搶先直擊!東京沾麵冠軍麵屋一燈今起試業
2018-01-12

日本食評網屢獲高度評價嘅東京拉麵店麵屋一燈,今日喺尖沙咀開始試業,開飯仔率先為各位直擊香港首間麵屋一燈嘅最新情況。

麵屋一燈喺多個日本必食拉麵排行榜中位列前矛,食評網站上更奪得4.09分(5分為滿分),一蘭平均都只得3.1分左右。上年麵屋一登就海外進駐台北、曼谷,今次終於輪到香港啦!麵屋一登尚未開門,門口已見人龍。


新店超過2,000呎,有大大個開放式廚房,設有60個座位,空間亦相當寬敞,暫時係海外最大間分店。


裝潢好簡單,水泥牆、木系傢俬、黑色小吊燈、綠色盆景及採光度高嘅落地玻璃,感覺好cozy。


水泥牆上有「一燈照隅,萬燈照國」8個大字,好有氣勢。


即刻睇下有乜食!店子暫時有1款招牌沾麵、兩款拉麵以及1款期間限定拉麵,一共有4款。每款又會有普通size、特大size以及加溏心蛋3個版本。

廚師們製作細心,除咗煮麵、煮湯等各個崗位要配合好時間,佢哋會費盡心機去維持湯底嘅溫熱時間,例如用熱水浸住準備盛載拉麵嘅拉麵碗、總廚亦不時試味,確保每碗沾麵、拉麵質素。


店子最出名、最人氣嘅就係味玉濃厚魚介沾麵($158),喺雞湯之中加入魚乾、干貝等5款配料一同熬製咗72小時而成。


上枱時有1碗沾麵、1碗沾麵汁及1小碟辣粉。沾麵碗上有粗麵條、溏心蛋、兩款叉燒及紫菜;沾麵汁入面仲有蔥、筍及手製雞肉丸子。建議夾一小撮沾麵,放入沾麵汁中約2-3秒就夾起食得。


麵條雖然質地好似烏冬咁粗身,但都幾掛湯,而且頗為彈牙,有嚼勁得嚟唔會好黐牙。


兩片叉燒均以slow-cook方式處理,肉質依然嫩滑。雞肉叉燒好嫩滑,帶有少許黑胡椒香氣;豚肉叉燒口感較為清爽,不太油膩,仲有啲鹹香添!


半熟溏心蛋令麵條更滑溜,有少少煙燻香,味道不俗;手製雞肉丸子入面有啲雞軟骨,食落脆身。


客人仲可以將辣粉加入沾麵汁中,更加香辣惹味。


香港店同樣有「湯割」(スープ割り),食完沾麵後可倒入魚湯來飲,忠於原著!


季節限定嘅秘製醬油拉麵,同樣有兩片叉燒、紫菜、蔥及筍。喺雞湯中加入昆布、魚介及秘製醬汁,令味道富有層次,飲完仲有少少餘韻添!


拉麵比沾麵幼身得多,既滑溜,又掛湯,拉麵迷值得一試。價錢為$128/碗。


枱上只有檸檬水而冇調味料,但係喺日本嘅麵屋一燈店內,枱上會有好幾樽不同調味料,仲會有個裝住用嚟畀女生紥頭髮嘅橡筋杯,但香港店似乎無呢項貼心服務喇!


日本食一碗味玉濃厚魚介沾麵只係930円,嚟到香港變成$158!果然係物離鄉貴!之不過相信大家都會心甘情願去食架喇...試業期間,每日供應200碗拉麵,售完即止。而且暫時只限walk-in,不設訂座。


麵屋一燈
地址:尖沙咀廣東道3-27號海港城海運大廈3樓LCX 32號舖


文:Joy

關鍵字
拉麵
日本過江龍
沾麵
麵屋一燈
尖沙咀
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2021-05-03
【2021生日優惠】持續更新!5月食日本直送海鮮送西班牙紅/白酒
4天前
帶媽媽味遊異國!母親節Brunch六選
2021-04-20
期間限定$1抹茶菠蘿包、$3竹炭菠蘿油 佐敦新開 2500 呎新派點心小廚
2021-04-30
荃灣新開 人氣名古屋班戟分店 首推沖繩紫薯梳乎厘班戟+班戟漢堡
2021-04-15