天然麥芽糖包裹住夏威夷豆同蔓越莓果乾,口感紮實唔黏牙,天然奶香十足。仲有芋頭控不可錯過嘅躉泰芋香流芯酥同埋台灣傳統賀年食品麻荖等~送畀以前成日一齊快閃台灣嘅旅友,隔空感受住旅行嘅味道先。

 九九金燒

 富貴堅果塔

 躉泰芋香流芯酥

 麻荖


致:所有女生

Lady M 金虎新春糖果禮盒

今年嘅糖果禮盒一樣由美國總公司設計,一打開個盒就有驚喜,紅、藍、黃色圖案利是封散開好似扇子咁,利是封以燙金印上老虎身影同吉祥圖形,好有特色。而盒兩邊放有一共6款由美國總公司引入嘅特色糖果,全部都係首次亮相嘅口味。分別係雲呢拿忌廉餅乾脆條、榛子朱古力忌廉餅乾脆條,海鹽焦糖牛奶脆米朱古力、芝麻脆米朱古力、士多啤梨啫喱軟糖同甜杏啫喱軟糖。

 


致:一家大細

Schoggi Meier 福虎迎春新年禮盒

香港自設廠房嘅朱古力品牌,採用瑞士原材料Couverture 100%可可脂朱古力以及其他來自世界各地嘅優質原材料,每日喺香港新鮮製造。虎年限定嘅「福虎迎春新年禮盒」包含橙色嘅虎紋杏仁朱古力及蝴蝶酥,仲有可愛嘅招財貓同精靈小老虎化身成鬆化嘅糖霜曲奇,大人同小朋友都一樣咁鍾意~


致:Line Fans

奇華 LINE FRIENDS WITH KEE WAH BAKERY 糖果禮盒

送畀熊大粉絲嘅就最好,唔使煩,呢間餅店同Line Friends合作推出嘅糖果禮盒一定啱,佢哋淨係見到個盒都足夠開心一輪了。禮盒內有甘香芝麻同花生嘅「BROWN 芝麻花生軟糖」、脆香清甜嘅「CONY 南瓜籽脆糖」、甘甜養生嘅CHOCO 南棗合桃糕」以及傳統方法手製而成嘅「SALLY 花生脆糖」,幾個盒仔重可以收起重用!




文: Yanica
相:Kar、Cathy H.
編:Kar



關鍵字
2022
新年
賀年禮盒
朱古力
曲奇
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2024生日優惠】持續更新!4月壽星嘆巴日Fusion菜享「年齡折扣」
2024-04-05
香港必食燒鵝餐廳推介 荔枝柴香煙燻燒鵝、香氣十足陳皮燒鵝
2024-04-04
【隨時更新】最後倒數!2024即將結業人氣/老字號餐廳
2天前
【隨時更新】零食速報 每周新款零食、酒品點評
2024-03-26
關注組推介沙嗲牛 世一回歸、大圍多選擇
2024-03-27