終於都到咗今年美食博覽嘅大日子，喺灣仔會展度集合咗25個國家同地區、1500家參展商嘅美食，喺人又多攤檔又多嘅情況下，好容易會miss咗啲特色嘢。所以，開飯仔今朝第一時間就去咗行幾個圈，特地為大家準備好「必行必食」嘅攻略，先講大眾化嘅公眾館（Hall 1）。

公眾館有好多現場即製嘅小食，港式台式日式咩都有，而今年嘅大熱食品疏乎厘pancake亦最少有兩檔，究竟邊檔啲咩食得過？即睇十大介紹。

北川半兵衛商店 宇治抹茶、道地烏龍茶雪糕

當大家日日撲7仔都搵唔到呢兩杯雪糕嘅時候，喺Food Expo入面有大量存貨呀！輕輕重溫，宇治抹茶嗰隻，奶味茶香味平衡幾好，烏龍茶味就茶味略嫌唔夠出，似奶茶味多啲。

攤檔：匯泉國際有限公司   1C-A10

豆腐火腩罐頭

午餐肉、豆豉鯪魚就食得多，估唔到連「男人的浪漫」都會被整成罐頭！一罐有6嚿豆腐4嚿火腩，倒出嚟加熱就食得，夠晒方便。負責人表示希望可以將香港本身嘅食品變做罐頭，仲預告嚟緊會有粟米肉粒、北菇雞等罐頭推出。

攤檔：遠大貿易有限公司1A-D02,04,06

雞蛋仔（章魚燒、肉骨茶）

呢檔雞蛋仔，經常都會出下新味，今次就可以食到其中4款口味，較特別嘅有章魚燒同肉骨茶，章魚燒嗰款面頭放上好多木魚同燒汁，中間粒粒個餡都有細細粒章魚燒，幾過癮。而肉骨茶嘅味都幾突出，仲可以點豉油食。

攤檔：Fullhouse Egglet  1B-C33

焦糖芝士雪糕撻、D24榴槤雪糕撻

芝士撻再進化！變咗做焦糖芝士雪糕撻，同D24榴槤雪糕撻。後者喺撻度先加上D24榴槤蓉，之後再加多球榴槤雪糕，最後加糖同用火槍燒一燒，酥脆後嚟又有啲焦香，榴槤怪要試。

攤檔：Cocoberry Ice-Cream Ltd   1C-C28

度小月肉燥飯及肉燥

由台灣過嚟香港開舖，仲踩入埋美食博覽。細細碗，18蚊，肉燥加紅蔥頭爆炒再慢火炆燉，送飯係幾香口惹味嘅。另外之前舖頭未有得賣嘅罐頭肉燥，今次有得賣喇！

攤檔：華記永昌 1E-C10

芋圓豆花

港人至愛嘅芋圓，仲可以加一大球紫薯蓉喺中間添~

攤檔：Yuan Li Trading Co  1E-A34

九份包心芋圓

台灣夜巿食到嘅嘢，呢度都食得返好多呀。呢檔都有芋圓，同前一間唔同嘅係，呢間啲芋圓係有餡嘅，真係有啲芋蓉喺中間呀，同一兜仲有仙草、綠茶啫喱等，食完幾滿足。

攤檔：臺北貿易中心 1C-E18

爆漿玉子燒、台灣雞翼包飯

玉子燒貴為近期嘅大熱食品，呢度當然有得食，蛋捲住芝士，面頭撒滿蟹子，好吸引。同場加映台灣雞翼包飯，一隻隻雞翼燒到金黃色，香噴噴。

攤檔：老饕食品行 1E-A28

榴槤手抓餅（加雪糕）

又有榴槤嘢！呢次係榴槤手抓餅，熱熱地食係幾香嘅，加多少少錢仲可以加球榴槤雪糕。不過個雪糕嘅榴槤味就相對較淡嘅。BTW，雖然呢檔有近期大熱嘅疏乎厘班戟，有朱古力味同榴槤味，但可惜……555555……

攤檔：馬來西亞商務（香港）有限公司 1E-D27-29

疏乎厘班戟、烤溶芝士

呢間同樣都係有疏乎厘班戟，比較之下，無論外形同味道都的確略勝一籌，係有蛋香味嘅，亦頗有空氣感。同檔嘅另一邊仲有烤溶芝士，即場睇住佢喺份大大份嘅芝士加熱後，一下一下咁刮落啲薯仔同火腿度，邪惡同治癒原來都係一念之差。

攤檔：Sunny Day Kitchen  1A-D08

講完十大美食攤檔，講多少少其他嘢。酒鬼Attention，唔係淨得尊貴美食區先有酒，公眾館都有。

西班牙果酒（Sangria）

呢隻Sangria，用上等西班牙紅酒及真正果汁製造，幾香甜，易入口。

攤檔：Telford International Company Limited  1C-A10

松竹梅白壁藏<澪>清酒

呢隻係日本嘅氣泡清酒，有dry有唔dry。清清地，藍色嗰隻甜啲啲，酒樽樣又靚，幾啱女生飲呀。

攤檔：Shin Tai Ho (H.K.) Co. Ltd. 1B-C18

號外：

行行下，見到有人推住架靚靚嘅Hello Kitty手推車，原來係呢間舖嘅限量套裝嚟。車有兩款，粉紅色同紅色，但紅色數量較少，今日一個半晝就冇貨了。一架車裝住廿盒嘢飲，包括牛乳、乳酸及果汁等，Kitty迷係咪想入手？

攤檔：味真味(香港)有限公司 1B-D18

詳情
美食博覽 2017
日期：8月17-21日
詳情按此

文：Kar
相、片：Kar、Cathy