必試芝士桃桃+水果茶 旺角新開台式臭臭鍋(有片)
2018-08-17

呢個夏天真係有唔少新嘅飲品面世,而旺角呢間新店就真係估佢唔到,明明係賣台式臭臭鍋,但又特別劃出一角專賣水果茶。驚喜位係無論茶底定水果同芝士奶蓋嘅配搭都做得唔錯,特別係季節限定嘅芝士桃桃值得一試!
 


湯•米上個月去到旺角豉油街開分店,新店一入門口就係茶飲吧。茶葉全部選用台灣進口,部分仲係高山茶葉嚟㗎!
 


芝士桃桃先用新鮮桃肉加綠茶、冰打成清新果茶冰沙,再加上用紐西蘭牛奶、芝士同意大利海鹽以秘方調配嘅芝士奶蓋,形成果茶、冰沙同奶蓋三層嘅吸引賣相!
 


芝士桃桃($39)

飲落啖啖桃味,果香明顯而唔會過甜。而奶蓋都幾厚,飲落味道先鹹後甜,奶香味突出,同桃味嘅香甜平衡得唔錯。除咗水蜜桃之外,仲有用新鮮士多啤梨打嘅芝士莓莓($39)揀呀。
 

另一推介係超級杯水果茶系列,因為真係名副其實有唔少水果呀!負責人仲話全部都係新鮮水果,無添加任何香精,全部都係鮮果天然甜味。
 


超級水果綠妍($37)

綠妍即係綠茶,茶底清新,而百香果籽亦增加咬口。其他水果果肉包括橙、西瓜、士多啤梨、紅柚同青檸,飲到果甜但無蓋過茶甘。隨杯仲有支長叉方便大家飲完茶食埋啲水果呀。
 


滿杯紅柚子($35)

想再清新啲話,可以試下呢杯橙紅色嘅滿杯紅柚子,紅柚綠茶冰沙飲落有柚子獨特嘅微澀同清甜,特別消暑。
 


芝士金鳳茶王($32)

另外亦有純茶同芝士茶,金鳳茶王係烏龍茶嘅一種,有綠茶嘅清香之餘回甘亦悠長。芝士奶蓋上面仲會用抹茶粉撒上品牌Logo恐龍做裝飾。店家建議大家先打開杯蓋傾斜45°咁飲,同時飲到奶蓋同茶,最後先用吸管攪勻。
 


黑糖珍珠鮮奶($29)

最近大熱嘅黑糖珍珠呢度都有!新到連Menu都未Update呀,黑糖珍珠係自家熬製,用嘅古早味黑糖唔係黑糖漿,睇得出用心。黑糖珍珠加入明治4.3牛奶後掛杯黑糖紋雖然唔算非常多,不過珍珠咬落都幾有黑糖香,值得一讃嘅係每粒珍珠都有入味。珍珠大細啱啱好,幾有咬口而且冰融咗都唔會變得太韌。
 

更多【新店直擊】:
1. 泰籍混血女生上環開設 海南雞泰式便當
2. 台北閃閃打卡雞蛋仔回流元朗 黑糖珍珠雪糕味好吸引
3. 坑口煲仔菜專門店 抹茶煲飯咩玩法?

 

招牌臭臭鍋($108)

介紹咗咁多飲品,都係時候講返店家主打嘅小火鍋啦。招牌臭臭鍋嘅主角當然係臭豆腐啦,因為保質期短嘅關係,店家用嘅係香港一間食家蔡瀾推介嘅臭豆腐店。
 


而米血糕、鴨血、貢丸、湯底用到嘅沙茶醬、豆瓣醬就由台灣進口。配料仲有鵪鶉蛋、滷大腸、牛肉片同多款蔬菜,非常豐富。
 


巴蜀烤魚鍋($112)

小火鍋嘅好處方便一支公,好似平時一個人食唔到嘅烤魚,嚟到呢度就食到喇!中間大大條火燒鯇魚,金黃香脆,再灑新疆嘅孜然同辣椒粉,增添香辣。
 


湯底亦特別用四川香料去炒,麻辣過癮。當然如果唔食得辣嘅朋友仔,亦可以選小辣,相反就不如嗌極辣嚟挑戰自己!小火鍋送白飯或粉絲,亦可以加$12升級做滷肉飯。
 


枱上面有調味醬料,Menu就話完美比例係一羮蒜蓉,加兩羮豉油同三羮豆瓣醬或沙茶醬。不過老實講開飯仔記得湯底都夠哂味,自問重口味嘅朋友仔先點呢款醬啦。
 




湯•米
旺角豉油街60-104號鴻都大廈地下AB舖
訂座可享早鳥85折條款及細則)或宵夜7折條款及細則




文、相、片:Cathy

關鍵字
旺角
水果茶
芝士奶蓋
台式飲品
黑糖珍珠
珍珠奶茶
臭臭鍋
火鍋
打邊爐
台灣菜
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
1天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
旺角新開花藝Cafe 豐富全日早餐+明太子貓耳朵+特調有機花茶(有片)
2020-05-18