【一個人開飯】一個人喺旺角食乜好?
2017-01-18

「一個人食飯食乜好?」相信呢個係好多人都諗或者面對嘅問題,好似冇乜奶油一支公去食放題或者鋸扒,於是有人會揀掃街、有人會揀食便利店或者快餐店,甚至有啲人會寧願唔食。但其實一個人食飯又有咩好怕喎?邊個話要一班人先可以食好西?下次唔使再問一個人喺xx食乜好喇,等開飯仔幫你揀啦,今次講下旺角。

一個人喺旺角當然可以周圍掃街啦,但有時行到攰攰地,想坐低食下嘢,都有唔少選擇呀!

悠閒食茶漬飯  小房子


圖:HazelHJWildchildcarol

一個人食飯,其實係一段幾好嘅獨處時間,畀機會自己放鬆下、休息下,甚至放空下。不過一般餐廳人來人往就好難做到咁嘅,呢間就得嘞。夠靜,仲要夠文青。成個環境都好舒服,啱晒想靜靜地一個人抖下、思者下嘅朋友。食物方面,以日式輕食同甜品為主,鰻魚茶漬飯set都唔錯,配菜嘅蒸蛋同紫薯仔都好食呀。叫多件豆腐芝士蛋糕都得,豆腐味較香,相對芝士味就淡少少,唔太膩。

海南雞飯    阿來泰式地道風味


圖:HKfoodshareprinceawkm

通菜街好多間舖頭仔,其實幾啱自己一個食嘅人。其中呢間泰國菜唔錯啊,雖然一班人嚟食會開心啲,可以叫多幾款小菜一齊食嘛。但自己一個都唔係問題呀,叫返碟海南雞飯或者碗各陰公湯金邊粉咁,加多個椰青一樣得。海南雞飯建議揀油飯,香口啲,雞肉都幾滑,撈埋酸酸辣辣嘅醬汁好送得飯。嗯,如果你覺得自己一個人食飯有啲慘,飲返個超甜嘅椰青,畀自己苦中一點甜啦。

雞湯米線   農米莊


圖:htwinstarsSarah Chan005

自己食通常都係鍾意食下粉麵,貪平貪快貪飽肚嘛。呢度主打雞湯米線,有好多款湯底揀:黑蒜雞湯、椰子雞湯、藥膳雞湯、花膠雞湯,仲有麻辣之類。可以放心,黑蒜湯底嘅蒜味唔算超濃,唔使怕鹹或者口渴。而藥膳湯底嘅藥材味就幾重,可能未必個個都鍾意,但鍾意嘅就會好開心,餐廳落咗雲耳、杞子、紅棗、蟲草花等等去整呢個湯底㗎,清到飲晒成碗都得。

老字號粥舖   富記粥品


圖:fotomax16良善熊熊

得一個人嗰陣,食粥都係個唔錯嘅選擇,入到去粥舖,都會見到好多同樣一個人嚟食嘢嘅人,即刻有種I’m not alone嘅感覺。旺角呢間老字號,去到當然要食粥,煲得好綿,魚腩夠鮮又唔腥、豬潤亦都好滑,仲令到成碗粥都好有味,三十零四十蚊碗粥好似有少少貴,但勝在足料呀!冬天食完都暖笠笠。

紅燒牛肉麵   西門町台灣麵食


圖:Wyanlomandy989

呢間餐廳成日都好多人,一個人等位應該比較快啲,同埋大部分人都搭枱食嘅,唔會顯得太兀突呀。通常最多人嚟食紅燒牛肉麵,牛肉厚得嚟都好腍身呀,仲好入味,肉味好夠。不過食得太多麵,轉下食泡飯都OK,特別係海鮮湯泡飯,有鮑魚、蠔、蟹柳同魷魚,種類唔算話好多但都唔少呀,湯底有鮮味就梗,所以撈埋飯一齊食就好開胃呀。



文:Kar


【一個人開飯】系列:
一個人喺觀塘食乜好?
一個人喺銅鑼灣食乜好?
一個人喺尖沙咀食乜好?
一個人喺荃灣食乜好? 


                                                                                                                                                                                                                  
  

隨時接收最新資訊
讚好OpenRice專頁!

關鍵字
一個人開飯
旺角
MK
米線
泰國菜
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【當時得令】心思湯底麵食 窩心又飽肚
2016-12-08
【當時得令】澳門新橋區宵夜之選
2017-01-31
【編輯推介】一次過滿足你的星馬泰願望
2017-03-09
一大班人慶生去邊好? 精選café篇
2017-03-14
英國傳統糖果店旺角新舖 三大必買推薦
2017-04-15
一個人喺太子食乜好?
2017-05-04
餐廳資料
更多
收起
本月熱門
【隨時更新】便利店尋寶 每周新品速報
5天前
給自己一個休息時間 10-11月下午茶推介
2019-10-25
【特約分享】食魚生轉運 三種好意頭日本海產介紹
2019-10-14
高CP值放題推介
7天前
鼎王來了!味道服務媲美台灣 必食麻辣鴨血鍋及員工教路秘製鼎王飯
2019-11-01