元朗新開四川麻辣燙 必試$6牛柏葉滷豬耳
2018-02-21

開飯仔聽過不少元朗友推介巴打火鍋館,話麻辣火鍋夠辛辣。見到咁多鍾意麻辣嘅客人,火鍋店就喺區內開多間主打麻辣燙嘅小店。

開張約三星期嘅巴打麻辣燙,提供60幾款配料及粉麵,包括:滷水豬耳、豬肚、雞髀肉、滷豬大腸、牛柏葉、水魷魚、支竹、鵪春蛋、皇帝菜、唐生菜、芝士腸等等,選擇都幾多,有時仲新增季節限定嘅配料架!

粉麵方面有米粉、米線、烏冬、出前一丁、薯粉、粉絲及伊麵,開飯仔推介菠菜麵,青BB嘅粗身麵條,都幾eye-catching。

客人先拎個盤子及夾子,自行揀選好心水配料或粉麵之後就畀錢,然後舖頭就開始煮食物,客人坐定定等食就OK!

店員會分別將粉麵、配料煮熟,然後倒入碗中,再加入香濃帶甜嘅豬骨湯底及其他配料。

大大煲嘅豬骨湯底係由師傅每日用10幾斤豬骨、豬筒骨、豆蔻、薑,前後熬煮超過6個鐘頭而成。

上枱前,店員會再加入麻辣醬、酸豆角及芽菜。

師傅將青花椒、紅花椒、辣椒、八角、桂皮及其他香料炒香,再加水熬煮成麻辣醬待用,然後再按客人揀選嘅辣度加入麻辣燙之中。

完成,食得!話明自助麻辣燙,所以呢度無限制你選擇幾多,好似開飯仔咁就揀咗4-5款配料喇!


更多【新店直擊】:
1. 元朗新開!平食高質花膠撈麵花膠燉翅
2. 日賣過千杯!冠軍茶王親自主理奶茶蛋治
3. 將軍澳火鍋新場!$200有找 任食靚牛海鮮花膠連60幾款配料


開飯仔只係揀咗小辣,但一上枱就已經聞到陣陣嘅花椒麻香。呷一小口試味,湯底好濃郁。辣,但唔會辣得眼水直飆咁唔舒服。夾埋味道強烈嘅蒜蓉一齊飲更覺惹味。

推介店子兩大人氣配料:(左)豬耳、(右)牛柏葉,兩者同樣都好清爽脆口之餘又夠吸湯,食完有種「火般灼熱」嘅溫熱感,爽!

(左)水魷口感滑溜,味道鮮美,同麻辣湯都幾夾;(右)滑牛肉亦係吸湯之選,一邊咀嚼一邊有陣陣辣味滲出,增添少許嚼頭!

至於青BB菠菜麵,雖然麵條比較粗身,但食落比想像中更掛湯,辣味幾濃,而且口感好似烏冬咁滑溜,食落幾yummy。

太辣嘅話,可以柯打店子特飲,有(左)檸檬柚子蜜、青檸梳打及(右)杞子桂花蜜,解渴之餘又可以解辣,舒服晒。

味道方面咁強烈,但舖頭卻走木系自然風。除咗用木系傢俬之外,兩邊牆身仲有一大片草皮,最啱影相。

而家店子做緊3樣試業優惠,全場所有配料$6/串、粉麵$10/份,以及特飲半價優惠,仲不設最低消費添!店子負責人更透露,嚟緊會喺天水圍會再開分店,天水圍友要留意下喇!

巴打麻辣燙
地址:元朗鳳悠南街9號好順利大廈地下


文:Joy

關鍵字
麻辣燙
四片
麻辣
元朗
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2019-09-27
尖沙咀新商場開幕 過江龍餐廳一覽
2019-09-20
日本人氣茶室登陸尖沙咀 招牌Tea Set、甜品推介(有片)
2019-09-25
【特約分享】茶記實測 西多、菠蘿油控必睇
2019-09-19
幾時都要打邊爐!火鍋控必試特色店!
2019-09-24