元朗人氣雞蛋仔進駐尖咀 新店限定獨角獸心形雞蛋仔+4款新口味(有片)
2019-02-15

由台北開返嚟香港嘅元朗人氣雞蛋仔店,最近衝入九龍,去咗尖沙咀開分店呀。除咗有幾款新口味雞蛋仔外,啲雞蛋仔仲變晒做心心添呀,打卡一流。唔得喇,我對眼都要變做心心眼喇!

新店開咗個零兩個禮拜,細細間舖,一個唔小心睇漏眼就好易行過miss咗。新店主打嘅係呢間店先有嘅獨角獸派對!雞蛋仔夾住澳洲牛奶或伯爵奶茶味嘅雪糕,再加上棉花糖、造型翻糖、士多啤梨同彩色糖珠之後,就真係成隻獨角獸咁嘅樣,又好睇又好食,少女心都要被激發啦~

摩擦力強嘅朋友仔應該一眼就發現到,啲雞蛋仔全部都係心形呀!單係造型上已經輕易俘虜女生們嘅心。仲要加多幾款創新口味添,首推台灣紫薯雞蛋仔!真係用紫薯製作,粒粒雞蛋仔入面都有香甜嘅紫薯蓉,食完好滿足。

花生醬控就唔好錯過花心雞蛋仔喇!平時格仔餅先有花生醬㗎嘛,而家連雞蛋仔都有,仲要用上粗粒花生醬製作,每粒都外脆內軟,啖啖香口好鬼好食。以後要喺格仔餅同雞蛋仔中間二選一,難度又再升咗lvl咯。

另外仲有兩款新口味即將登場,開飯仔就率先同大家試埋先~ 兩款都係鹹食口味嚟,分別係Mac & Cheese同埋金寶粟米湯味,哈哈,諗唔到呀呢?未食之前都真係唔太想像到係咩味。鹹嘅雞蛋仔會係點?

答案係都好夾㗎,有少少似食緊手抓餅嘅感覺咁,不過口感就更軟熟。由於店主製作時真係逐格逐格放入材料,所以保證粒粒雞蛋仔都會食到芝士通粉或者栗米忌廉啊,鹹鹹香香咁幾過癮,唔太大食嘅話其實食完一底都已經有飽嘅感覺。


The Waffle Club
地址:尖沙咀金馬倫道 14B號地下

文、相、片:Kar


關鍵字
尖沙咀
小食
掃街
雞蛋仔
紫薯
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
迎接全新2020 1-2月下午茶推介
2020-01-06
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
2020-01-13