傳統餅店開茶室 陽台雅座歎茶食懷舊餐點 (有片)
2017-11-22


一間茶室有明蝦多士、雪糕紅豆冰、豬扒飯等等食,一啲都唔出奇,不過呢間茶室特別在於,佢係由一間傳統餅店開出嚟㗎!年初嗰陣咪同大家介紹過,灣仔有幢歷史悠久嘅建築物,化身成為傳統餅店嘅旗艦店嘅,不過當時只係得地下嗰層餅店,但而家多埋樓上同樓樓上,一層做茶室,一層做烘焙工作坊,又有得食,又有得玩。

傳統餅店茶室嘅嘢食都幾傳統,例如明蝦多士咁,而家唔算多地方有做呀,呢度仲要係原隻海蝦咁放上脆口嘅炸多士上,係懷舊嘅味道呀。

有得蝦多士,當然都有西多士。九星連珠西多士已經切好晒九粒,每粒上面都有一粒仔牛油,一啖一嚿,蛋味都幾香。

至於叉燒包,就進化成烤洋蔥叉燒餐包,麵包軟熟,叉燒汁香,連埋洋蔥一齊食感覺又唔會太dry。

對於正餐一定要有飯到肚嘅朋友仔,可以試無骨海南雞飯或者焗叫化豬扒飯。前者用秘製白鹵水每日新鮮浸over一個鐘,再去埋骨方便進食,每日限量供應㗎;後者就用懷舊嘅菜缽盛載,撈埋蕃茄汁都幾甜。

飯後通常都要有甜品,鮮果雪糕窩夫就咁睇同坊間嘅冇乜分別,但食落就發現,蛋香濃郁嘅窩夫仲暗藏青檸嘅味道,幾refreshing,同埋感覺冇咁膩。但四格香蕉、藍莓、芒果同雪糕你都咪話唔飽。

茶室當然有茶,薑蜜蘋果龍井清新香甜、焦糖奶沬抹茶嘅焦糖味比較突出,甜魔首選。

亦有經典特飲,無論細路定大細路都鍾意嘅雪糕紅豆冰,凍天都係要飲。

而二樓嘅工作坊,會定期開辦各種嘅港式餅食課程,例如老婆餅呀、雞尾包呀、菠蘿包呀等等,嚟緊月尾仲會推出秋冬限定嘅臘腸卷班。親子班就會教下唧花曲奇之類較為簡單啲嘅餅食。



奇華茶室
地址:香港灣仔皇后大道東188號1樓


文、相:Kar


關鍵字
灣仔
甜品
窩夫
茶室
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
4天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
2020-10-19
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12