成都三甲火鍋抵港 總店直送麻辣紅油湯底
2018-05-25


咁熱仲介紹麻辣火鍋?食辣可以去濕,同埋出一身汗有助降溫,不過最重要係,越熱越辣就越過癮吖嘛!相信一眾麻辣控食辣係不分季節嘅。呢間來自成都嘅成都老碼頭火鍋,於國內有過百間分店,亦係當地火鍋三甲、全國最佳火鍋十強,連郭富城、JJ林俊傑都有幫襯,老闆亦係四川火鍋協會會長,來頭不少架!


香港店由幾位鍾意食麻辣火鍋嘅港人以特許經營開設,作為首間海外分店,總店派出大廚及服務總監來港監督。分店有兩層過萬呎,同國內店一樣咁奢華。湯底用嘅麻辣紅油亦來自總店,確保味道一致。


老碼頭火鍋為「無渣火鍋」,大部份香料同藥材混合牛油提煉成一包紅油,食時就唔會有好多渣滓及香料,亦唔怕湯底越滾越苦。後加入湯嘅有來自貴州指天椒、大紅袍花椒,香氣重,辣度勁,加埋紅油及豬骨湯就係麻辣湯底,可以揀香港版嘅小辣,以及成都原味小辣。採訪當日開飯仔一邊影相,一邊聞住陣陣香辣味,未食已經刺激到咳呀。麻辣湯底味道唔係講笑,一片紅油浮面,但食落真係好夠香,亦好很辣。

鴛盟湯底 $158


油碟已經調好,加咗自家香油、蒜頭、蠔油及陳醋,點食物可以增加層次感,亦可以攤凍少少。


配料就以香港食材為主,餐牌好多選擇。除咗麻辣鍋常見嘅毛肚、鵝腸、鴨血等內臟,亦有繡球菌、鴨郡把、耗兒魚等特別款式。繡球菌質感似雪耳,食落爽脆。鴨郡把就係鴨食道,似黃喉但就更薄身。連香菇包括金菇、姬菇都係喺廚房自己種,不過採訪當日冇收成暫停供應。

滑溜溜鴨血 $68

高原雪花繡球菌 $118、脆口鴨郡把 $88


牛肉亦比國內更頂級,日本A4和牛牛頸脊、牛肩胛,亦有沾滿辣椒粉嘅瘋狂辣牛肉。牛舌同樣係浸住紅油,但食落就唔算太辣。

日本A4牛頸脊 $198、瘋狂辣牛肉 $128


丸同餃類必試手工龍蝦肉蝦丸,真係釀咗一粒龍蝦肉喺入面!而芝士墨魚丸都有流心效果。蛋餃亦係自家製,蛋皮包住魚肉,味道唔錯。

手工龍蝦肉蝦丸 $68、手工芝士墨魚丸 $62

蛋餃 $62


味道夠晒正宗,不過咁辣咁油都真係唔係人人都受到。辣到跳晒舞點算好,可以食玫瑰冰粉,或者飲杯自家製杞子龍眼菊花蜜解一解辣。

解辣玫瑰冰粉 $32、杞子龍眼菊花蜜 $68


門口設有7秒去味機,會噴出帶有香味煙霧,都可以去除少少麻辣火鍋味嘅。



成都老碼頭火鍋

地址:旺角塘尾道61號地舖



文、相、片:Perrins

關鍵字
麻辣火鍋
旺角
成都
火鍋
打邊爐
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
7天前
全城抗炎!北角酒店最新應變 自助餐都有得外賣?
2020-07-17
全城抗炎!屋企都嘆到三層架下午茶 Tea Set外送/外賣自取推介
2020-07-23
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-07-30