生日梗係同伴侶、朋友大吃大喝,嘆各種菜餚,過個盡興嘅生日月飯聚啦~但記得用埋生日優惠呀,開飯仔搜羅全港嘅生日優惠,今次整合咗嘅生日優惠,部分優惠重橫跨幾個月份,甚至可以重複使用㗎。
Lady Nara 皇家泰茶火焰雪山半價
生日優惠日期:即日起直至餐廳另行通知,欲了解詳情可聯絡餐廳。
IG-able嘅生日甜品,火焰雪山係其中一個經典推介~呢間嚟自曼谷嘅泰國菜餐廳,就有皇家泰茶火焰雪山喇,雪山蛋白霜內藏泰茶雪糕同海綿蛋糕夾層,輕炙後散發焦糖香氣,夠晒甜絲絲呀。凡晚市4人或以上訂座慶生,並前2天預訂火焰雪山,即可半價享用啊。
西樹泡芙 送生日泡芙
生日優惠日期:即日起直至餐廳另行通知,欲了解詳情可聯絡餐廳。
生日一點甜~鍾意有儀式感但又唔想食成個蛋糕咁多?呢間泡芙專店可能啱你,只要壽星於生日正日向店員出示有效嘅生日證明,兼做齊指定動作,即送特濃吉士泡芙一個(限領取一次,數量有限,送完即止)。佢嘅手工泡芙每日新鮮焗製,外脆內鬆軟,生日用嚟慶祝都唔錯㗎。
圖:品牌(FB)
中庭 壽星免費+送壽桃包
生日優惠日期:即日起至2024年12月30日(9月17至18日、10月1日、12月21日、24至26日除外)
如果壽星係中菜控,不妨考慮一間坐落於會展嘅粵菜館。呢度嘅菜式糅合傳統同現代風味,例如滑嫩嘅客家蔥油平原太子雞、鹽焗鮑魚、釀蟹蓋等。凡4位顧客或以上嚟享用晚餐滿指定金額,同枱一位當月壽星可享免費優惠,另每位顧客可獲壽桃包一個(生日之星須出示身份證明文件作實)。
Maison Beirut 送是日精選甜品一客
生日優惠日期:即日起至2024年8月31日
鍾意異國菜嘅朋友仔,呢間藍色主調嘅黎巴嫩菜餐廳由黎巴嫩人夥拍40年經驗埃及總廚 ,供應多款冷盤前菜、特色烤肉,如唔同口味嘅鷹嘴豆泥、黎巴嫩烤魚、香滑雞乳酪拌飯都別具風味。餐廳採用半開放式設計,環境幾chill,好啱慶祝生日。若壽星惠顧晚餐單點菜式,即送是日精選甜品一客。
WHISK 送汽酒乙杯+生日蛋糕乙個
生日優惠日期:即日起直至餐廳另行通知,欲了解詳情可聯絡餐廳。
生日飯想浪漫啲,西式Fine Dining一定幫到你。呢間酒店餐廳以鮮甜海膽、松葉蟹、鮑魚、鴨胸等高質食材入饌,擺盤夠精緻,而一大排燈飾好似點點星光咁,氣氛一絕啊~本月壽星與朋友同行嚟享用精緻晚餐,更可獲贈汽酒乙杯同生日蛋糕乙個。
Café 100 by The Ritz-Carlton 生日套票+甜品
生日優惠日期:即日起至2024年12月31日
「天際」慶生浪漫之餘又有靚景打卡,無論同閨密或伴侶前往都好合適。呢間餐廳更由The Ritz-Carlton經營,出品有保證啊~佢嘅生日套票包括天際100成人標準門票兩張、半磅朱古力蛋糕或香橙蛋糕1個,仲有2杯咖啡或茶同生日卡一張連照相服務, chill得嚟幾有儀式感。留意套票需提前2日購買啊。
圖:天際100(官網)
杉玉 免費生日驚喜杯壽司+即影即有相
生日優惠日期:即日起直至餐廳另行通知,欲了解詳情可聯絡餐廳。
呢間連鎖迴轉壽司店開設嘅副線,主打定價合理嘅居酒屋料理,壽司、炸物、刺身等都俱全。而家壽星堂食消費滿HK$70加做齊指定動作,就會免費送你「生日驚喜杯壽司」一份,同埋即影即有相留念。優惠只限生日當天便用,只要向店員出示身份證核對就可以喇。
熊本牛鍋 免費和牛火鍋套餐+送竹籠蒸海鮮
生日優惠日期:即日起直至餐廳另行通知,欲了解詳情可聯絡餐廳。
做齊指定動作即送竹籠蒸海鮮!元朗同尖沙咀都有分店嘅日式火鍋放題餐廳,主打高質澳洲M8-M9和牛、美國頂級牛白肉、牛小排、牛肩胛同加拿大保濕豬等肉類,啱晒肉食控慶祝生日。凡4人或以上同行,當月壽星即可免費享用皇牌或澳洲M4-M5和牛套餐,再送竹籠蒸海鮮(海鮮數量有限,送完即止),讓你享用鮮上加鮮嘅生日飯。
圖:chuchu_hkfoodie、cw.foodie.hk
半島酒店大堂茶座 送生日蛋糕1個、1位免費
生日優惠日期:即日起至2024年9月30日
喺華麗嘅歐陸風裝潢下,享用五星級酒店性價比高嘅生日套餐,有齊前菜、主菜同甜品,浪漫滿分呀~而家每位壽星喺生日當日惠顧大堂茶座晚餐,2人同行即可獲贈生日蛋糕1個;而4位或以上,則1位免費再送贈生日蛋糕1個。留意返要72小時前訂座;如需取消訂座,則提前最少24小時通知,到場時需出示身份證明文作確認。
圖:foooodrabbit、餐廳官網
緣聚 壽星半價或免費
生日優惠日期:即日起至2024年1月14日(已完結)
日本菜係生日熱門選擇之一,而呢間日式放題餐廳嘅箱座同獨立房間都以榻榻米為題,撐枱腳或包房聚餐都更加有feel。放題多達118品美食,如吞拿魚刺身、赤蝦壽司、香蒜牛柳粒、抹茶紅豆忌廉窩夫等鹹甜點,回本冇難度,重可以打卡影靚相𠻹。而家用OpenRice優惠券,4位惠顧即享1位壽星半費,8位惠顧則1位壽星免費,再送蛋糕。
信 免費嘆石燒刺身+特色甜品
生日優惠日期:2024年2月1日至2024年2月29日(已完結)
呢間主打高質fusion菜嘅席前餐廳,會融合西、日等口味創作新穎嘅料理,例如以北海道海膽、以新鮮魚湯煮成嘅醬汁等炮製花膠海膽卡邦尼意粉;粉紅色壽司飯等,好啱慶祝生日。而今個月壽星訂座晚餐時註明「生日訂座」,到場時出示身份證明文件正本即送石燒刺身一客、送特色甜品同埋精緻佈置。留意此優惠唔可以同其他優惠或折扣同時使用啊~
圖:為食女司機、餐廳(FB)
Dodam Chicken 壽星八折生日優惠
生日優惠日期:即日起至2024年2月29日(已完結)
主打韓式炸雞同烤雞嘅專門店,炸雞用廿多款香料醃製,香口又入味;而後烤雞皮脆內嫩,皆因用高溫迫出多餘油分。不過生日梗係要食得豐富啲啦~韓式炒年糕、泡菜餅、鮑魚人參雞湯都係唔錯嘅選擇。今個月壽星憑OpenRice優惠券預早訂座,並出示身份証明文件以核對,堂食單點菜式都有8折優惠。
圖:餐廳(FB)
Mr. Steak Buffet à la minute 壽星半價起/全單65折起
生日優惠日期:即日起至2024年4月1日(已完結)
如果想食自助餐慶祝生日,呢間餐廳可以話係人氣之選,皆因以海量長腳蟹同和牛料理作招徠,性價比高,又可以即席order附生日字句嘅免費甜品,夠晒儀式感,現時2至10人嚟慶祝仲有唔同生日優惠𠻹:
- 每2-3位惠顧,當中1位生日之星可享半價優惠;同行者亦可享價目表上折扣優惠。
- 每4位惠顧,當中1位生日之星可享免費優惠;同行者亦可享價目表上折扣優惠,再送迷你焗雪山一個。
- 每5-9位惠顧,當中1位生日之星可享迷你焗雪山一個,並可享全單7折優惠。
- 每10位或以上惠顧,當中1位生日之星可享迷你焗雪山一個,並可享全單65折優惠。
Uma Nota 4月壽星全單即獲年齡折扣優惠
生日優惠日期:即日起至2024年4月30日(已完結)
踏入4月正正係呢間巴日fusion餐廳四周年,所以特別推出生日優惠!凡4月壽星出示香港身分證明文件,即可全單獲得相關年齡折扣(例如壽星40歲全單6折、壽星65歲全單獲得35折,每枱只限享用1個折扣),優惠喺晚巿同週末早午餐時段適用㗎。現時店內佈置成夢幻櫻花海,讓大家浪漫咁慶祝生日,同時嘆炭烤牛肉、巨型甜品拼盤等美食。
Yamm 送汽酒乙杯+生日蛋糕乙個
生日優惠日期:即日起至2024年4月30日(已完結)
同鍾意食自助餐嘅朋友慶祝生日,梗係揀返自助餐啦!呢間酒店餐廳就提供新鮮空運海鮮如波士頓龍蝦、壽司刺身、巴馬火腿、各國芝士等多款美食,本月壽星於生日一週內同朋友同行享用自助晚餐,即可獲贈汽酒乙杯同生日蛋糕乙個。
La Famille 免費嘆戚風小蛋糕
生日優惠日期:2024年7月8至2024年7月10日(已完結)
La Famille嘅戚風蛋糕唔太甜,口感鬆軟,一直受甜品控歡迎,佢哋每個月重會挑選一日壽星送蛋糕俾佢哋,而今個月嘅幸運兒係7月18日生日嘅你~只要喺7月8日中午12時至7月10日中午12時期間,按以下登記步驟,就會免費換取戚風小蛋糕一件,活動採取先到先得形式,而成功登記嘅壽星會收到電郵通知。
登記步驟:
1. Follow其的Instagram(@lafamillecake)及like Facebook(@lafamillechiffoncake)。
2. 進入網站(按此)填寫並提交個人資料。
3. 成功登記後,你將於48小時內收到成功登記電郵通知,如成功得獎,得獎者將收到獲獎電子換領信,喺揀選咗嘅指定日期去門市兌換蛋糕。
4. 得獎者憑換領信上嘅QR Code於所選擇嘅日期,親臨La Famille分店,並向店員出示有效的身份證明文件核對姓名、出生日期即可換領獎品。
5. 參加者必須年滿11歲、持有香港身份證、並為當月嘅生日之星,而每位參加者只可登記一次。
圖:餐廳(FB)
文:Cathy、Sharon