小丸子又有心事？錯，係小丸子又有主題期間限定Cafe啦！今次開喺東京澀谷，嘢食當然唔少得主角小丸子，不過最搞笑嘅反而係其他同學嘅菜式，例如永澤同藤木同學嘅豬肉丼，同有野口同學大頭嘅黑咖喱！

老規矩先睇正餐，海鮮蛋包飯嘅蛋皮印住小丸子招牌笑容，就算唔係忠實粉絲嘅開飯仔我都有少少唔忍心切開佢呀！

而豬肉丼就可以一次過集到永澤同藤木同學兩個，最搞笑當然係洋蔥頭嘅永澤同學個樣又印咗喺洋蔥上面。

成日喺一邊靜靜雞「顆顆顆」笑嘅野口同學其實又唔算黑口黑面，但呢個黑咖喱飯實在野口同學嘅Image非常貼切。

甜品方面首先有花輪同學嘅西多士，唔通因為花輪同學成日講英文例如「Hey Baby」，所以就配西多士？（誤）

最後係主角小丸子嘅水果布甸同士多啤梨Crêpe。成個Menu總共三款主菜三款甜品，三四個朋友一齊去應該就可以全部集郵成功啦。

info
2.5SPINNS CAFE×SWEETS PARADISE と ちびまる子ちゃん
活動日期：2016年6月11日至7月中旬
地址：東京澀谷區神宮前1丁目15番2號神宮前115 

資料來源：ちびまる子ちゃん オフィシャルサイト