中環新開西班牙餐館 香濃肉眼扒+blue cheese蛋糕
2020-03-24

牛魔王對牛肉有一定嘅追求,中環新開咗間西班牙餐館,推崇西班牙獨特嘅放養牛隻方法,同埋注重保留牛肉嘅原有味道,相信可以滿足到挑剔嘅牛魔王。

呢間餐廳分上下兩層,下層係酒吧、小食區,上層則為主要用餐區域。首先同大家介紹主角。西班牙人到底係點養牛牛嘅呢?原來佢哋每隻牛牛都會有自己嘅名,而Rubia就係最常用嘅牛牛名之一,農夫仲會同佢哋一齊喺北部加利西亞嘅山上生活一段時間先至賣出。

 加利西亞牛柳

 無骨肉眼扒

餐廳為咗保留牛肉原有嘅味道,只係加入咗水晶鹽去調味,仲會分別將牛扒煎製同放喺室溫環境中降溫兩次,令到西班牙牛肉獨有嘅肉味更加濃郁。250g嘅無骨肉眼扒肉味香濃,200g嘅牛柳肉質亦鮮嫩,建議煮至4成熟左右,肉色仲係粉嫩嘅口感就最perfect。配菜都好豐富㗎,包括每日新鮮即製嘅特級初榨橄欖油及原粒香蒜油炸薯條、生菜沙律同辣辣der紅椒。

 吞拿魚他他

 時令蕃茄沙律配煙燻沙甸魚

西班牙餐廳點少得tapas小食呢?推介好fresh嘅吞拿魚他他,同埋時令蕃茄沙律配煙燻沙甸魚,前者上層係片片軟滑嘅吞拿魚刺身,下層係牛油果,夾埋一齊食又幾match,再夾埋脆多士又再多個層次;後者特地選用澳洲蕃茄,超大個,加埋松子仁、黑醋等配料,酸甜有致。

西班牙流心蛋配辣肉腸(Broken Eggs)西班牙經典小食,望落簡單,就鮮製薯條上放咗隻蛋同啲辣肉腸,即場撈勻之後,薯條沾滿蛋漿又幾香。

 暖芝士餡餅配威士忌雪糕

 焗熱朱古力蛋糕配蜜餞橙皮、焦糖榛子及朱古力荳蔻雪糕

甜品係點都要留肚食嘅,特別係芝士控。暖芝士餡餅配威士忌雪糕,個cheesecake係用咗藍芝士去整,唔怪得一食落去就超重味,鹹鹹香香,而雪糕上仲插有支威士忌管,想將威士忌唧落蛋糕度又得,唧落雪糕度都得,不過呢道口味辛香濃烈嘅甜品,未必人人受到。推介多個焗熱朱古力蛋糕配蜜餞橙皮、焦糖榛子及朱古力荳蔻雪糕畀大家,呢個甜度適中,口感鬆軟,應該大人細路都啱食。

 Sherry Tonic(左)、Americano(右)

酒精飲品方面,紅白酒、啤酒、香檳一應俱全,但要特別介紹下佢哋嘅cocktails,花咗唔少心機,將多款經典雞尾酒加入西班牙食材元素,重新演譯。例如Sherry Tonic就係gin tonic嘅變奏,用上dry sherry,感覺更加refreshing,仲有兩粒酸酸地嘅青蘋果配搭。而Americano則用上西班牙嘅vermouth混製,順滑得嚟又算幾易入口。未實施禁酒令前,而家暫時仲有happy hour優惠,晏晝3-7點精選飲品買一送一,6-7點食晚飯嘅話可以半價嘆西班牙紅白酒。



RUBIA
地址:中環荷李活道35-37號泉威中心UG樓-1樓

文:Kar
相、片:Tom Li

關鍵字
中環
牛扒
西班牙菜
酒吧
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
5天前
【特約分享】超抵外賣陪你抗疫 即睇將軍澳飲食地圖!
2020-03-10
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【隨時更新】最後倒數!即將結業的老字號及人氣小店
1天前
2月份好評餐廳十強
2020-03-05