抹茶控表示好忙，最近頻頻都要出動，今次仲要出到去九龍灣嗰頭，不過為咗食抹茶tea，再遠啲都要去啦。嗰邊有間以茶做主題嘅café，呢排同日本老字號茶行「丸安茶葉」合作，推出咗個抹茶下午茶呀。

成個tea set 有5款鹹點5款甜點，大部分都有抹茶成分嘅。最吸引嘅一定係岩燒蜂蜜抹茶蛋糕，成個製作過程總共會烤焗兩次，蛋糕軟綿抹茶味香濃，甘而不澀，精髓就在於面層嘅蜂蜜芝士醬，係用車打芝士、蜂蜜、忌廉等材料自家調配而成，甜中帶微香，成個cake嘅味道都好balance。不過就真係有啲大個，兩個人share食都飽咗大半。

其餘嘅甜品包括有牛乳抹茶紅豆雙色奶凍、抹茶芝士蛋糕、抹茶手工雪糕同三色白玉。個奶凍係用北海道3.6牛乳製，好重奶味，而且因為加咗cream嘅關係，口感幼滑，配埋抹茶同紅豆蓉，微甜。

抹茶芝士蛋糕羸在佢個富士山仔造型，好靚，芝士味比抹茶味濃，每啖都有好實在嘅感覺，但又係另一樣超飽肚嘅嘢。

至於鹹點方面，就有牛油果煙三文魚蟹籽酥盒、抹茶冷麵等等，要特別講下隻「雞槌」。查實就唔係真‧雞槌嚟嘅，用腐皮逐層逐層咁捲到咁樣樣啫，再用日式吉列嘅方法去炸，外層幾脆，另配自家製抹茶芝士醬。

個tea set包兩杯茶飲嘅，如果堅大食嘅朋友，仲可以加30蚊叫埋個芭菲特飲。 有粟米片啦、抹茶凍飲啦、抹茶蕨餅啦、crepes啦、馬卡龍啦、白玉啦等等，頂頭雪糕就可以揀抹茶、焙茶同玄米抹茶味，食完肥咗幾磅唔使話我知科科。

供應日期：即日至6月30日
時間：星期一至六 3pm – 6pm、星期日 2pm – 6pm

嚐品慕茶
地址：九龍灣偉業街89號昌興工業大廈閣樓

文、相：Kar