北京烤鴨店攻港 三吃片皮鴨配爆炸糖?
2017-10-10

北京填鴨、片皮鴨、烤鴨,總之都係鴨!來自北京嘅著名烤鴨店北京羲和雅苑烤鴨坊,於尖沙咀海港城開業喇!內地及新加坡有約40間分店,香港分店就位於座擁海景無敵海景嘅海運大廈,個景冇得輸,設有少量室外抖氣位,室內環境簡約有型,落地玻璃開揚舒服,設有三間貴賓房,不過用餐區就唔算好大,大約100個座位。


講返主角先!招牌羲和烤鴨($328/半套,$598/套) 選用北京養殖四十日、重五斤八兩至八斤嘅「四期鴨」,冰鮮來港,經過吹氣、上皮、冷凍、上色等多個步驟,好似專用風櫃足6小時,之後再放入磚爐即場烤製,至少兩日製作時間。呢個高溫紅外線磚爐都好犀利,同北京店一樣,由專人逐塊逐塊磚人手砌成,溫度高達200度,將鴨掛爐烤50至60分鐘至皮脆肉嫩。


所有出爐鴨都喺堂前即片,莊師傅師承集團烤鴨部主管徐照林。徐照林曾於北京烤鴨名店全聚德工作,係當地好出名嘅烤鴨大師,有「鴨王」之美譽。莊師傅先將鴨胸皮、鴨胸肉及鴨腿肉三個部位均勻切片,一隻鴨大約可以切到80至90片左右,放喺發熱盤上面保溫。


鴨胸皮鬆脆呈網狀,配藍莓醬同自家製爆炸糖同吃,食落完全唔覺油膩,爆炸糖本身只得甜味,口腔之中有霹靂啪嘞嘅口感,跳跳吓又幾新奇喎!而鴨胸肉配上有少少厚度嘅鴨皮,蘸以法國及德國芥末製成芥末醬,微酸唔搶味。鴨肉甘香帶鴨皮嘅油潤,個人最鍾意呢個部位。鴨腿肉就皮脆肉滑帶脂肪,就以傳統食法最佳,放喺上饃饃皮上,再加青瓜、京葱、紅洋葱、山楂條等配料,加啲百年老號六必居麵醬製成嘅甜麵醬,包住來食。


更多新店直擊:
1. 西環抵食泰式船麵小店 集百家大成秘製風味
2. 率先體驗貼心服務! 海底撈詳盡試食報告
3. 尖沙咀餐廳自製章魚小丸子 完美DIY教學


北京店招牌菜香港店都有,好似喺中國每日賣三千份嘅張氏獅子頭($48/位),為執行董事張鈞祖母嘅家傳做法。以饅頭、五花腩及醬油煮成,質感綿滑,似腍身嘅肉餅,配上一小口白飯,係一道家常又溫暖嘅菜式。每賣出一客,集團會捐出$1予慈善機構,相當有意義。

張氏獅子頭、蝦湯海皇泡飯


香港獨有嘅菜式包括以日本宮崎A3和牛製成嘅和牛粒干煸口蘑($218)、以陳醋、紅醋、鎮江醋及意大利黑醋加豆瓣醬製成嘅酥皮酸辣湯($78)、濃郁嘅蝦湯海皇泡飯($98/位)等。黃扒魚肚($188/位)以日本有機南瓜及本地南瓜加雞湯製成,加入25頭花膠公製作,厚肉滑溜。咁嘅格局又有海景睇,價錢唔算好貴,同屋企人食飯就啱晒!

黃扒魚肚、酥皮酸辣湯

肉末脆黃瓜 ($68)、羲和小肉餅 ($36)

和牛粒干煸口蘑、宮保大蝦球 $118

紅酒雪梨糯米藕 ($68)、芥末鴨掌 ($88)


北京羲和雅苑烤鴨坊

地址:尖沙咀廣東道17號海港城海運大廈2樓OTE203號舖



文、相、片:Perrins

關鍵字
北京填鴨
片皮鴨
烤鴨
海港城
中菜
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2019-09-27
尖沙咀新商場開幕 過江龍餐廳一覽
2019-09-20
日本人氣茶室登陸尖沙咀 招牌Tea Set、甜品推介(有片)
2019-09-25
【特約分享】茶記實測 西多、菠蘿油控必睇
2019-09-19
幾時都要打邊爐!火鍋控必試特色店!
2019-09-24