九龍城麻甩味食店推介
2016-11-23
講起九龍城大家可能只會有「好多泰國餐廳」呢個既定印象,其實九龍城都仲有好多食其他菜式嘅小店,而且佢地都有一個共同點:唔單止有街坊feel,甚至仲有少少麻甩味!唔信?以下餐廳幾乎全部都係情侶約會止步(除非你地已經去到「浪漫?咩嚟㗎食得㗎?」嘅地步啦...),但同學朋友死黨兄弟手足姐妹一齊去就啱哂啦!

Lv.0 跌落小店的天使  小方糖甜品


(Photos by Duckduckchic & WinG!)

先由最無麻甩味嘅甜品店開始介紹,係九龍城眾多泰國菜同中式甜品舖當中,西式甜品店就自然好似黑夜中嘅螢火蟲一樣咁鮮明,咁出眾。當然能夠站穩陣腳,得到附近唔少大學生支持嘅原因係質素有保證。芒果拿破崙嘅即焗酥皮鬆脆,芒果肉同芒果汁亦相當清甜。鐘意食榴蓮嘅可以試留戀天使,啖啖香滑榴蓮肉搭小丸子,無得輸。

Lv.1 無敵爆汁牛肉餅  清真牛肉館


(Photos by cynthiaaameow & hkkodomo)

放心,雖然係清真小館,但店員大部分都係香港人,本住想食好西嘅心態入店就得。最出名嘅肯肯定係幾乎每枱都有一碟嘅牛肉餅,皮脆而且一咬就爆汁!牛肉亦有鮮味而唔太鹹,夠抵食,難怪唔少街坊都對呢度嘅牛肉餅百吃不厭。另外咖喱羊腩同牛肉水餃亦係食家推介。

Lv.2 媲美名店炒滑蛋  聯發茶餐廳


(Photos by Happinessbb & catcatgogogo)

嚟到聯發茶餐廳,無論係早餐、特餐、茶餐定快餐,都一定要揀炒蛋而唔係煎雙蛋,因為有唔少食家話呢度嘅炒蛋嫩滑程度可以媲美澳牛!其實呢間茶記係由澳牛第三代帶住秘方自己出嚟開嘅。帶半熟蛋汁滑一滑嘅炒蛋,加外微脆內軟綿嘅牛油多士,諗起都流到成地濕哂...我指啲口水啫。不過亦有人話呢度嘅炒蛋喺蛋香方面稍微欠奉,愛蛋人士要注意啦。

Lv.3 車仔式潮州糖水  潮州合成甜品


(Photos by Rhineats & HappyPolly)

糖水舖都有麻甩味?少少咁啦,呢度有幾十年歷史,只賣傳統潮州糖水。不過得意嘅地方就係好似車仔麵咁可以搭配材料,而且非常足料,胃口細嘅朋友仔當飯食都得!想試潮州風味嘅可以嗌蓮子清心丸杮餅糖水,蓮子夠鬆化,清心丸爽口而杮餅就夠清甜滋潤。另外馬蹄沙同綠豆爽亦可以一試。雖然話自己糖水自己揀,不過如果唔想合成糖水之後覺得中伏嘅話,落單之前都係問下店員意見啦。

Lv.4 熟食中心之地踎樂園  樂園


(Photos by Kantabo & hm_wong)

講到九龍城不得不提熟食中心裡面嘅樂園,名物之一係沙嗲牛肉西多士,炸到金黃香脆嘅多士夾住唔加鬆肉粉嘅沙嗲牛肉,第一次食未必會習慣,但慢慢習慣後反而會懷念呢種奇異但和諧嘅組合!第二項名物係紅豆冰,可以揀普通、奶茶、咖啡同鴛鴦底,紅豆粒粒飽滿而且起沙,超加分。另外雪菜肉絲炒米粉係食家蔡瀾推介,不過樂園星期日唔開,星期六同公眾假期兩點截單,跨區嘅朋友想試就要早起啦。

Lv.5 霸氣原隻西瓜汁  街頭霸王小食


(Photos by ManChun18)

麻甩嘅重點係唔怕比人知自己麻甩嘅嗰種霸氣(好似係),而同樣有霸氣嘅包括新開嘅呢間小食店裡面嘅原隻搞搞震西瓜汁,真係原隻迷你西瓜奉上,捧住掃街最霸氣!另外仲可以試下呢度嘅炸餃子,三款口味金菇肥牛、芝士比薩豬肉同印度咖哩都係每日新鮮包,即叫即炸,各有唔少捧場客。

Lv.6 我喜歡堅持  地茂館甜品


(Photos by Crystal_koo & miss.mo)

又係糖水舖?比開飯仔我介紹埋呢間咁大把。呢間地茂館今年二十六歲,以人嚟比喻嘅話就準備踏入壯年,咁啱小店最近亦交由第二代接手,裝修過後別有一番新氣息。當而家唔少甜品店都跟潮流賣芝士撻或者特別雞蛋仔嘅時候,呢度依然堅持做傳統中式糖水。其實唔少糖水都非常花功夫,例如芝麻糊要以人手炒香芝麻,合桃露要每日鮮磨唔好比香味流失,單係呢份堅持就值得鼓勵。

Lv.7 細細個就聽過佢個名啦  義香荳腐食品


(Photos by hung_united & dercch)

唔少小店可能都面對緊香港常見嘅土地問題,幸而九龍城仲有唔少老字號繼續撐住,超過五十年歷史嘅義香就係其中一間。舖頭細細,無冷氣之餘人多要搭枱。但豆腐花夠平,堂食都只係$8碗,熱辣辣又夠滑,唯獨有少少可惜嘅係豆香無之前咁重。三寶亦係必食之一,想煎亦得炸亦得,得咗!溫馨提示,有唔少街坊曾經喺呢度附近野生捕獲發哥周潤發,下次嚟試嘅話不妨留意下!

Lv.8 宵夜惹味串燒首選  金泰沙冰


(Photos by foodsearchers & 為食熊貓佳)

雖然好想忍住唔介紹泰國菜,但講到麻甩點可以漏咗串燒店呢?呢間金泰沙冰好似《國產凌凌漆》嗰啲表面上係鬚刨實際上係風筒嘅道具,因為個名十足十似飲品店,但其實佢無沙冰亦無特飲賣,取而代之嘅係香噴噴嘅泰式串燒。老實講啲肉無乜非常特別之處,但醃得入味,加埋個越食越辣越惹味泰式辣汁就不得了!買返屋企一手串燒一手啤酒,完全爽歪歪。

Lv.9 不想說的秘密  馬仔粉麵


(Photos by Yanomich)

每次介紹好嘅食店,特別係小店嘅時候都非常掙扎,因為多咗人知嘅話下次去可能就要等更耐。不過隱藏喺熟食中心嘅呢間馬仔的確跑出,無辦法之下唯有不藏私大公開啦!無錯呢間係粉麵店,但佢最馳名嘅係晚市打邊爐嘅沙嗲湯底!沙嗲湯底幾乎係所有火鍋店都有,但馬仔嘅沙嗲湯底特別香濃而且有花生甜香,惹味但唔太辣,平時唔食辣嘅朋友亦可以試下。喺街市樓上開,配料自然亦相當新鮮,本地牛肉、鵝腸、墨魚丸同鯇魚腩都係推介。既然公開得順便講多句,馬仔附近有間食泰菜嘅,貪心嘅朋友可以喺嗰間店嗌埋嘢飲同小食,實行一次過滿足兩個願望,最後分開結賬就OK。

隨時接收最新資訊
讚好OpenRice專頁!


關鍵字
九龍城
牛肉餅
炒蛋
西多士
串燒
沙嗲
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
元朗「泰」滋味 5間特色泰國菜館
2017-04-13
再戰東大街 有咩小店值得食?
2017-04-19
將天草漁市場搬過嚟!銅鑼灣新店Lunch Set有驚喜(有片)
2017-04-24
【新店直擊】青洲灶記咖啡氹仔新登場!
2016-08-09
【當時得令】三盞燈周邊的茶記隱世美食
2016-11-17
泰國名氣宮廷菜抵港 超軟滑三重芝士榴槤撻
2017-03-29
餐廳資料
更多
收起
本月熱門
【2022生日優惠】持續更新!8月壽星嘆免費生日蛋糕+串燒放題優惠
2022-07-29
【隨時更新】零食速報 每周新款零食、酒品點評
2天前
【隨時更新】最後倒數!2022即將結業嘅人氣餐廳
2022-07-13
尖沙咀最新露營主題日式燒肉店!3700呎室內Glamping體驗
2022-07-25
一年一度!全港4大榴槤放題/自助餐集合
2022-07-13