當大家成日都好鍾意「喂，Siri」、連whatsapp都變晒語音訊息嘅時候，有快餐店嘅點餐系統都趕上潮流，加入語音點餐功能呀！

KFC獨家研發咗全港第一部結合語音同體感偵測技術嘅點餐機，以後就可以隔空點餐啦，既方便又快捷！呢部咁屈機嘅點餐機，暫時得金鐘分店先有！

點餐機有啲似電話亭，要走入去先用得，裝有OLED透明屏幕，冇人用緊嗰陣就會變成透明。

內置Intel RealSense鏡頭，有景深感知、3D成像、IR鐳射投影同功能追蹤，可以偵測到0.2m至1.2m距離嘅手部動作，真係走在科技嘅最尖端！呢啲高科技聽落好複雜？總之可以好準確咁用雙手隔空點餐啦，直情好似科幻電影入面出現嘅場面咁呀。

而且載有全球獨有嘅「粵語語音識別系統」，可以用廣東話或者英文點餐，收音系統用嘅咪高峰同埋揚聲器都係最新型號，唔會咁容易收錯指令，播音亦好清晰。

不過到真係試用嘅時候，就唔係咁順暢。埋單可以講OK、結帳、埋單等等都得，但可能現場環境比較嘈，有啲朋友仔點完餐，嗌咗好多次埋單先detect到！反而用手感應比較好，反應都幾靈敏！

俾錢可以用Visa payWave、Mastercard Paypass、Apple Pay或者Android Pay，而且要先預繳$50，如果埋單不足$50，餘額就會捐去聯合國世界糧食計劃作慈善用途。點完餐就留意返手機同出面螢光幕顯示嘅叫號拎餐就搞掂。暫時只得金鐘店有點餐機，而且只有一千零一部，想試玩好大機會要排隊啦。

BTW，其實喺上年年底，北京嘅分店都已經引入咗部有臉部偵測技術嘅點餐機，可以偵測到食客嘅年齡同性別，同埋會記低佢哋嘅點餐習慣，如果食客再去食嗰陣，就會show返到佢哋嘅點餐紀錄喇。

圖：KFC微博

KFC（金鐘分店）
地址：金鐘夏慤道18號海富中心地下42-68號A舖

文、相、片：Kar