將軍澳火鍋新場!$200有找 任食靚牛海鮮花膠連60幾款配料
2018-02-14

火鍋精留意,又有新開火鍋店上場啦!呢間開喺將軍澳屋邨商場內嘅火鍋新店,以任食靚牛、海鮮兼花膠做主打,聽落就吸引嘞,湯底、味道、賣相又點先!放心放心,快睇開飯仔詳細試食報告先!

任食火鍋設4款放題選擇,由最平$158嘅極上牛肉放題以至$398嘅澳洲穀飼和牛‧海鮮‧花膠放題。每款放題均限時120分鐘,可任食自助區嘅火鍋配料,以及任飲各款無酒精飲品。


湯底方面有12款選擇,有經典雞煲、椰子雞湯、壽喜燒湯鍋等創新湯底,不過開飯仔推介每日限量供應嘅香辣烤魚鍋,食完原條烤魚後再打邊爐,不需另外加錢,絕對係回本選擇!怕辣之人可改選酸菜烤魚鍋。


香辣烤魚鍋內有原條花鱸魚、豬紅、薯條、大豆芽、蘿蔔、紅薯粉、燈籠椒、辣椒等,非常豐富。


湯汁係由師傅以辣椒、金銀椒、香葉、八角、胡椒粒、桂皮等材料自家調配而成,好有四川香辣風味,相當強勁。


花鱸魚本身無乜細碎魚骨,加上口感滑溜又夠鮮甜,同辛辣湯底好夾。


椰子雞鍋亦係抵食之選,以三黃雞、椰子、椰子水做成。


上枱仲跟送一碟配料,有辣椒、青檸桔及沙薑,用嚟配雞肉味道更佳。


椰子水滾起後就可拎起雞件,雞肉煮得太耐會變得過韌。雞肉吸咗椰子水,帶少少微甜,口感亦夠嫩滑。


椰子水甜度適中,都幾清甜。而椰子亦好爽口,煮得越耐,椰子味更濃郁。


如果你係牛魔王,不妨柯打味道偏甜嘅壽喜燒湯鍋,以日本醬油、味醂調成湯底較為濃稠,與牛肉好夾。


將雞蛋打落碗中並拌勻,形成蛋漿。



更多【新店直擊】:
1. 黃埔新開酒店級質素西餐廳 自家製手工菜式值一 試
2. 銅鑼灣白色型格茶屋 嘆清新果茶+冰滴茶
3. 回憶中嘅豉油西餐!近半世紀扒房荔枝角新店登場(有片)


各款牛肉,最好味嘅當然係(左)皇牌澳州穀飼和牛,牛味濃,而且不太油膩;(右)而純種美國安格斯雪花牛油花較多,食落爽口啲!另有澳洲安格斯嘅極品牛肉及美國極上牛肉。


(左)金錢腱來自牛隻嘅小腿,活動較多所以肉質較有嚼頭,脂肪亦不多;(右)牛黃喉口感好似牛柏葉,又爽又脆,但淥嘅時候要留意,煮大約1分鐘就食得,煮太耐會變過韌。


沾蛋漿嘅牛肉,口感更滑溜,仲充滿蛋香添!


至於任食嘅花膠絕非普通平嘢,餐廳嚴選土耳其花膠,大塊而爽口,口感一流。


火鍋滾起就食得,味道軟腍而爽口,而且不太黐牙,膠質都幾重,為一必食回本item!


餐廳有寬敞自助區,客人可揀選心水調味料、沙律、飲品及60幾款火鍋配料,包括:灌湯包、水餃、芝士丸、蟹籽丸、烏冬、韓式公仔麵、龍蝦丸、午餐肉、油麥菜、西洋菜、皇帝菜等。另有糯米糍、士多啤梨雪糕、雪條做甜品。調味料方面,有蔥花、指天椒碎、蒜茸、芫茜、炸蒜茸及沙嗲醬。


呢個有黑色條紋嘅墨汁花枝丸,味道雖然同一般花枝丸差不多,但賣相特別。響鈴都幾有口感,值得一試。


沙律菜只得一款,但有千島沙律醬、胡麻醬、陳醋等醬料,仲有粟米、車厘菇配料添,食落都幾fresh!


飲品都有10幾款選擇,另加$18可飲其他酒精飲品。


惠顧牛魔王‧海鮮‧花膠放題以及澳洲穀飼和牛‧海鮮‧花膠放題嘅話,每位客人仲額外有一客鮑汁花膠伴花菇。新年期間,每位客人都會有架!


餐廳朝早會供應點心,如蝦餃、粉果、奶黃色等等,到下午五點半左右就會轉為供應火鍋。

價錢:
極上牛肉放題 成人$158/位、長者及小童$128/位
極品牛肉‧海鮮‧花膠放題 成人$198/位、長者及小童$138/位
牛魔王‧海鮮‧花膠放題 成人$248/位、長者及小童$218/位
澳洲穀飼和牛‧海鮮‧花膠放題 成人$398/位、長者及小童$348/位


茶煲
地址: 將軍澳寶琳北路18號寶林商場3樓1C號舖


文:Joy

關鍵字
火鍋
打邊爐
將軍澳
任食
放題
安格斯
澳洲穀飼和牛
花膠
海鮮
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
7天前
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【特約分享】超抵外賣陪你抗疫 即睇將軍澳飲食地圖!
2020-03-10
【隨時更新】最後倒數!即將結業的老字號及人氣小店
2天前
2月份好評餐廳十強
2020-03-05