一大班人慶生去邊好? 精選café篇
2017-03-14

平時gathering飯局諗食咩都已經好頭痕,遇著好朋友生日,諗餐生日飯去邊食就更加頭痕!通常你問主角想食問,佢都會答你冇所謂。但冇所謂之中,生日飯總不能夠求其,環境氣氛、食物質素、生日驚喜,甚至乎你同呢個朋友有幾friend等,通通都係考慮因素。就等開飯仔畀啲建議你哋參考下,今次講下一大班人可以去邊間café好,有得玩之餘嘢食質素都有返咁上下嘅~

四球雪糕杯   樂園


圖:Kalufoodiemenus

環境:★★★★☆
喺尖沙咀站一出行兩分鐘就到,係幾方便呀,有好多款唔同嘅boardgame玩。而且呢間特別啱啲鍾意喵喵嘅朋友,因為入面有隻喵星人呀!但如果你朋友係怕貓嘅,咁就要諗諗喇……

食物:★★★☆☆
款式唔算太多,但可以揀要廚師發辦定自己柯打。黑松露香煎帶子刺身意大利飯可以一試,隻帶子點樣煎完又叫刺身?原來係輕輕煎脆個邊咋,中間都仲係生嘅,一啖兩種口感!

生日祝福:★★★★★
生日唔食蛋糕食雪糕都幾開心,仲要有4球咁多!芒果、朱古力、士多啤梨味等等,然後底層仲有朱古力脆脆之類,大滿足!

彩虹酒   棋吧


圖:single_dimpleOdd Bar

環境:★★★☆☆
呢間喺旺角嘅café,地方唔算話好大,但都有啲長枱可以坐到10個人嘅,一大班朋友嚟都冇所謂。Boardgame嘅種類都幾多呀,由層層疊到麻雀都有!最好係唔限時吖嘛,玩成晚都得。

食物:★★★☆☆
地方細嘅關係,食物款式都做唔到太多,但質素係唔錯嘅。去到不妨試下韓式辣卡邦尼,辣辣地幾醒神,但繼續都係creamy狀態,食得辣嘅可以叫加辣。

生日祝福:★★★★★
有啲可惜呢度冇甜品或者蛋糕,要食就要自備,但借位雪呢就要收切餅費喇。但係佢哋嘅生日祝福好特別下,出面都比較少見——係rainbow shot呀!仲有表演睇添呀,一排酒杯放好就之後,就會有員工倒酒,一路倒,啲酒會變色㗎,變到彩虹咁好鬼靚!唔同色唔同味㗎,有啲甜啲有啲苦啲咁,睇你彩數喇。

生日畫碟 玩具小屋咖啡室


圖:karling1119Karen wuwu

環境:★★★★☆
同樣都喺旺角,難得地冇限時嘅café,成班人鍾意玩幾耐都得!而且叫得玩具小屋,就當然係超多玩具玩啦。仲有就係裝修好colourful,連啲櫈同梳化都係五顏六色㗎。

食物:★★★★☆
大部分人對café嘅印象都係得個玩字,啲嘢食通常都好一般,但呢間係例外嘅。除咗意粉,仲有burger,係德國芝士牛肉漢堡呀,啲芝士汁好香。如果想要試下啲特別嘢可以叫蘋果啫喱紅茶,啫喱同茶分上,然後慢慢嗶啲啫喱落茶度,溶咗就會有蘋果味喇!

生日祝福:★★★★☆
唔好講笑,呢度啲生日碟嘅圖案畫得幾靚,成隻大眼仔或者麥兜之類都可以畫到出嚟,早啲訂就得。

【生日飯局】:
1. 同好朋友慶生食咩好? 特色日式篇
2. 同好朋友慶生食咩好? 窩心西餐篇


包場party   小桃咖啡室


圖:eunice2046Happy KC

環境:★★★★☆
銅鑼灣都有樓上café呀,雖然上去嗰陣就要搭舊式貨lift,但入到去嘅裝修就一啲都唔舊,仲好有格調。有game玩之餘,連漫畫都有得睇。另外有獨立房,一班人想自成一角咁玩都唔係問題。

食物:★★★★☆
基本上,燒豬仔骨配煙肉鋪天薯條係必點嘅。豬仔骨燒得幾香,肥瘦度適中,而其實啲薯條先係重點。點解叫舖天?因為舖滿晒煙肉同芝士呀!成層咁蓋面㗎。另有酸忌廉、燒烤醬同茄汁可以點,絕對係邪惡代表。

生日祝福:★★★☆☆
有原個蛋糕都有切件甜品可以叫嘅,如果想話花多少少心思氹朋友開心,要有畫碟唔係問題嘅,早啲講同加少少錢就得。另外,如果你嗰班朋友係好大班,直接可以考慮包場添,咁就連場地佈置都可以搞搞佢。

玫瑰雞翼   趣亭餐飲館


圖:eatmugfoodsWinniYiu

環境:★★★☆☆
裝修簡單得嚟又有少少屋企嘅感覺,除咗boardgame之外,仲有好多公仔周圍放,鍾意影下相又得,攬下都應該得,啱晒少女心朋友。

食物:★★★★☆
一定要介紹嘅係呢度嘅招牌菜:玫瑰雞翼。呢隻雞翼,唔係淨係玫瑰味咁簡單,而係連隻雞翼嘅形狀都整到成棵玫瑰花咁,好靚呀。食落又有花香味同蜜糖味,都係嗰句,好啱少女。

生日祝福:★★★☆☆
Café有cheesecake或者waffle之類嘅甜品提供,想要畫字嘅都得,但如果自己帶蛋糕上去,就有機會會被收切餅費喇。


文:Kar
 


開飯編輯推介:

1. 【專訪】日本人在香港 開餐廳最重要健康行先

2. 2月份好評餐廳十強

3. 2017亞洲50最佳餐廳 地區最佳餐廳全攻略




熱門文章推介:

1.  【飲食潮流】今年熱爆疏乎厘pancake 港九新界都有得食

2. 【一個人開飯】一個人喺灣仔食乜好?

3. 【熟食中心尋寶】禾稈冚珍珠 皇后街熟食市場




隨時接收最新資訊
讚好OpenRice專頁!

關鍵字
生日飯
旺角
尖沙咀
銅鑼灣
cafe.生日飯局
生日飯局
好友生日飯局的環境、食物質素、驚喜等因素都很重要,開飯仔集合各類最適合慶生的餐廳,方便飯局搞手。
相關文章
【生日飯局】同好朋友慶生食咩好? 窩心西餐篇
2017-01-04
2月份好評餐廳十強
2017-03-06
【生日飯局】同好朋友慶生食咩好? 特色日式篇
2017-02-15
同家人慶祝生日食咩好?精緻中餐篇
2017-05-12
今年熱爆疏乎厘pancake 港九新界都有得食
2017-03-13
童年回憶返哂嚟!荔園去尖沙咀開茶餐廳
2017-04-25
本月熱門
黃埔新酒店自助餐 必食即製分子雪糕
2017-05-11
一個人喺太子食乜好?
2017-05-04
$138鐵板雞任食 韓國鐵板雞專門店旋風登陸沙田(有片)
2017-05-15
今期熱話!平民正宗海南雞飯推介
2017-05-09
悠閒二人世界 抵食Semi Lunch Buffet推介
2017-05-10