嘩嘩嘩～甜品控mark實喇！元朗近月開咗間甜品小食店，供應台式飲品、梳乎厘、小食同甜品4大系列，而引起區內街坊熱議嘅就係IG-able瀑布梳乎厘！梳乎厘有9款口味，以台、日風味為主，吸引唔少人去當做飯後甜品㗎。

圖：店舖(IG)

梳乎厘一份有兩層，店家特別介紹嘅黑糖珍珠梳乎厘，鋪滿香滑Q彈嘅珍珠，淋醬多到睇唔到梳乎厘真身，絕對係螞蟻人最愛嘅分量～而芋泥波波梳乎厘配上粉色淋醬同晶瑩剔透嘅「波波」，少女心爆燈，打卡一流！另外芝芝楊枝甘露梳乎厘、趣多多巧克力梳乎厘等口味都好啱甜品控。

圖：店舖(IG)

夏天甜品點少得透心涼嘅冰品，呢度就有雪花冰系列，每款冰都有相應口味嘅配料，好似抹茶雪花冰會配小熊形狀青提乳塊、抹茶朱古力百力滋；朱古力雪花冰就配小鴨形狀朱古力乳酪塊、朱古力百力滋等，足料又有心思。

圖：店舖(IG)

如果鍾意鹹香小食或熱食，滕椒小酥肉炸得幾香口，仲可以配飲品杯邊行邊飲飲食食，好似楊枝甘露就啱晒夏日feel喇～另外手工紫菜肉燕(湯)、原味煉乳芝士條、香脆榴槤角都好啱外賣返屋企或掃街時食。不過要留意有網民表示老闆話5點開門營業，但5:45登門仍然未開舖，時間似乎未係好穩定啊～

圖：店舖(IG)

喜樂
地址: 元朗鳳攸北街11-15號益發大厦地下1號舖

文：Cathy