壽喜燒套餐最平$138!觀塘新開抵食日式定食+壽喜燒餐廳
2021-02-25

掛住日本美食、特別係壽喜燒又想錫住荷包嘅話,觀塘呢間新店就係個好推介。Lunch Set嘅壽喜燒鍋最平$138就食到!如果想試正統關西風味,由專人用鐵鍋逐片燒,每位都係$258起!另外佢哋嘅日式定食都係定價相宜又好味,特別係燒肉套餐絕對滿足到食肉獸呀。
 


喰楽位於觀塘區嘅工廈當中,地方唔大,勝在枱同枱之間都有屏風,裝修簡約清雅,感覺都幾舒服。餐廳只有四張四人枱,建議想食嘅話預先訂座會比較好。主打日式壽喜燒,而且有齊關東同關西兩種唔同風格,加上可以自選牛肉種類,豐儉由人。
 


關西壽喜燒($258/位起)

由最平嘅美國產牛肉($258/位)、澳洲產M9和牛($358/位)到最貴嘅日本產A4和牛($458/位)任君選擇。而日本產和牛會按時令挑選唔同產地嘅A4至A5和牛,好似最近供應嘅就係熊本縣A5和牛!套餐包括三式前菜、野菜拼盤、特式飯點,同是日甜品。
 



關西壽喜燒會由店員幫大家燒肉,會先以牛油同蔥起鍋,然後加入牛肉同少少醬汁燒燙至半熟,先試原味。餐廳選用嘅係和牛肉眼,脂肪分佈平均,肉質軟嫩入口即融!之後就會加入野菜同醬汁,先以野菜解膩,同時將蔬菜嘅甜味融入醬汁當中,再燒牛肉嘅話味道就會更加香甜。特別係同煮至軟腍嘅洋蔥一齊食,甜味同肉味都更突出!
 

更多【新店直擊】:
1. 尖沙咀新開未來感型格酒吧餐廳 推介煙燻油甘魚薄切配三文魚籽
2. 日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
3. 註冊營養師開設!中環新開健康輕食Café 紅菜頭朱古力、原個牛油果配酸種麵包

 

(午市定食)關東壽喜燒鍋定食(牛肉$138起,北海道豚肉$108)

想食平啲嘅話就可以下晝嚟食關東壽喜燒鍋,同樣有美國產牛肉($138)、澳洲產M9和牛($168)同日本產A4和牛($198)選擇。關東風格嘅壽喜燒偏Shabu Shabu形式,湯底一樣香甜,不過味道會比關西嘅淡啲啲,餐廳會先加野菜同湯底一齊煮至八成熟再上枱。
 


關東壽喜燒鍋用嘅和牛係肉味比較濃郁嘅肩胛肉,放入湯底滾十幾秒左右就食得,半熟食落特別柔嫩富肉香!記得點埋日本生雞蛋,蛋漿唔單止令牛肉口感更軟滑,亦可以降低溫度,即刻食都唔會辣口嘛。套餐附三式前菜、日本珍珠米飯及甜品。
 


(午市定食)日式燒肉定食($148起)

唔食壽喜燒嘅話,餐廳亦有供應定食套餐,好似呢款日式燒肉定食,就有齊燒肉、三式前菜、日本珍珠米飯配紫菜同甜品。主角燒肉就可以揀澳洲產M9和牛100g($148)或者日本產A4和牛100g($198),拍攝呢份用嘅係熊本A5和牛嘅肩胛肉,油脂較少而且帶少少筋,食起嚟更有咬口,肉香濃郁。
 


燒肉建議點少少醬汁再配飯食,醬汁係餐廳自家製,用大量蘋果、洋蔥等加牛肉熬製,味道香甜可以帶出肉味。而飯選用日本珍珠米,加上紫菜碎同芝麻增添香氣。而燒肉當中其實仲有醃菜,都係爽口嘅木耳、胡蘿蔔等,味道微酸可以解膩。
 


有無留意到定食同套餐都有附上三式前菜?同樣都係餐廳自家製,每日都會更換唔同款式,好似拍攝當日就有木魚絲雞肉卷、柚子大根,同櫻花蝦貝柱沙律,味道清爽又好有日本Feel。
 




喰楽
地址:觀塘開源道60-62號駱駝漆大廈3期9樓H號舖




文、相:Cathy

關鍵字
觀塘
壽喜燒
燒肉
日式定食
喰楽
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
6天前
【2021生日優惠】持續更新!5月食日本直送海鮮送西班牙紅/白酒
2天前
【最平$298最貴$938】佐敦新開日式和牛燒肉放題 獨家引入鹿兒島小田和牛
2021-04-09
帶媽媽味遊異國!母親節Brunch六選
2021-04-20
期間限定$1抹茶菠蘿包、$3竹炭菠蘿油 佐敦新開 2500 呎新派點心小廚
2021-04-30