雖然今年十月先至中秋，但近日各大酒樓、餅店都已經開始推出各式各樣嘅月餅同冰皮。而下個月舉行嘅美食展覽，當然就更加係一個月餅大匯集之地啦。事不宜遲，即刻同大家睇下今年嘅新款月餅先。場內買有優惠呀，仲有啲係場內限定口味添！
法式羅漢果月餅 源田實業（3E-D18）
羅漢果月餅，你第一次聽？咁啱嘅？我都係。佢係全港首創㗎，用咗天然羅漢果糖製作，低糖低卡路里，食晒成個都唔會太大罪惡感（好似係）。
朱古力脆皮雪糕月餅 2/3 Dolci （3E-C05）
朱古力迷對呢個牌子一定唔陌生，佢哋今年推出朱古力脆皮雪糕月餅呀，有開心果、荔枝玫瑰、咖啡同海鹽焦糖味。而外層嘅脆皮係用63%高純度黑朱古力製成，唔算太甜。
貓山王榴槤冰皮 一方食品（1C-D34）
愛嘅人好愛，唔食嘅人就好怕。因為呢個貓山王榴槤冰皮嘅味係超級濃郁呀！入面直情係香噴噴嘅榴槤肉。
Hello Kitty 貓山王月餅 谷城（1B-C27）
近年多咗好多榴槤月餅，呢間仲整咗成個Hello Kitty樣出嚟，吉蒂粉絲應該又要去入貨了。
有機羽衣甘藍紅豆月餅 健康之路（1E-B19, 1C-A33, 3C-E17）
食純嘅朋友仔一樣有月餅食。呢款四色健康月餅係純素月餅嚟，手工製嘅，包括有朱古力味、五仁味同紅菜頭、南瓜月餅，但講到最特別一定係羽衣甘藍紅豆味。
更多【月餅巡禮】： |
健康紅棗、薑汁月餅 Blesscuit （3B-F08）**尊貴美食區**
由藝人陳敏之開嘅餅店，今年都有出月餅呀，都有幾多款味。有奶皇有柚子奶皇、有健康系嘅紅棗、薑汁，亦有重口味嘅榴槤！
至於傳統品牌，都同佢哋傳統一樣，每年都有新口味新款式。
Marvel月餅 美心（1C-C02）
造型嚟講，必推Marvel系列。無論係SpiderMan定係IronMan嘅餅盒都好靚，睇下你哋想揀樣定揀味啦，前者係奶黃月餅，後者係綠茶紅豆。至於女生，就可以揀迧士尼女角系，有藍莓二重奏同蕃石榴杏果，月餅上面仲有隻蝴蝶結，係幾少女嘅。
蛋黃哥月餅 榮華（1C-B02, 1A-E21&E23,3E-D21）
同樣都係以卡通造型作招徠嘅仲有榮華，被選上嘅卡通係B.Duck同、蛋黃哥，兩款都係奶皇味。嘜頭印咗上迷你月餅度又幾cute嘅。
流心抹茶 東海堂（1C-C02）
抹茶控肯定又忍唔住。呢個係用嚟自京都宇治丸久小山園嘅「若竹」同北海道3.6牛乳製作嘅流心抹茶月餅，堅係流心呀。
珍珠紫薯冰皮 大班冰皮（1C-E02）
佢哋每年都會有新搞作，今年就玩珍珠系列。首推嘅有冰皮白珍珠紫甘薯，喺甜甜嘅紫薯中間，加入煙韌珍珠，口感豐富。同樣係珍珠系列嘅仲有咖啡味同抹茶味。另外，果香系佢哋有升級版嘅「冰皮黃金芒果」，比以往嘅再加多咗30%芒果肉，再香甜啲。
芝士奶皇 奇華（1D-D02）
連月餅都有芝士味呀喂！芝士控可以試下，同場仲有得會場限定嘅現烤月餅，奶茶奶皇同咖啡奶皇，真係有部烘烤機喺度，即場烤住食㗎。唔知兩隻味一齊食，會唔會食到鴛鴦味呢？
追加【美食博覽2017攻略】：
1. 全場特色、新品搶先睇 卡通布丁燒、shake shake蝦片勢成大熱
2. $1優惠大集合 鮑魚燕窩都有
文：Kar
相：Kar、Cathy