喺Soho區想搵個地方嘆杯啡，最近又多個選擇：由人氣甜品店夏雪班底開設嘅新Cafe！ 選用自家烘焙嘅咖啡豆，更有充滿驚喜嘅「涼茶x咖啡」系列。食物方面當然唔少得夏雪嘅招牌窩夫，每月唔同口味，另有純素甜品選擇。新店同時亦係咖啡工作坊。
 

f1rst crack店名嚟自咖啡烘焙術語「first crack」，即係咖啡豆烘烤時第一下爆開嘅聲響。新店專注於研究咖啡，有唔少新穎組合，好似中西合璧嘅竹蔗茅啡。亦會不時舉辦咖啡烘焙分享班等工作坊，各位愛啡之人就可以學到更多咖啡知識。
 

Hand Drip Coffee（$75起）

約每兩個星期就會轉一次款，咖啡豆維持喺最佳狀態之餘亦帶畀大家更多新鮮感。而且可以揀自己鍾意嘅咖啡杯，杯口較窄嘅話咖啡飲落會比較酸，相反杯口較圓嘅話甜感就會更突出。
 

拍攝呢款係哥倫比亞、以乳酸發酵處理嘅咖啡豆，初入口係酸甜嘅熱帶水果風味，後段會有酒香同黑糖嘅甜香，口感較薄而不失柔滑。手沖咖啡會另外附上咖啡粉同黑朱古力，咖啡粉係畀大家聞香，可以比較咖啡粉嘅乾香同咖啡沖出嚟嘅香氣有咩唔同。而Valrhona 64%黑朱古力就係畀大家飲完啡食，平衡返口腔裡面嘅酸味。皆因新店供應嘅咖啡以淺焙為主，果酸明顯。
 

Cane Sugar Cold Brew（$70）

新店會有唔同Barista Special選擇，推介呢款用咗同區公利蔗汁嘅竹蔗茅啡，配搭冷萃洪都拉斯日曬處理咖啡，更突出咖啡本身嘅蔗糖風味同明亮果酸，同時唔會蓋過蔗汁嘅清甜，口感厚滑。特別以罐同香檳杯奉上，罐可以更妥善保存蔗汁而且可以回收，香檳杯感覺優雅仲好啱打卡。遲啲仲會陸續推出酸梅湯咖啡同龜苓膏Affogato！
 

Coffee Waffle with Whiskey Syrup（$60）

窩夫每個月都有唔同口味，採訪當日係9月份咖啡同威士忌配搭！窩夫沿用夏雪嘅配方，新鮮即焗口感特別外脆內軟。窩夫漿加咗淺焙咖啡，食起嚟會有淡淡咖啡醇香。配搭以台灣噶瑪蘭單一麥芽威士忌煮成嘅糖漿，酒香濃郁之餘同咖啡又好夾，好似食緊窩夫版嘅愛爾蘭咖啡！蘋果同樣以威士忌煮過，爽脆多汁、酒香濃郁，亦係一大亮點。
 

Vegan Sesame Berries Tart（$65）

同時亦有The Vege Lab供應嘅純素甜點，包括呢份純素日本黑芝麻黑莓撻，黑芝麻香氣唔算非常濃郁，勝在同黑莓酸酸甜甜嘅味道好夾，而且無蛋奶成分口感依然相當順滑，撻底亦夠鬆脆，整體甜而不膩。
 

新店一角係工作坊，現有咖啡烘焙分享班、咖啡拉花班、手沖咖啡班，詳情可向店員查詢或者留意佢哋嘅Instagram

自家烘焙咖啡亦可以一罐罐咁買走，裡面只有113g咖啡豆，因為希望大家盡量喺兩星期內飲完呀

f1rst crack
地址：中環嘉咸街55號地舖

文、相：Cathy.H