「家家食出前一丁」~ 細細個食到大，平時一係就屋企自己煮，一係就落茶記食，最近竟然同一間餐廳聯乘，喺灣仔開咗間概念店，仲創作咗一款新菜式——整到成個漢堡包咁！

餐牌選擇唔多，四選一，分別由棒丁麵同即食麻油麵所製。

赤豬骨棒丁麵用傳統日本醬油醃製豚肉，慢煮一個鐘，配埋日本大蔥、秋葵同溫泉蛋，精髓要加埋辣油。

味噌豬骨棒丁麵嘅味道同樣濃郁，以初榨橄欖油調味，再配用濃湯泡咗成5個鐘嘅水波蛋，內內外外都夠味得滯，另加午餐肉粒同XO醬撈麵，夠晒鹹  香。

兩款棒丁麵餐都會配玫瑰花瓣雪糕雞蛋仔，淋上楓糖同朱古力醬，令雞蛋仔更甜身。

蔥油一丁就係大蔥薑蓉麵底，加叉燒炒玻璃蛋喺面。

但講到創新，一定係呢款麻油一丁漢堡。底面「漢堡」都係麵餅嚟。出前一丁混入咗蛋同調味料後，就用高溫油炸成麵餅，中間夾火腿同芝士，淋上照燒醬同蛋黃醬，灑埋蔥花同木魚絲，大功告成。不過食呢嚿嘢都幾考功夫，用手拎住食？個口又唔夠大。用刀切？個麵餅又有啲硬……Any肥，麵餅脆脆der，有啲似冇落味精粉嘅媽咪麵感覺。

至於一丁套餐嘅甜品就係雪糕曲奇三文治，紅豆綠茶perfect match。

出前一丁x辦館LOF10 概念店
地址：銅鑼灣謝斐道535號 Tower 535 3樓302號舖

文、相：Kar