又一重慶麻辣火鍋過江龍 一牛十吃 牛魔王大愛
2018-12-04

今年有唔少國內嘅麻辣火鍋嚟到香港開分店,令一眾辣椒仔女過足辣癮。嚟到年尾,又多多間開過嚟啦。位於尖沙咀嘅新麻辣火鍋店嚟自重慶,主打鴛鴦火鍋,最開心係有一牛十吃,開心死牛魔王。

呢間火鍋店可以話係四川重慶火鍋店嘅老字號,本店有成36年歷史,當年由路邊攤檔三張枱做起,發展到而家總共有超過200間分店,就連北美洲都有!餐廳主打鴛鴦火鍋同荔枝味鍋底,曾獲得「中國十大火鍋品牌」、「中國好火鍋」等榮譽。

今次嚟到香港,鍋底配方都跟足總店。好似招牌鍋底正宗洪崖洞麻辣鍋咁,就以印度魔鬼椒、燈籠椒、花椒等不斷炒煮四個鐘,令到鍋底麻辣得嚟亦帶有果甜味。就算同枱有怕辣嘅朋友仔都唔使驚,鴛鴦鍋嘅另一邊可以揀養顏木耳雞湯,幾清甜下。

至於火鍋配料方面,就有成過百款,包括河鮮海鮮、牛類、丸餃類、蔬菜類等。首推一定係「一牛十吃」,即係話有成十款牛嘅部位:牛粉腸、牛 黃喉、牛膀、牛骨髓、牛草肚、金錢肚、黑毛肚、黑柏葉、牛肝同牛腰,當然唔少得本地手切肥牛同安格斯Prime級牛小排啦~ 每個部位各有特色,要爽脆嘅爽脆、要軟腍嘅軟腍。撈埋辣辣湯底一齊食係幾過癮嘅。

另外,河海鮮都有唔少呀,想一片片咁食嘅就揀滑滑魚片啦,想一條條咁食嘅就要重慶耗兒魚,浸落辣辣湯底度淥佢兩分鐘,係幾有重慶風味嘅。

打邊爐又點少得淥丸吖。貢菜牛肉丸、貢菜豬肉丸等都係唔錯嘅選擇,喺丸內加入貢菜令口感更豐富。五色小籠包都係必吃之選,五款味道包括原味、麻辣、芝士、松露同蟹粉。

索湯類嘅8秒土豆片、麻辣炸響鈴等都有。一索晒啲椒真係夠晒辣!

最後必須要推介一下有款特飲,叫「紅糖繽紛冰粉」,啜落去係一條條滑嘟嘟嘅粉嚟,加埋紅糖落去成杯嘢就甜甜地咁啦,不過重點係……呢杯嘢,可以迅!速!解!辣!食到㷫烚烚,就嚟要噴火嗰陣,不妨飲返兩三啖,咁就可以繼續滾落去啦~ Yeah

BTW,成間舖嘅裝修都幾重重慶文化,天花板仲有啲寫住當地俚語嘅霓虹光管,如果喺指定時間用到標準重慶話讀出,仲會送個生啤塔畀你嗰枱添,6個人以上想要紅、白酒都得。唔識讀?放心,枱面張餐紙有教呀,練下先啦~ 

 
重慶洪鼎火鍋
地址:尖沙咀亞士厘道24-28號天星大廈地庫A舖 

文、相、片:Kar

關鍵字
尖沙咀
火鍋
麻辣火鍋
重慶
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
7天前
【2021生日優惠】持續更新!7月壽星半價嘆和牛燒肉套餐
2021-07-09
榴槤Buffet真的很興奮~ 九龍區酒店7、8月限定榴槤盛宴
2021-06-30
尖沙咀新開燒肉Omakase 專人燒日本A5和牛+特級寶盒鑽石肉
2021-06-28
投奔盛夏 7-8月份下午茶推介
2021-07-08