去餐廳食嘢，口罩擺喺邊好？放褲袋又怕跌，用紙巾夾住放枱面又怕整污糟？有餐廳特別自家設計同趕製口罩收納套，免費派發畀食客，好貼心呢~
圖﹕仙后餐廳Instagram官方專頁
右圖：ki918
軒仔一向有諗頭，仲出晒名高要求，由佢主理嘅法國菜餐廳出品嘅口罩收納套當然有保證啦，又靚又實用！餐廳為咗令食客食得更自在、安心，特別設計咗極有餐廳特色嘅口罩收納套，派畀每位食客（數量有限，送完即止）。墨綠色設計好高貴好優雅，一邊放啱啱除低嘅口罩，另一邊就可以放獨立包裝嘅新口罩，重用前記得要先消毒呀！
圖﹕譚仔三哥米線Facebook官方專頁、Candy choi1026
譚仔三哥表示為保護食客嘅珍貴口罩，準備咗10萬個口罩收納套，派發畀每位食客。咁就唔怕食米線嘅時候湯汁彈到落口罩上面啦！
圖﹕牛気Instagram官方專頁
呢間日式涮涮鍋餐廳同樣好貼心咁派發口罩收納套（仲送消毒搓手液添），食飯前消毒雙手，再小心咁將口罩放入口罩收納套，咁就夠晒衛生啦！
文﹕Kiko
編：Kar