呂宋芒主題店進駐荃灣 必試新店限定芒果糯米飯綿綿冰(有片)
2020-01-09

香甜多汁嘅芒果係唔少人嘅最愛,芒果甜品就更加受歡迎。呢間主打菲律賓自家果園直送呂宋芒嘅專門店,最近去到荃灣開第一間有堂食座位嘅概念店,唔單止繼續供應芒果同一系列好啱Grab & Go嘅芒果甜品,仲有最新推出可以邊行邊食嘅芒果糯米飯綿綿冰同新地!
 


皇冠(呂宋芒)專門店荃灣店上個月正式開業,品牌喺菲律賓呂宋島嘅南、北部自設芒果園,每個呂宋芒經過精挑細選確保品質再空運直送嚟香港。荃灣店唔單止有座位畀大家坐低食,仲有限定嘅芒果糯米飯綿綿冰、新地、特飲等。
 


皇牌($68)

呢杯皇牌係人氣之選,底部有芒果啫喱同香脆嘅粟米片,中間係即刨嘅芒果棉棉冰,上面再加芝士奶蓋、芒果果肉同芒果雪糕,層次非常豐富。芒果綿綿冰一片片入口即溶,本身都已經好夠芒果香,加埋芒果肉一齊食就更香甜!而奶蓋帶少少芝士鹹香,味道平衡返。加上手提杯設計可以畀大家邊行邊食,好方便。
 


芒果糯米飯新地($48/大)

而唔少人去到泰國必食嘅芒果糯米飯,呢度就將佢變成甜品杯!呢杯芒果糯米飯新地一層層嘅係粟米片、白糯米、芒果果肉、黑糯米、芒果果肉,同自選雪糕球,最後加埋杏仁脆皮,好啱相機食先!雪糕有芒果、綠茶、雲呢拿同朱古力選擇。
 


煙韌糯米加清甜芒果本身已經無得輸,加埋雪糕味道味道層次更豐富。另外芒果糯米飯綿綿冰($58)、雪糕竹炭筒($15/單球,$21雙球)都係荃灣店限定呀。
 


(左上)芒果布甸($20),(左下)芒果啫喱($16),(右上)芒果木糠布甸($24)(右下)芒果奶凍($22)

一杯杯咁好啱當飯後甜品,口感最豐富嘅係芒果木糠布甸,芒果肉令木糠布甸食落更加清新。布甸質感柔滑,奶凍會多一份奶香和,而啫喱就最清爽彈牙。最重要係上面鋪滿呂宋芒果肉,撈埋啖啖都咬到芒果好滿足。
 

更多【新店直擊】:
1. 台灣連鎖一人一鍋火鍋店進駐大埔!必試麻辣鴨血鍋 任飲任添白飯、雪糕
2. 新開魔術手工啤酒吧 OnTap女伯爵全港獨家 + 過癮麻婆Mac&Cheese
3. 紐約人氣甜品店登陸尖沙咀 香港限定甜品 創意檸茶蛋糕

 

芒果千層蛋糕($32/件)

同樣層次分明嘅千層蛋糕都好受歡迎,薄身Crêpe夾住柔滑忌廉同一粒粒芒果果肉,果肉都落得幾重手,唔會食到成口Cream得個膩字。
 


芒果班戟($30)

呢份芒果班戟就用Crêpe包吉士忌廉同芒果果肉,Crêpe皮夠薄,吉士忌廉嘅甜味同芒果嘅微酸都幾夾。不過開飯仔就私心覺得如果吉士忌廉少啲,芒果果肉再大塊啲會更開心,嘻嘻。
 


楊枝甘露($28)

用自家芒果汁製作,口感順滑而且無添加糖,係100%芒果天然甜味!裡面有唔少芒果粒、西柚肉同西米,比起飲品更似係要用羮𢳂嚟食嘅甜品呀。
 


芒果新年禮籃($399/個)


平時啲果籃算少見芒果,皆因芒果比較易爛,不過佢哋嘅芒果全部都係仔細包裝好再每日空運到香港。而且品牌嘅芒果有分唔同大細,禮籃用嘅全部都係XXL(351g-400g)至XXXL(401g-450g)尺寸嘅呂宋芒,攞上手同開飯仔手掌差唔多大!禮籃仲包括馬卡龍、紅酒同白酒,送禮夠得體。
 




皇冠(呂宋芒)專門店
地址:荃灣眾安街68號荃灣千色匯I期地下G024號舖




文、相、片:Cathy

關鍵字
芒果
呂宋芒
甜品
芒果糯米飯
新地
荃灣
皇冠(呂宋芒)專門店
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
1天前
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!60間餐廳推$0-$25酒精搓手液換購計劃
2020-02-12