【特約分享】唔做大嘥鬼! 深入實測「咪嘥嘢食店」
2024-03-13
食飯眼闊肚窄好易變大嘥鬼,食唔晒嘅變咗廚餘要揼,除咗浪費食物,對堆填區都造成好大壓力! 想要減少產生廚餘,除咗自己身體力行餐餐清碟,平時食飯仲可以做啲咩? 喺OpenRice可以搜尋超過1,000間「咪嘥嘢食店」,由廚餘分類、善用食材等多方面實踐咪嘥嘢。只要你係食客之一,就已經可以間接為環境保護出一分力啦!相信唔少人都係自助餐、日本菜嘅Fans,所以今次睇吓「咪嘥嘢食店」金級級別嘅自助餐廳「JW咖啡室」和日本料理店「魚治」有咩秘訣減少廚餘。
 經OpenRice搜尋餐廳時,揀選「進階搜尋」及「食品/餐廳類型」可以搵到咪嘥嘢食店。


JW咖啡室】小細節提升Buffet作戰力!
平時食自助餐,目標梗係食到可以回本!! 唔覺意拎多咗嘢食,食唔晒咪好易變成大嘥鬼? 「JW咖啡室」運用多個小細節幫大家惜食,例如將自助餐菜式、甜品設計到精緻小巧,畀比大家可以試多幾款嘅同時又唔怕食唔晒。
甜品精緻小巧,方便食客試多幾款及有助減少浪費。

菜式擺盤靚就自然容易吸引大家清碟啦!為咗鼓勵大家食晒所有烹調過嘅食物,「JW咖啡室」亦會考慮菜式賣相,例如將原條魚變成魚柳,避免原條魚因為頭幾位食客夾咗啲魚肉後,變得唔完整減低咗其他食客食魚嘅意欲。大廚起肉後,更會將剩餘嘅魚頭、魚骨、魚尾熬湯,充分利用食材。
將原條魚起肉變成魚柳,避免食客拿取後破壞外觀減低意欲。

發揮創意盡用食材,都可以減少產生廚餘。除咗用魚骨熬湯,「JW咖啡室」發現一個西瓜取肉後,仲有大約三成係西瓜皮。為咗唔嘥嘢,大廚會將西瓜皮製作成一種清新特色飲品,食客喺早餐時段就有機會飲到。至於剩餘嘅牛角包,經過進一步烹調後,就可以變成可口嘅麵包布甸。大廚更將常見嘅檸檬皮,用於煮海鮮去除腥味。唔單止係上面嘅例子,平時大家都不妨試吓運用創意盡用屋企嘅剩食同食材,可能有驚喜㗎。
發揮創意,將西瓜皮製作清新特色飲品。

剩餘牛角包可變成可口嘅麵包布甸。

自助餐嘅即席烹調區(Live Station) 即係切肉扒區、刺身及手握壽司區同埋麵食區,一向都大受歡迎。原來食客喺呢度叫嘢食,大廚會即場按食客要求,嗌幾多煮幾多,提供合適份量、煮法確保滿足每人口味,大家就實食得晒。
即席烹調區(Live Station)可即場按食客要求,提供合適份量。

「JW咖啡室」自助午餐、晚餐,提供琳瑯滿目嘅新鮮海產、冷盤、手握壽司刺身、國際美食、精緻甜品等,每次都令人流晒口水!全因餐廳會定期檢視食客喜好,剔除不受歡迎食物,令食客食得開心盡興之餘,同時避免浪費食物。自助晚餐更會定期推出各種主題,例如西貢海鮮、極致蟹宴及和牛主題等。
定期剔除不受歡迎食物,避免浪費食物。

「JW咖啡室」現時亦會將剩餘嘅麵包捐贈比膳心連基金(Foodlink Foundation),再分發給社會上有需要人士。
「JW咖啡室」將麵包捐贈膳心連基金。

「JW咖啡室」除左係金級級別嘅「咪嘥嘢食店」之外,亦有參與環保署嘅廚餘收集先導計劃。酒店係廚房設置特定嘅廚餘回收桶收集廚餘。收集後嘅廚餘會運送至O · PARK1,轉化為電力同堆肥。
回收廚餘運送至O · PARK1,轉化為電力和堆肥。

除咗一系列海鮮、國際美食,呢度仲有招牌中式美饌—燜原隻南非鮑魚、燜澳洲厚花膠澳洲烏參,矜貴食材燜到入晒味㗎。
必食中式美饌,有燜原隻南非鮑魚、燜澳洲厚花膠。

矜貴食材燜到入晒味。

魚治】依日本傳統尊重食物
「魚治」係海鮮爐端燒居酒屋,廚師團隊會四出走訪日本,定期推出新料理。其中喺中目黑區受啟發嘅炙燒味噌刺身他他,就係用各種魚鮮,例如三文魚同油甘魚嘅邊位切成魚茸。平時被視為無用嘅魚邊位,反而最肥美最有魚脂。當師傅席前炙燒時,散發出嚟嘅魚油香令人食指大動。
中目黑區名物—炙燒味噌刺身他他。善用各種魚鮮邊位,特別肥美。

而無可避免嘅魚骨,「魚治」就聯同本地農場將其轉化為酵素、有機肥料,用作種植不含化學農藥及殺蟲劑嘅蔬菜。想試吓呢啲有機菜,可以選擇午市套餐沙律㗎。
為鼓勵大家多菜少肉,減少碳排放。晚市有吉列新豬肉三文治,好啱無肉不歡又想Go Green嘅客人。植物豬肉含高蛋白質又不含激素及抗生素,炸到金黃香脆真係好似食緊炸豬扒咁。另一款啖啖菜嘅鮮野菜拼盤,材料由日本同本地農場引入。蔬菜新鮮爽甜,配上鹹香鯷魚醬好啱飲酒。
吉列新豬肉三文治,植物豬肉含高蛋白質並不含激素及抗生素。

鮮野菜拼盤,由日本及本地農場引入。

日本人尊重食物,當地人珍惜食物所提倡嘅「勿體無」(Mottainai)更係日本傳統文化之一,小至魷魚肝臓都可入饌。呢道爐端燒魷魚筒 配魷魚肝醬,就係將魷魚肝臟煮成濃郁醬汁,以原始鮮味引出食物味道嘅層次。
爐端燒魷魚筒 配魷魚肝醬,善用魷魚肝臟製成濃郁醬汁。

「魚治」作為金級級別嘅咪嘥嘢食店,喺存貨、設備及培訓都有採取減少廚餘措施。餐廳完善嘅物流系統令餐廳可以迅速補給食材,減少因貯存過多引致食材腐爛嘅問題。佢哋採用先入先出的貯存(FIFO)方式,先用較早存倉嘅食材,避免因存放太耐而過期造成浪費。同時,以最適合溫度分開貯存各種食材,例如將未經烹煮嘅新鮮食材存於0-4°C嘅雪櫃,保持食材衛生,延長保鮮期。
要將廚餘分類及回收,工作人員嘅理解同配合都好重要。所以「魚治」喺廚房張貼廚餘處理流程(SOP)指引,協助員工進行廚餘分類。同時,舉辦各種環保活動,如參觀有機資源回收中心O · PARK1,近距離認識廚餘處理設施;又定期組織活動清潔海灘,讓員工更投入環保工作。
張貼廚餘處理流程(SOP)指引,協助同事分類廚餘。

設立垃圾分類箱,有助廢物循環再用。

展示咪嘥嘢海報,鼓勵食客食得晒至好嗌。
客戶專訊
本月熱門
【2024生日優惠】持續更新!4月壽星嘆巴日Fusion菜享「年齡折扣」
2024-04-05
香港必食燒鵝餐廳推介 荔枝柴香煙燻燒鵝、香氣十足陳皮燒鵝
2024-04-04
【隨時更新】零食速報 每周新款零食、酒品點評
2024-03-26
關注組推介沙嗲牛 世一回歸、大圍多選擇
2024-03-27
4大麻糬波波店推介 熱賣菠蘿脆皮波波、紫菜肉鬆拉絲芝士麻糬口味
2024-03-26