必試芒果冰、芒果糯米飯芭菲 泰國人氣芒果甜品店進駐北角(有片)
2020-01-14

以後喺香港都食到抵食嘅泰國芒果甜品!清邁人氣芒果甜品店品牌最近進駐北角開香港第一間分店,選用自家生產泰國水仙芒製作一系列芒果甜品,好似芒果冰、芒果蜜糖吐司等等,而且價錢公道,好似特飲$25起,芒果糯米飯芭菲都係$28咋。
 


泰國Mango Mania嘅CEO Karanya Jarutanin亦專程嚟到香港首店

Mango Mania係2011年喺泰國清邁創立,主打以自家生產水仙芒為主嘅甜品、沙冰同果汁,喺泰國有近20間分店。香港店會沿用水仙芒,特色係味道清甜,食落唔會有太多纖維口感。
 


超級芒果狂熱($68)

品牌CEO推介之一係呢份非常豐富嘅拼盤,有芒果糯米、芒果雪糕、芒果布甸、忌廉、芒果椰奶醬同半個芒果!芒果肉食落果然夠甜夠Juicy,糯米口感軟糯,點雪糕食得,點芒果椰奶醬食都得,畀大家自由配搭。
 


芒果蜜糖吐司($58)

泰國當地熱賣甜品係芒果蜜糖多士,沾上蜜糖嘅French Toast上面加糯米、椰子雪糕同新鮮芒果粒,再加半個水仙芒。吐司偏軟身,所以建議「相機食先」嘅朋友要快手啲呀。芒果嘅天然微酸同蜜糖吐司嘅甜味好夾,加埋椰子雪糕就更增加口感同味道層次。
 


芒果糯米飯芭菲($28)

講到泰國嘅芒果甜品又點少得芒果糯米飯!呢杯芒果糯米飯芭菲就係兩層糯米同兩層芒果肉相間,上面再加炸綠豆仁同薄荷葉點綴,完全就係方便拎走甚至邊行邊食嘅杯裝芒果糯米飯呀。
 


芒果冰磚($70)

泰國另一熱賣甜品係呢碗芒果冰,刨冰本身已經帶煉奶甜味,再加芒果肉、芒果雪糕、芒果椰奶醬一齊食係四重享受呀!而且仲有煙韌嘅糯米飯增加口感,食完好滿足。
 

更多【新店直擊】:
1. 日本人氣柚子拉麵店登陸尖咀 清爽柚子甘露沾麵率先試
2. 台灣連鎖一人一鍋火鍋店進駐大埔!必試麻辣鴨血鍋 任飲任添白飯、雪糕
3. 新開魔術手工啤酒吧 OnTap女伯爵全港獨家 + 過癮麻婆Mac&Cheese

 

芒果狂熱下午茶($88)

用白色架奉上嘅下午茶套餐,兩層加埋有九款茶點,都係以芒果同椰子為主,勝在都係細細份,精緻得嚟自己一個人食晒都唔會太膩。而且套餐包埋一壺熱茶,可以揀芒果熱情果橙茶、甘菊蜜糖雲呢拿茶,或者玫瑰果茶。
 


芒果椰子西米慕斯特飲($42)

非常豐富嘅特飲,一杯就有齊椰汁西米、芒果汁,同椰子慕斯!最頂嘅椰子慕斯帶少少鹹味,口感同味道都好似椰子口味嘅奶蓋咁,撈埋芒果汁同椰汁西米一齊飲其實都幾豐富又幾飽肚㗎。
 


芒果冰特飲($33)

其實即係芒果沙冰再加芒果粒,係最試得到佢哋自家生產水仙芒原味嘅特飲。沙冰打得夠細碎,味道清甜。
 


小椰子特飲($25)

餐廳亦有其他無芒果嘅梳打、果汁同特飲,好似呢杯睇名就知道係用椰子做主角。另外仲有A-Plus($30),係用富含維他命A同胡蘿蔔嘅紅蘿蔔、蘋果、菠蘿打成嘅果汁。另一款Detox($30)有西蘭花、芹菜、蘋果同菠蘿,係幫助排毒嘅。
 


芒果小碗($58)

雖然叫小碗但其實分量都唔細,一份有口感順滑嘅芒果奶昔、新鮮芒果粒、煙韌糯米飯,同芒果雪糕,係「升呢」版嘅芒果椰子西米露呀。
 




Mango Mania
地址:北角和富道21-53號和富地下G18C號舖




文、相、片:Cathy

關鍵字
芒果
甜品
芒果糯米飯
芒果蜜糖吐司
芒果狂熱
北角
Mango Mania
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
情人節去K11 MUSEA 一文睇晒浪漫餐廳
2020-02-06
全城抗炎 與醫護同行!提供醫護餐飲免費優惠餐廳一覽
2020-01-31
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎!60間餐廳推$0-$25酒精搓手液換購計劃
2020-02-12
全城抗炎!衛生保障 推行防疫措施餐廳一覽
2020-02-07