備長炭燒鳥專門店 多款雞肉/內臟串燒 銅鑼灣新開日式居酒屋
2021-05-26

坊間有唔少串燒專門店,主打烤鳥又真係用炭燒嘅其實唔多,銅鑼灣最近就新開一間日式居酒屋,挑選本地三黃雞同嘉美雞,供應唔同部位雞肉同內臟串燒,而且用備長炭以高溫炭燒鎖住食材水分,高質得嚟價錢又合理!
 


炭火地雞位於銅鑼灣登龍街,特別選用日本備長炭即點即燒,皆因燒嘅時候可以去到700度高溫,火候平均而且耐燒,最特別嘅就係燒出嚟嘅串燒有種獨特嘅炭烤香味,係電爐或者其他燒烤方法做唔到嘅。
 


叫得燒鳥專門店當然係主打雞肉串燒,以本地新鮮三黃雞同嘉美雞為主,前者肥美有油香,後者肉嫩有雞味。串燒會放喺呢個方碟,而碟上有柚子胡椒、一味唐辛子粉、日本黃芥末、檸檬同青檸畀客人按喜好自己添加調味。
 


雞心元($39)

雞心元即係雞心上面嘅血管,肉質爽口滑嫩,本身就無乜內臟腥味,師傅又特別加埋蔥一齊燒嚟辟腥,平時怕食內臟嘅朋友都可以試下。
 


雞皮($34)

雞皮加咗自家調配醬汁增加甜味,仲襯托出雞油脂香。食落兼具香脆同爽口,一啲都唔油膩!
 


(左)雞腿($39)、(右)雞軟骨($34)

雞腿肉燒至外皮香脆,肉厚彈牙,食得出師傅火候掌握得好,先可以Keep住肉汁。雞軟骨一聞就聞到好重雞油香,口感爽脆有咬口。
 


(左)雞頸($36)、(右)雞肝($39)

雞頸肉質爽口,彈牙之餘又唔韌。雞肝口感軟棉Creamy,香氣濃郁。
 


(左)雞腎($34)、(右)雞心($39)

雞腎非常鮮嫩爽脆,有肉汁而且完全唔腥。雞心肉質比較結實,配搭蔥花辟味易入口。
 


(左)厚燒和牛崩沙腩($88)、(右)牛舌($66)

雞肉之外亦有燒牛肉同豚肉,厚燒和牛崩沙腩係汁燒,自家製醬汁濃郁香甜,可以增加炭燒香味,同時唔會蓋過和牛香氣。崩沙腩肉質爽滑,加上燒過嘅洋蔥食落好滿足。厚切牛舌就夠晒爽口軟嫩,簡單調味就可以帶起肉香。
 


炭燒鱔玉子丼($128)

用新鮮白鱔配搭自家醬汁做炭燒,味道香甜帶淡淡炭香,肉厚肥美。建議食飯係連埋日本生雞蛋、紫菜等配料一齊撈勻食,鮮味十足。配埋碗濃香雞湯,係餐廳每日用雞殼等材料熬製而成,味道清甜帶少少鹹香。
 

更多【新店直擊】:
1. 啤迷新場!堅尼地城新開 餐廳x釀酒廠 啤酒汁沙律 + 啤酒骨髓批
2. 中環點心茶館重現港式優雅茶藝文化 前富豪飯堂老師傅主理 招牌菜韭菜炸蟹盒
3. 必食自家製Pizza+麻糬鬆餅 尖沙咀新開4,000呎木系Cafe

 

甘口唐揚炸雞翼($48)

炭燒菜式之外,呢個甘口唐揚炸雞翼都係必點!用新鮮雞全翼炸至金黃香脆後再浸秘製醬汁。估唔到炸皮Keep到香脆口感,同時又食到醬汁甜甜哋又鹹鹹哋嘅味道,加上嫩滑嘅雞肉,夠晒惹味送酒一流。
 



煙燻雞火腿他他($88)

由日本真空直送可生食嘅雞火腿,配搭生蛋黃、蘿蔔苗、子薑絲等,蛋黃可以令肉質柔軟雞火腿嘅食落更滑溜,其他配料就係增添辛辣味道。食法係撈勻之後用紫菜包嚟食,感覺幾特別。
 


雞肝醬($88)

用新鮮雞肝加香草製作軟綿柔滑嘅雞肝醬,再喺表面撒上花生碎增加咬口。搽喺法包上面食落有好濃嘅雞肝味,仲有花生香,而且同樣一啲都無血腥味。
 


薯仔沙律($68)

亮點在於上面嘅溏心蛋,濃稠嘅蛋黃撈埋沙律一齊食,味道更香濃。而且食到蟹籽一粒粒嘅咬口。
 


餐廳亦有供應多款日本清酒






炭火地雞
地址:銅鑼灣登龍街28號永光中心25樓




文、相:Cathy

關鍵字
銅鑼灣
炭燒
串燒
燒鳥
居酒屋
炭火地雞
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
4天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
6天前
投奔盛夏 7-8月份下午茶推介
2021-07-08
6月份好評餐廳十強
2021-07-06