「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，今次講下尖咀。

洋蔥豬肉餃    阿芳上海餛飩

圖：Edisonick、為食lydia

一個人其實好適合食小店，細細間，位唔多，一個人靜靜地食都唔會好尷尬。呢間喺柯士甸道嘅餛飩店，心機舖嚟，成日行過都會見到店員喺度包緊餃。呢度嘅餃子，餃皮薄薄滑滑，入面嘅餡半透到出嚟。特別要介紹洋蔥豬肉餃，出面啲餃子舖好少食到呢個款，混埋洋蔥入去，香口，又微辣咁，好食。

魚介湯拉麵 武士拉麵

圖：KaterinaLin、Ainos_C

自己一個人去食拉麵，都係一個唔錯嘅選擇，特別係呢間，setting係成張長條型bar 枱嘅拉麵舖。拉麵主要係魚介湯底，用咗成6種唔同嘅魚乾熬足十幾個鐘，魚鮮味十足，想要升lvl版嘅仲可以自己加特製魚油。拉麵就返自己喜好揀揀粗幼度同軟硬度，一樣都係彈牙嘅，溫泉蛋半熟度亦都適中。

平價彈牙牛丸    德發牛肉丸

圖：joeyhome888、EmilyFaustinaKoh

一般嘅朋友聚會，都應該比較少約嚟呢間喺海防道街巿入面嘅餐廳，所以得自己一支公時嚟就啱晒嘞，不過首先你要……唔怕污糟。老老實實，衛生就真係爭緊少少嘅，之但係佢勝在抵食同好食，30蚊碗麵，單拼雙拼都係呢個價。識食嘅唔使諗，一定係叫牛丸，大大粒，超彈牙！搭埋牛腩或者牛雜食都ok啊！

芝士茄牛通   星座冰室

        
圖：missgoodiess、fattiefoodiee

茶記、冰室最多一個人嘅食客，去到你就會有好多伴㗎喇（誤）。呢間冰室呢好耐歷史㗎喇，不過個位就比較格攝咗啲，唔太易搵，年輕一代未必嚟過。呢度最出名就係食蕃茄麵，因為堅香茄味，加埋撈蛋一齊食仲正。芝士控嘅，可以試下芝士茄牛通，成片芝士舖咗喺面㗎，又要尖叫。

享受咖啡 My Little Coffee: Coffeehouse & Roasters

圖：祖胡迪、celian1314

Coffee shop都好啱一個人去呀，扮下文青打卡又好，靜靜地坐低食下嘢又好，總之一個人都可以好好享受生活，唔使下下都頹食茶記然後光速食完就撇嘅。呢間喺尖咀嘅小店，啱晒咖啡迷，唔止有好多款咖啡豆，仲有個corner仔可以自己沖咖啡！食物方面都有一定水準，all day breakfast或者3式bagel都係唔錯嘅選擇，隻蛋好滑，仲有黑松露喺面添；而bagel搽醬有nutella又有韓國抹茶醬，係開心嘅。

文：Kar


【一個人開飯】系列：
一個人喺荃灣食乜好？


其他地區精選文章：
顏值爆燈 「色」飲「色」食在荃灣
石硤尾Lunch開餐街坊推介
大埔墟街市一日五餐之選
                                                                                                                                                                                                                  
  

隨時接收最新資訊
讚好OpenRice專頁！