必食即撞豆腐花+調色盤雞蛋仔!旺角兩層高摩登港式小食甜品新店
2022-12-16

如果你都鍾意食港式小食同甜品,呢個品牌喺旺角新開嘅旗艦店就啱晒啦!主打重新演繹嘅街頭小食同地道甜點,當中DIY系列更係邊玩邊食,好似即叫即撞嘅堂弄豆腐花,同用調色盤奉上各款醬料嘅雞蛋仔。餐廳樓高兩層,裝修更糅合懷舊公園遊樂元素,更有玩味。
 

旗艦店裝修糅合公園遊樂元素

小點角落坐落於旺角白布街,店內設計意念嚟自香港以前公園裡面嘅遊樂設施,例如管道滑梯造型嘅燈飾,模仿馬騮架嘅方格牆身,扮近氹氹轉嘅圓枱等,有無勾起你嘅童年回憶呢?
 

DIY系列有得食又有得玩

堂弄豆腐花($108)

餐廳招牌甜品之一就係堂弄豆腐花,店員會即席將豆漿撞入石膏粉同生粉水中,用沙漏計時等10分鐘,就有一盤新鮮製作、軟滑而有豆香嘅豆腐花啦!叫得新派甜品店,配料當然亦非一般啦。
 

堂弄豆腐花嘅配料同糖水可以自由配搭

木盤上會有三款配料:香甜嘅蜜紅豆薏仁、薄脆嘅炸豆腐皮、用Super Food自家製作嘅手工小圓子;同三款糖水:清甜嘅桂花冰糖、薑味突出嘅黑糖薑燕麥、茶香清幽嘅香片桂圓。當中最特別嘅係手工小圓子,每日輪流有兩款口味,拍攝呢日就係紅色嘅雜莓紅火龍果,同黃色嘅芒果薑黃。
 

雞蛋仔101畫室($88)

雞蛋仔101畫室就充滿藝術感,中間係外脆內Q嘅三重芝士雞蛋仔,旁邊嘅係醬汁,有餐廳自家研發嘅麻辣朱古力醬,同花生醬、雜莓果醬、檸檬醬,而煉奶同海鹽焦糖就以顏料管盛載。放心餐廳有特別標示所有食材用具都係食品級,可以放心創作屬於你嘅雞蛋仔大作!
 

經典甜品新食法

豆腐凍芝麻糊($58)

將常見嘅芝麻糊豆腐花分拆再組合,食嘅時候先敲開竹炭糖片,再將芝麻糊倒到豆腐凍上面。芝麻糊相當細滑厚身,食得出天然黑芝麻香氣,豆腐凍甜度較低,再加上竹炭糖片脆身口感,口感豐富又唔會太甜膩。
 

麻辣朱古力梳乎餅($118)

(左)梳乎餅,(右)麻辣朱古力醬

梳乎厘就聽得多,呢度嘅梳乎餅其實係將梳乎厘製作成鐵鍋班戟造型,口感輕盈入口即溶,就咁食帶蛋香同淡淡甜味。加埋餐廳自家研發嘅麻辣朱古力醬、海鹽芝士奶蓋,同奇脆朱古力意式雪糕,可以配搭出唔同味道同口感。
 

更多【新店直擊】:
1. 時令水果創作甜品+精緻日式定食 荃灣最新日光簡約Cafe
2. 韓國人氣Puradak炸雞進駐將軍澳 先焗後炸+11款口味任揀!
3. 神還原韓國復古大排檔!大角咀新打卡餐廳 必點招牌醬油蟹醬油蝦

 

麻辣S’MORE($52)

麻辣朱古力醬亦可以變成飲品!呢杯麻辣S’MORE同樣以餐廳用61%法國朱古力及四川花椒等調配而成嘅麻辣朱古力為基底,加入橙皮、龍舌蘭蜜,最後加上灸燒自家製棉花糖。未飲先聞到辛香料味,入口會先有少少麻感,之後就係朱古力嘅甜味,最後先有少少辣味滲出,層次豐富。
 

Fusion版港式街頭小食

瑪莎拉咖哩魚蛋配手抓餅($58)

街頭常見嘅魚蛋都可以嚟個Fusion升呢版,餐廳選用多種香料包括小茴粉、小荳蔻、丁香、玉桂、辣椒粉、咖喱粉等製作印度風味嘅瑪莎拉咖喱,香氣更為濃郁,味道層次亦比一般咖喱豐富。魚蛋口感彈牙,完全無粉感。而且特別配搭酥脆嘅手抓餅,點埋咖喱汁食真係無得輸。
 

花膠碗仔翅蒟蒻麵伴炸紫菜 ($68)

碗仔翅以木耳絲、冬菇、雞絲和雞湯為湯底,特別加入新西蘭鱈魚膠同以蒟蒻麵取代素翅,足料好味又健康啲!中途可以加入醋換個口味。亮點在於碗邊嘅自家鮮炸紫菜天婦羅,口感香脆同碗仔翅又好夾。
 



小點角落

地址:旺角白布街2-24號藝興大廈地下4號舖




文:Cathy.H
相、片:Yan Yan


關鍵字
旺角
甜品
小食
豆腐花
雞蛋仔
咖喱魚蛋
小點角落
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
持續更新! 2024生日餐飲優惠放送
2024-06-04
【隨時更新】最後倒數!2024即將結業人氣/老字號餐廳
2024-06-04
【專訪】韓國人主理兩餸飯 凌晨4點備料 日賣450盒
2024-05-17
【2024新店精選】5月更新! 娛樂體驗主題酒吧、古蹟化身意大利餐廳
2024-05-24
【隨時更新】零食速報 每周新款零食、酒品點評
5天前