悠閒嘆鰻魚全日早餐+精品咖啡 觀塘工廈新開花藝Cafe
2019-01-29

觀塘又多間舒服嘅Cafe可以去啦!呢個品牌主打精品咖啡同健康料理,最近由鰂魚涌開到觀塘工廈當中,唔單止繼續供應鰻魚全日早餐,仲多咗日式定食同小食。Cafe一角係品牌嘅花藝店,可以一邊欣賞鮮花一邊嘆美食!
 


The ARTlab by Favilla集精品咖啡、料理、花藝同藝術於一身。暫時試業期間午市會供應全日早餐同日式定食,下午茶時段供應輕食同甜品。Cafe一角係花藝店,售賣鮮花、保鮮花、絲花等。而呢度亦有搵唔同Artist合作,好似之前就舉辦過Instagram人氣書法家Typing嘅展覽。
 


【和式】全日早餐($128)(轉牛角包 另+$15)

鰂魚涌店熱賣嘅和式全日早餐呢度繼續供應,一樣所有料理不加味精,選用日本雞蛋,原生態養殖無激素鰻魚。鰻魚肉厚彈牙,富蒲燒香味,不過有一兩條細骨。
 


味噌炒蛋柔滑而唔油膩,味噌鹹香同淡淡蛋香配鰻魚啱啱好。拍攝當日沙律係南瓜沙律,口感粉糯。而牛角包牛油香明顯亦夠酥,如果再硬身啲同脆口啲感覺會更討好。
 


慢煮雞卷配芥末風味醬定食($98)(加溫泉蛋 另+$12)

日式定食暫時有四款選擇,日後或會逐漸增加款式。呢款就用60°C慢煮雞卷,雞卷用日本雞肉人手捲成,裡面加咗紫蘇葉、蕃茄等,配帶微辣嘅芥末風味醬。定食會配埋飯、湯同是日沙律。
 


雞卷口感嫩滑結實,味道就以紫蘇香味為主,比較清新。另加嘅溫泉蛋蛋白滑溜,蛋黃半熟香濃,加豉油撈飯食就最啱!而且飯本身已經落咗少少芝麻同紫菜,比一般白飯香口。
 


紅豆窩夫配綠茶雪糕($68)

14:30起供應下午茶,格仔窩夫外脆內軟,配北海道紅豆甜度得宜。再配多球Häagen-Dazs抹茶雪糕就更有和風Feel!
 


抹茶撻($32)

另外亦有鬆餅、蛋糕等輕食,抹茶撻唔會太甜帶抹茶清香,略嫌回甘味道唔夠突出,死忠抹茶控可能會失望。不過勝在味道清新,而且撻底鬆化,係一份唔錯嘅茶點。
 

更多【新店直擊】:
1. 台北麻辣火鍋創始店進駐旺角 飲得嘅麻辣湯底配特色配料
2. 一人前日式涮涮鍋 銅鑼灣Pop Up店食A5鹿兒島黑毛和牛鍋
3. 法國頂級朱古力品牌重回香港!必試全新三款黑朱古力

 


精品咖啡($70)

品牌主打精品咖啡,好似最近用嘅呢款哥倫比亞咖啡豆得過國際咖啡比賽第三名,手沖滴漏後聞起嚟帶少少似焦糖嘅甜香,飲落有類似莓果嘅酸味,後韻帶甜,口感柔滑頗易入口。咖啡豆會不定期更換,Coffee Lover不妨留意下。
 


伯爵茶柚子梳打($46)

特飲配搭亦有新鮮感,呢杯用伯爵茶搭配柚子蜜,入口先飲到伯爵茶香,之後係柚子蜜嘅清甜,配合氣泡口感非常清新解膩。另一加分位係Cafe為咗響應環保,用嘅係紙吸管,當然大家如果可以自攜吸管,或者走飲管就更好啦!
 








The ARTlab by Favilla
地址:觀塘開源道55號開聯工業中心B座6樓602A室
*試業營業時間為星期一至五 11:00 - 18:00




文、相、片:Cathy

關鍵字
觀塘
Cafe
精品咖啡
全日早餐
定食
甜品
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2021-04-01
悠長假期 復活節下午茶推介
2021-03-26
【只想專注做好牛腩】金融經紀轉行灣仔開濃湯牛腩麵店 招牌牛骨濃湯崩沙腩河
2021-04-01
【優秀開飯熱店大賞2021】新店人氣王 甜品Cafe過江龍健康燉湯樣樣齊
2021-03-31
【小店要支持】大圍罕有西班牙餐廳 每年只光顧四、五天的「熟客」
2021-03-29