尖咀新開本地茶飲店 水墨畫風芝麻烏龍麻糬鮮奶
2018-12-07

經過一陣台風茶飲店嘅攻佔期之後,最近有間本地茶飲店了發圍了。喺尖咀一個商場內,開咗間以水墨畫為主題嘅舖頭,有打卡able嘅茶飲、茶味雪糕同茶味甜品。

每杯茶都好似一幅藝術畫作咁,以獨家水墨筆刷畫杯,有紋有理,最靚嘅就係呢杯黑白畫風嘅芝麻烏龍麻糬鮮奶。以台灣高山烏龍茶沖泡而成嘅茶湯,再加自家打成嘅芝麻醬同奶味麻糬粒,茶味係幾甘香嘅,仲有陣陣芝麻香。同埋預設甜度係50%,相比平時飲開嘅台茶係冇咁甜,當然大家都可以根據自己喜好揀甜度啦。

紫薯控要揀紫薯鐵觀音堅果奶蓋,紫白色調有種浪漫感。白色係以腰果、開心果、杏仁、夏威夷果仁、合桃自家打成嘅堅果奶,加埋日本紫薯,而奶蓋則一反傳統,唔用芝士,改用鐵觀音同堅果奶打成,口感綿密,亦都冇咁heavy。

至於呢杯黑糖珍珠奶茶,仲加入咗呂宋芒果汁,色水就幾靚喇,但啲珍珠口感就偏軟腍咗啲。

火龍果鐵觀音堅果奶蓋飲落甜甜酸酸,幾清爽;而麻糬玄米抹茶鮮奶就有陣玄米茶香。佢哋嘅茶係用獨家專利嘅六段式萃茶機製作,將茶葉磨成唔同嘅粗幼度之後,經六次唔同嘅水壓同溫度嚟沖泡。

除咗茶飲,呢度仲有聯乘本地品牌「慕茶」,設立茶雪糕專櫃,有多款獨家自製茶味gelato雪糕,包括日本玄米抹茶、高山烏龍茶、焙茶、茉莉花茶味雪糕等等,仲要低糖低脂喎,食多幾球都唔使怕肥。

呢4件靚靚cake係戚風壽司,即係戚風蛋糕。藍紫啡白4隻味分別係雲呢嗱、香芋、伯爵茶同芝麻味。

之後會陸陸續續推出其他茶味爆谷,暫時係抹茶味。

茶墨
地址:尖沙咀彌敦道100號The ONE 4樓L411號舖

文、相、片:Kar

關鍵字
尖沙咀
茶飲店
珍珠奶茶
抹茶
雪糕
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
3天前
優雅小聚 11月下午茶推介
2020-11-03
【訂座感謝祭】 快閃$20餐飲券第八彈 激抵燒烤優惠
2020-11-06
桔梗姐妹店進駐牛頭角 8,700呎自設炒豆房及餅房 手沖咖啡配輕食
2020-11-02
Wine & Dine 2020預告 免費網上學品酒 精選品酒套裝率先睇
2020-11-19