喪食女的个人专页

叫咗生炸脾撈麻辣脆米，生炸髀的確係出色，真係做到皮脆內滑，調味亦恰到好處。麻辣夠麻，脆米就係正常米粉，比較值得一提係伴隨撈麵嘅滷水汁，有好濃烈嘅中藥味，有啲似濃縮嘅肉骨茶。美中不足係大傷風嘅樓面哥哥，乞嗤、包雲吞都算，最慘係佢唔戴口罩，仲會用衫袖抹鼻涕。惟有食快啲走人。…查看更多

望住openrice個menu（原來未update)打電話落order, 落完發現加哂價, 本身有啲後悔 （冇諗過一碗米線加嘢飲成$150）點知原來好有驚喜！叫咗泰式手撕雞撈米線小辣普通麻，米線係過冰水冷河果種凍，超彈牙！泰式汁唧埋個青檸味道好清新又夠味，足夠芫茜，就連跟麵嘅菠菜都係淥到剛好嘅翠綠😍睇得出每個細節都係用心之作，雞夠多又嫩，仲要走皮冇乜肥膏啖啖肉。飲埋杯益力多青檸梳打，舒服哂。 $150係抵返。…查看更多

通常想食清啲都會嚟，特別係想食碟清清哋嘅菜嘅時候。粥同麵麵係好高質嘅，除咗師父成日遺忘咗要打撈返我碟菜芯上嚟...又一碟廿蚊但係淥到溶嘅菜芯，有啲夾起會發現連條「框」都爛到開叉，入口感覺嘔心。希望餐廳見字會有所改善。…查看更多

其實我都食過幾次，貪佢一次過滿足哂三個願望：米線，魚，多餸。坐低阿姐就行埋嚟問食乜嘢，我諗住試新湯底，問佢有咩揀，佢話唔要魚湯有蕃茄酸辣...由於佢個餐牌都幾混亂，我望住餐牌問佢邊度睇到有咩揀，佢就話總之唔要清魚湯就蕃茄酸辣啦！我話好。一睇張手寫單，原來蕃茄係一個湯底，酸辣係另一個湯底，各6蚊，二合一共收我12蚊🙄等同兩個餸價錢。同佢講話改，例牌話煮緊冇得改。仲要響我一起筷焗住食嘅時候，嚟另一碗米線俾隔離位，話送多舊魚腩俾佢。成張台得我一個叫魚腩，唔知點解我同佢嘈完之後，隔離位冇叫但會送魚腩囉。生意佢係唔憂做，我亦一直好欣賞佢啲魚keep住幫襯，但今次之後，我會揀加兩三蚊大大碗蕃茄四小辣嘅譚仔囉！…查看更多

星期六同好姊妹去tea一tea, 我唔太知定都係求其上open rice搵間cafe就搵咗呢間。今日熱到唔係人咁品，但一行入嚟就好感恩，冷氣十分強勁，啱哂怕熱嘅朋友，不過坐多陣嘅話都係嬲返件披肩好啲。我哋4個女仔，叫咗兩個羊架餐、一個黑毛豬餐、一個小食拼盆同一個雞扒沙律。法式羊架配意粉$138（餐價），夠味，意粉al dente好香香草味, 羊架調味剛剛好，原鑊仔上係會熱啲嘅，不過鑊底塘油浸住咗啲意粉同蔬菜，怕肥的話要趁熱搬上碟瓊吓油先食。黑毛豬意粉，豬扒厚切但一啲都唔un! 切俾大家食個個都話估佢唔到！一樣有鑊底太油嘅情況。雞扒Caesar salad, 雞仲多過菜，當main course都仲得。呢個小食拼盆好激動，人少啲都會俾佢Ko, 雞翼上面鋪滿芝麻，阿妹話太好食要一個人食兩隻，所以我唔知咩味。 當中嘅芝士棒尢其出色...極滿足，咖啡都好ok總括嚟講大件夾抵食，有卡位，冇卡位亦坐得好鬆動，餐廳佈置好有心思好colorful合照都好靚。 下午茶最正嘅係仲有充足嘅陽光，終於有間令人真正relax嘅cafe!…查看更多

而家apm行幾步又一間雪糕cupcake Danish cheese tart，加埋一田入面果幾間pizza fish n chips oyster，但得一間天仁真係要好忍得先會等。食到上三樓見到呢間即管試吓...嘩，都幾貴，飲到兩杯天仁如圖，茶記奶茶咁上下大杯啜兩啖淨返一杯冰係有茶味嘅，係唔甜嘅，係幾滑嘅。當pacific coffee都有7折嘅時候我未必會俾40幾蚊飲幾啖茶囉。…查看更多

放工經過好想放肆一吓就同男友入去食炸豬排飯同星洲米。我都係第一次見豬扒多過飯嘅豬扒飯！ 豬扒鬆軟juicy得嚟外層都脆。不過個咖哩個人覺得偏淡，唔太辣但又唔係特別香，裡面舊薯仔係炆得夠淋嘅。本來想食人人推介嘅干牛河，但賣哂，惟有食星洲米啦，成80幾蚊碟，即管睇吓同一般茶記有咩唔同。如圖所見，唔係特大碟，正常size我一個女仔食得哂。大量芽菜、蔥、蛋同火腿，辣度剛好，米亦兜得均勻彈牙，典型夠鑊氣炒粉。最出色嘅係，食到碟底都冇乜油，唔同出面食到底見到灘油而有罪惡感。總括嚟講係好味有質素，值唔值80幾90蚊食茶記嘢未計嘢飲就見仁見智喇！PS 食到尾有隻蚊滋跌咗落碟菜度，蚊滋仲嬲過咩自己想像。…查看更多

每次去紅磡睇牙醫都會順便搵新餐廳試，經過見佢新開，個二人餐又幾抵食，就入咗去。記得三百零蚊一個二人餐，有兩碗麵䜴湯，兩客沙律，三文魚、帶子、甜蝦刺身各四件，雜錦壽司，南蠻炸雞4-5件，豬肉壽喜燒。湯嚟講不過不失，麵䜴湯好難難飲嘅。室溫沙律，一啖食哂。帶子新鮮，蝦同三文魚係室溫嘅，我唔敢食，俾哂男友食，一個鐘後佢衝咗去黃埔瀉到腳軟，我就冇事。我唔敢講一定關刺身事，但事實就係咁。同樣室溫嘅壽司其實我個人不太好壽喜燒，感覺都係一鍋又咸又甜嘅湯鍋咁囉，個餐冇烏冬冇飯，就咁食堅咸。炸得唔錯，大大件，最欣賞係啲沙律醬，有蛋碎，有心思。總括嚟講，唔係難食，但亦唔會想翻兜。一分錢一分貨，坐得迫之餘又會肚痾，我寧願食genki。…查看更多

身為一個米線控，呢間嘢我想試好耐，但平時男友嫌佢小嘢揀嫌佢坐得辛苦，我惟有好好把握一個人嘅時候過嚟試吓。星期三晚上一撥開膠布入去，都幾full吓，為咗唔同人迫，我揀咗門口面𤩹自閉位。好快，操勁咸唔淡廣東話嘅大媽過嚟介紹菜式，我唔熟架步，諗住譚仔咁自由組合，但原來一定要揀個麵底，是但揀咗個牛筋底再加腐竹油麥菜。大媽不斷sell我叫小食同嘢飲，話會唔夠飽，與其飲支裝糖精酸梅湯，我叫咗zero。唔怪得之大媽怒 sell小食啦，呢碗堅係小麵，份量雙拼魚蛋雲吞河咁上下，一滴多餘嘅湯都冇。支竹係硬嘅，油麥菜同牛筋份量ok，酸辣湯底嘅麻酸辣亦做得平均，所謂小麵，係米粉咁上下粗嘅上海麵。大媽一直企喺我後面撥開膠布拉客，冇冷氣可言（怕熱嘅男友唔嚟係啱嘅）。而成間餐廳都係操國語嘅學生，唔通佢味道正宗？埋單承惠$66 (牛麵底50幾加兩餸加zero) 相同價錢我去三哥會開心好多囉。…查看更多

豆蓉湯，係食到有豆蓉嘅，但咸過茶記hea爆例湯，質地好稀，我同朋友都冇飲到lunch set no. 6 咖哩芝士泡菜豬蹄飯, 我個人幾鐘意佢啲咖哩，加埋泡菜，薰蹄幾肥你都會夠汁送飯至於薰蹄，怕肥嘅女仔就唔洗諗喇，主要係肥豬肉雖然佢哋服務，食物都好一般，但我食嘢慢，唔洗等位係好重要嘅賣點，加上佢杯咖啡夠大杯，唔酸，奶泡香濃，成為另一我會考慮佢嘅原因整體而言，喺德福趕時間，想坐得舒舒服服，對食物冇咩要求就揀佢啦！…查看更多

同我個巴打行完高登之後過嚟食雞煲, 雖然同最旺果堆有少少距離, 但沿住玩具街行過嚟5分鐘就到, 隔離仲有綠林糖水, 好有一箭雙鵰嘅感覺叫咗個餐牌上左手邊(唔記叫咩四川XX雞煲) 侍應話乾身D果個  未加湯之前係幾好味,d雞又入味, 仲有d薯仔吸汁,個煲本身係好食但一去到d火鍋料就唔得首先係響鈴,一夾上去就知擺到淋咗,浸一浸d湯入口果然係重dek dek油益味, 之後就成籃都冇掂過, 平時呢個item係最搶手的仲有叫咗海帶, 付皮, 韮菜餃, 韮菜餃好好味, 多韮菜同埋d韮菜真係鮮綠色仲有叫咗d菜同丸, 冇咩特別成晚有個幾搞笑嘅場面就係, 唔知係咪佢d雞煲太辣太嗆嘅關係, 次次上親煲全場都輪住咳, 連d阿姐都無一幸免, 唔知算唔算讚...總括而言, 雞煲好味, 但可能人流關係,d火鍋料唔夠新鮮, 仲要深水埗區,搞到平時好搏嘅我都唔敢去太盡…查看更多

今日響附近跳完舞，同同學食埋飯先返屋企其實都唔係第一次食呢間，貪佢上菜快，比起大商場果邊d餐廳攞位快，又抵食！首先，食上海嘢點少得小籠包唔洗點等就有得食，都幾多汁，最緊要夠熱，唔係d皮硬咗就嘥哂同學最愛，夾起個底唔算太油，食落冇咁有罪惡感我最鐘意食上海年糕，貪佢煙煙刃刃呢次有鑊氣得嚟唔會太咸，我覺得係幾碟中最出色食咗幾啖先記得影添好少見出面有獅子頭麵，所以試下湯底好似牛肉麵湯底咁，獅子頭冇咩夾雜肥豬肉，真才實料總括嚟講都幾抵食，三四個人吹水又得，下次上堂前後一個人食碗麵都得！…查看更多

其實都唔係第一次黎食只不過係上一次叫午餐定食, 唔洗同d侍應接觸, 見佢d野幾好食, 所以今次同同事拉大隊食佢個dinner buffet一去到因為我地太多人要分開兩張台, 我地一行八人正在商量點分台之際, 其中一個侍應問"你地要唔要架? 唔要一陣仲有大把人要台呀!" 我知你好生意多人排, 但lee副唔憂做既咀臉就真係好討厭! 但最後因為我地太多人廢事再周圍走就坐底左, buffet要寫紙入單, 睇住佢係旁邊入單入左3個字, 最後入到漏埋張單先高超, lee頭話漏左單要我地呆等20分鐘, 轉頭同我地講仲淨返5分鐘食(因為限食個半鐘), 咁佢久唔久漏下單我唔洗食啦!自問小妹為人有十二分禮貌, 每次入紙上菜斟茶都會講唔該, 但lee班侍應塊面個個向西, 其中一個望都唔望係我食緊野果時上菜上到我食緊個隻私家碟度, 做日本菜一人一隻碟冇可能唔識, 我肯定佢明知故犯!不過講返句公道說話, 佢d食物係唔錯既, 烏冬彈牙魚生新鮮爽口, 但被惡劣既服務拖垮, 點好食都好啦,有邊個想背脊骨落, 食都要食得有腰骨, 香港地, 你荒冇野好食?…查看更多