又到聖誕，大家又要諗下買乜嘢嚟交換禮物或者送禮啦，尤其是今年未必可以約埋出嚟相聚慶祝嘅，送份禮物更見心意。不過送咩又幾難揀嘅~ 咁不如送啲食得嘅更加實際，我哋搜羅咗幾款食得又睇得嘅聖誕禮盒畀大家拎下靈感！不過今年玩還玩，都要注意個人衛生同埋社交距離啊～

期間限定Sanrio雪糕杯  Häagen-Dazs

聖誕除咗送朱古力，送雪糕畀朋友一樣咁開心，仲要Häagen-Dazs今年聯乘 Sanrio推出3款可愛嘅雪糕杯，分別有布甸狗、My Melody同Hello Kitty，呢三款立體造型嘅杯仔，好鬼可愛，打開仲有杯雪糕添。食完隻杯都可以循環再用。

復古法式禮盒 Junon

軒仔嘅仙后餐廳出晒名充滿懷舊西方風情，最近推出嘅三款禮盒都唔例外，款款都好復古，其中Premium Hamper仲特別加入客製化嘅紀念香檳，大家可以喺酒樽上刻名，送畀朋友就更加特別。另外，禮盒仲可以按個人喜好自行組合，仙后自家製美點、西班牙黑毛豬火腿、法國鵝肝醬、園藝草莓果醬等嘅美食全部都可以揀，其中正宗法式蝴蝶酥、朱古力法式杏仁蛋白糖等都係今年嘅新品。

特級朱古力禮盒 Godiva

相信Godiva係唔少人平時都會用嚟送禮嘅牌子，佢哋嘅朱古力用比利時工藝製作，用料講究，送禮當然得體。今年聖誕節，佢哋都推出咗多款唔同style嘅聖誕禮盒同埋套裝，將焦糖、胡桃同紅莓等聖誕食材同朱古力融合，仲有經典聖誕老人、雪人同企鵝造型嘅朱古力，靚得嚟又cute。

北歐拉脫維亞雪糕 Ekselence

呢個牌子嘅雪糕係100%北歐製造，最近佢哋趁聖誕節都推出咗節日禮盒，禮盒內容好豐富，裡面有雪糕批、雪糕杯、雪條同埋芝士棒等。而「Ekselence尊貴節日禮盒」仲包含咗兩盒低糖低脂雪糕或雪葩，啱晒同又驚肥又想食雪糕嘅朋友仔一齊分享啦～

零食倒數月曆 Sugarfina

聖誕節梗係唔少得聖誕糖果啦，例如戴住頸巾嘅白色小熊曲奇餅、馴鹿爆炸糖脆心朱古力等，呢個品牌出咗好多造型可愛嘅節日限定糖果呀。仲有不得不提佢哋嘅聖誕倒數月曆，每日拆開一盒，每日都有快樂力量，送畀另一半或者小朋友就實氹到佢哋開心啦！

Sanrio聖誕禮盒 奇華餅家

你哋身邊有冇朋友係Sanrio粉絲？奇華今年同Sanrio男團HAPIDANBUI合作推出咗呢個聖誕禮盒套裝，有隔熱手套同埋圍裙，好鬼靚，就算唔落開廚嘅都想著一著入廚房。另外，DIY聖誕曲奇禮盒有朱古力同薑味曲奇之外，仲附有朱古力筆畀大家可以發揮自己嘅小宇宙，畫靚靚塊曲奇呢。

茶控之選  Tea WG

今年大家都辛苦，飲啖茶養生得嚟又可以放鬆，送茶都係唔錯嘅選擇啊。Tea WG推出嘅聖誕茗茶禮物套裝，除咗有多款啱晒聖誕節飲嘅茶品，如融合咗黑茶、香料、水果同幼滑巧克力味道嘅聖誕歡樂黑茶迷你茶罐，仲有精美茶具配件。另外亦推出節日限定嘅華麗聖誕之茶，帶果香嘅黑茶香氣好濃郁，啱晒聖誕節呢個溫馨嘅節日！
 

香港製造手工氈酒 Two Moons Distillery

由兩位對手工氈酒充滿熱誠嘅八十後年輕創辦人成立嘅本土品牌Two Moons Distillery，今年都推出咗全新升級版嘅聖誕禮盒套裝，當中700毫升招牌乾氈酒加入咗意大利嘅嘅杜松子、馬達加斯加嘅雲呢拿豆、巴西嘅零陵香豆及中國嘅乾柑橘皮等，氈酒味道更複雜而且有層次。

DIY雞尾酒  homeshake

對酒鬼嚟講，今個聖誕最慘就係冇得出去飲酒狂歡。不過唔緊要，可以送呢set DIY cocktail畀佢哋，等佢哋自己喺屋企都可以做bartander，自己調酒飲！Amor調製過程簡單，跟住指引，逐支tube倒落酒杯再攬勻就完成，暗紅黑色漸層，係靚嘅。飲落咖啡味突出，仲可以配埋黑朱古力一齊食，苦中帶甜。但唔好睇少呢杯嘢，都成13%架。而醉檸茶就再簡單啲，已經直接由中式茶提煉出茶香，經過多重調酒工序調好咗，直接飲都得。口感清爽，甜甜地酸酸地又有啲回甘。不過想玩下嘅，都可以搭配梳打水或者vodka嗰啲飲都得。

愛酒之選 Timeless & Tasty

頂級烈酒供應商Whiskies & More旗下嘅網店Timeless & Tasty推出3款聖誕烈酒禮品套裝，分別有比較清新嘅氈酒禮品套裝、酒鬼最愛嘅精選烈酒套裝同埋網店主打嘅威士忌套裝。全部都包裝優雅，酒鬼收到實會笑到見牙唔見眼。

聖誕瓶裝雞尾酒 PING

由香港瓶裝雞尾酒品牌推出嘅聖誕雞尾酒，以多款冬季及聖誕元素作靈感，當中包括由紫薯化身成嘅Purple Snow、聖誕必飲嘅熱紅酒變化版 Mull Mull Mull、橙味朱古力的 Chocorange、尤如一個三層士多啤梨蛋糕嘅 Strawberry Cake及薑餅人 Gingerbread，同朋友聚會時飲最啱！

文：Hailey
編：Kar