宴客飯局啱哂 新派中菜館片皮鴨推介
2017-06-19

無論係同屋企人慶祝生日,同親朋戚友食飯,或者招待國外朋友想食中菜,片皮鴨(北京填鴨)都係其中一個好選擇。開飯仔幫大家搜羅咗以下七間城中推介,有平有貴,有京式片連肉有新派一鴨三切。提提大家片皮鴨始終都係工夫菜,唔想撲空建議先Book枱預約定!
 

Fine Dining價(人均$401 - 800)

豪華中菜館三切  卅二公館


圖:EAT hard PLAY hard

42天飼養北京片皮鴨(蘋果木燒)需要早一日預訂,先上枱比食客見過真身,再切成鴨皮、鴨皮連肉同鴨肉。鴨皮點黃糖即食油脂入口即溶,鴨皮連肉就可以配青瓜京蔥同海鮮醬再用荷葉餅包裹進食,鴨肉可以點醬食,亦可以加錢做香爆鴨件或鴨鬆醬油炒飯。
 

豪少少價(人均$201 - 400)

新派填鴨之選  沙田18


圖:EAT hard PLAY hard

Budget想低啲又想食到一鴨三切嘅話,沙田呢間酒店餐廳就絕對係另一個好推介。烤鴨三食先有片皮鴨,廚師會喺食客面前即場切鴨,先切鴨皮點糖食,然後係鴨肉,最後鴨脾部位係切成皮連肉。而二食係香口嘅鴨鬆生菜包,三食係鴨湯。順帶一提佢地嘅雪糕非常有特色,可以留肚一試!
 

傳統新派糅合十食  大都烤鴨


圖:紫揚晴海

尖沙咀呢間中菜館既保留掛爐配以果木薰烤嘅方式,同時喺鴨架菜式上面加以創新。片皮鴨分鴨皮同鴨肉,鴨皮已經去除皮下脂肪,食落脆卜卜而唔油膩。配料有紫蘿蔔、蜜瓜、青瓜、京蔥、京醬、砂糖同荷葉餅。鴨架則有荷香包鴨飯、梅子炆鴨架等十款選擇。
 

更多【開飯專題】:
1. 對抗炎炎夏日 消暑雪糕新選擇(有片)
2. 旺角黑夜覓食 宵夜餐廳精選
3. 戀上手工啤酒 Chill開心7間酒吧餐廳推介

 
親民價(人均 $101 - 200)

堂弄京式片皮鴨  金滿庭京川滬菜館


圖:不孤獨的美食家

呢間連鎖京川滬菜館唔單止定價較為親民,而且仲會由廚師喺你面前將原隻烤鴨切片,以皮帶肉為主,值得一讃嘅係師傅動作夠快,鴨片食落夠熱。配料有北京人點開嘅蒜泥同大葱、青瓜、甜麵醬、餅皮。可以改為二食,從生菜鴨鬆、津白豆腐鴨骨湯同醬爆鴨骨任擇其一。
 

皮脆肉嫩招牌菜  玉桃軒酒家


圖:EatalyFUN

之前開飯仔喺生日飯局中菜篇就介紹過觀塘呢間中菜館,一樣有店員堂切烤鴨,一樣係皮連肉嘅切法,皮脆肉嫩。用餅皮包住鴨片同甜麵醬、青瓜同大葱一齊食就最啱。而改為二食嘅話選擇有鴨鬆生菜包、涼瓜炆鴨件、薑蔥炆鴨件同豆腐菜苗滾鴨湯。
 

抵食價(人均 $51 - 100)

高CP值小館  老掌櫃東北菜館


圖:l.tsui

大角咀呢間餐廳嘅木枱木凳坐得無一般酒樓咁舒服,但勝在古色古香幾有特色。片皮鴨係皮帶肉,配青瓜、京葱同餅皮。鴨片食落皮脆有油香而鴨肉亦唔會太乾太柴,及格有餘。唯一要挑剔嘅係加配料需要加錢,不過望返片皮鴨個單價,計翻CP值點都係抵嘅。
 

水準京川滬菜  霸王山莊


圖:eat4forever

呢間喺尖沙咀同大角咀都有分店,唔少人會去試點心,其實片皮鴨水準亦唔錯。佢地嘅片皮鴨嘅特色係比較少脂肪,好處係皮連肉食落都唔太油膩,壞處係可能會覺得香味唔夠。配青瓜、京葱同餅皮。
 



文:Cathy

關鍵字
片皮鴨
北京填鴨
北京烤鴨
京川滬菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
迎接全新2020 1-2月下午茶推介
2020-01-06
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
2020-01-13