奄尖皇上的個人專頁

今日0係斜對面飲完茶,諗住過黎買茶果當甜品,點知比我聽到有人叫狗仔粉,呢個係我兒時0既最愛,而家市面上賣0既...味道唔正宗不特止,仲要係用銀針粉或者烏冬扮0既,見到個"辦"係真野,梗係即刻整番碗啦!狗仔粉($8)真係人手搓成,條條/粒粒都唔同樣,質地軟軟粉粉咁,湯底有乾葱同勁蝦米香味,再加埋胡椒粉同佢地自製辣菜甫,完全係細個食0既味道,即時有d感動落淚0既衝動,所以話食味同人0既記憶係相連0既!當然我都無忘記到黎0既原意,雖然超飽,但都買左個黑芝麻茶果($3)試下,最重要係佢蒸住賣,所以又熱又軟熟,黑芝麻味不算超濃,甜味亦恰當,0岩晒我鍾意較清0既口味!我聽到佢地同街坊講客家話,可能因為佢地係真係客家人,所以食物做法正宗!估唔到今日特意造訪此大埔綜合大樓0既熟食市場,最大驚喜竟然係同"故友"重逢,心情大喜呀!…查看更多

唔知可唔可以寫到重開後第一個食評呢:-)。今日下晏專程由沙田坐火車出旺角再轉小巴去幫襯，老闆娘依舊親切地打招呼，還束起長髮，一副戰鬥格。新鋪大左好多，環境亦好光猛，木椅又好坐叫了最愛既魯肉餃($20) / 秋梨茶($6) / 脆炸豬油渣($8) / 蘿蔔&辣魚蛋(各$5) 。老闆娘雖然口口聲聲話今日好混亂，但味道絕無失色，要特別一提既係脆炸豬油渣，炸得又乾又脆，一d都唔肥膩，不過限量供應，睇你好無彩喇！另外，老闆娘仲比左d醃漬物我試食，叫我估下係咩黎，但最後都係要佢開估先得，不過應承左唔講比人聽:-P。提提大家，因初開業太忙，暫未有糖水供應，亦可去之前call老闆娘問下先！…查看更多

食完十三座牛雜，見到好多人幫襯，而且又標榜新鮮，$10仲有兩支500ml豆漿添，都幾抵喎,就買左一黑一白試吓，即場飲一支，第二日飲埋第二支。兩款都幾濃豆味，最緊要係隔渣隔得好，所以都幾夠滑，加上一d都唔會過甜，好0岩我既口味。個四眼哥哥幾細心，會主動提你返屋企點樣處理d冷/熱豆漿。題外話，見到豆腐花都係賣$4碗咋，下次一定要試下先得。…查看更多

嘩...好好食呀！(係原味大罐裝喎)一咬落去，就知咩叫做鬆脆，好耐無食過呢種質感喇，平時食到既，一係就鬆但唔脆(即好似恆春d蜂巢蛋卷咁，好鬆但唔脆，一咬即散)，一係就脆但唔鬆(即好似奇華d咁，好脆但唔鬆，似食炸春卷皮)，但呢間d呢就...咬個陣d牙要用少少力，咬開後就好鬆化，正呀！另外佢d蛋味好真好香，唔似個d係商場，所謂民間懷舊小食攤檔即做既蛋卷，完全係用吉士粉谷蛋味，而且...可能佢火侯夠,食落仲有陣蛋既焦香味，即係如果你炒飯或者整蕃茄煮蛋前，將d蛋炒得微焦時個陣味，果然係老字號！我猛話好食時，阿媽話其實我好細個住柴灣時，曾經買過比我食，係我個陣太細唔記得左咋！…查看更多

去到已有六七個人排緊隊,等左十分鐘就有得食喇,食一粒...真係好好食,外層脆內層軟就係基本要求啦.最難得既係入面真係空心架,而家好少食得到,印象中除左佢,我只諗到以前維園門口阿伯既推車仔,比較起黎,阿伯既出品仲有陣好香既炭燒味添,而呢度既蛋香味卻勝阿伯一籌.就打成平手啦!根據我既觀察,佢之所以咁正有幾個原因,第一:唔會因為見多人排隊,就想快快趣趣了事,照舊等到夠烘得'透',再離火又擺一輪,先會起出黎比客食;第二:份量拿得準,唔理個鐵模有幾重同幾熱,有過多蛋漿一定會倒番出黎,所以先做到空心;第三:當然係個蛋漿較得好啦,落足蛋再加埋少甜,GOOD!…查看更多

行過見到好多著街坊裝既人排隊,估計水準應該ok,就order左一串($6).個姐姐好心機又勻真,確係毛肚/金錢肚/肺/膀/大腸/粉腸各一件,此為之牛雜嘛,見其他人都可以淨食一款,或者唔要某d部位,都係$6,仲有師奶買黎加餸,發泡膠碗咁大就$20,發泡膠飯盒咁大呢就$35.炆得好入味,亦都夠淋,主觀覺得肚/肺/膀特別出色,因為係我兒時最愛既組合.而味精我諗一定有,但可接受,食完都唔駛即刻搵水飲.值得一讚既係,知道揸住串滴住汁既牛雜會食得論盡,所以會準備一隻碟仔比你盛住食,又可方便自加醬料,good!…查看更多

除茶餐外,我耐唔中都會幫襯佢食番碗鮮奶燉蛋白,貪佢滑得黎較有質感,呢度就KEEP到個水準,唯一唔好係有時會甜左少少,但有陣如果想食偏稀(即削d)既甜品,我就會去食義順既雙皮奶.成日見d食家係度比較兩者,雖各有fans,但覺得要澄清一下,以正視聽.鮮奶燉蛋白-名符其實是奶+蛋白+糖,就如蒸水蛋,最重要是掌握火喉,否則會過老.雙皮奶-係完全無蛋既成分,只係用奶+糖,先於碗底留一片奶皮(放涼了既奶會凝固),然後再次倒入奶,加熱離火後,碗面再會凝固一片奶皮,此為之"雙皮奶".p.s.要知道...做比較都要apple to apple 至make sense 同fair!…查看更多

除左係Oriental叫左咖哩外,再係度叫多碗叻沙(HK$35連例湯/汽水/茶),同bf分黎食,麵底係用瀨粉,料亦不少,有好多豆卜,蜆肉,四片魚片,一隻粗過中指又無咩味既蝦(仲連埋殼),少量芽菜,可惜...食叻沙最重要既湯底就真係麻麻地,唔夠香濃亦唔夠味,只係一碗辣辣地有d椰味既湯,下次若有機會再幫襯,都應該唔會encore.…查看更多

係隔離買完咖哩飯,就係度買番客煎餃子(HK$20/6隻)做頭盤,煎得好透,底部夠金黃,皮薄得恰到好處,餡料亦不錯,有肉汁同埋幾多菜,所以食落口感爽脆,難怪佢地既餃子口碑都唔錯!…查看更多

去C.C.睇話劇前,黎食early dinner,叫左晚市套餐,係咖哩炸蝦飯+沙律+飲品.咖哩炸蝦飯-飯係珍珠米,咖哩汁夠香,主角炸蝦(有3隻)好香脆,仲竟然有鮮味,唯一係略嫌配菜唔夠,只得兩小舊薯仔沙律-只係一小碗椰菜絲+一pat沙律醬,不提也罷飲品-可選汽水或Honey Calpis,我試左Honey Calpis,味道見仁見智,我接受到,可惜甜了一點…查看更多

自從鑽石山無左,第一次黎食,同bf叫左兩碗傳統擔擔麵(一辣一唔辣),楊家小湯包及高力豆沙.擔擔麵(HK$17)(一辣一唔辣)-雖然麵比以前幼同淋,辣湯底依舊好味,總的水準比好多其他店舖為佳,唔辣湯底就有好濃花生味楊家小湯包(HK$18)-湯好足,皮好薄,但個人口味認為太薄,乏質感,肉餡ok普通啦高力豆沙(HK$32)-質地比較實,都可接受,幸好豆沙好味,不太甜p.s.不過最唔好係一坐低(兩位咋喎)就比一碟酸菜(HK$5)一碟花生(HK$5),每人HK$1茶錢(呢個其實ok),另外仲要加一,實食HK$84,但最後要比HK$106,好似有d唔抵,我覺得晚市比酸菜花生都無可厚非,但午市or茶市就有點那個了.…查看更多

此行為慶祝父母結婚紀念,一行四人專登叫d未食過既野,叫左...巴馬火腿蜜瓜/烤羊肉中東飽/龍蝦汁天使麵/蜆肉意大利飯/意大利芝士餅/士多啤梨千層餅.巴馬火腿蜜瓜-火腿好夠鹹香，蜜瓜份量應多兩三片烤羊肉中東飽-有d食Kebab feel,羊肉幾juicy龍蝦汁天使麵-味道OK,但比較"笠"蜆肉意大利飯-好多蜆肉,味道濃厚,但都係鍾意什菌飯多d意大利芝士餅-保持水準,有足夠既酒味,甜度亦適中士多啤梨千層餅-吉士好light,千層餅亦做得好酥食到好滿足,好飽,臨走阿媽又再話,咁既價錢有咁既水準,真係好難得...即係話我地一定會再黎幫襯啦!p.s.我地八卦問埋pizza價錢,因無可能食得晒個original size(12件),於是問下有無細size,原來可以叫1/2個,不過價錢就係70% of the original size.…查看更多

見到有食評提到佢做埋呢個禮拜就結業，所以今日行開個頭，就走去食左個下午茶餐($20---1款湯拉麵+1款飽點+1杯豆漿/五花茶，無加一)，極之抵食！~酸辣湯拉麵---拉麵有咬口亦幾滑/酸辣湯足料夠味~生煎飽(2隻)---餡較少但外皮好軟熟亦厚薄適中~熱豆漿---有豆味/唔太甜希望遲幾日仲可以抽到時間去試下食晚飯啦！…查看更多

22/11晚同bf差不多九點去到，好清靜，得10台客倒，心想就試佢一次啦！先黎一壺中國茶(有六款選擇)，看看餐牌要收$8/位(午市$5/位)，好彩質素都ok！之後我地叫住呢d先，諗住唔夠再叫，或者叫甜品：燒翡翠螺($20/2隻)─完全無鮮味，肉亦細得可憐，要成$10粒，實在唔抵食！艇家雞($68)─有d懷疑唔夠半隻雞，而且味道普通過普通，只係將一d浸熟既雞，比客人食之前用d好鹹好油既所謂魚湯浸住上碟，雞食唔出有任何魚湯味，實在係雞還雞，魚湯還魚湯，幸好似乎唔係雪藏雞。蝦糕唐生菜($38)─本來蝦糕好夠鹹香味，唔錯！不過竟然用石頭鍋上，係就係keep到熱，但其實講緊只係唐生菜，加上份量又係少到死，size得半碟油菜，好似有d小題大做，夾第二箸時d菜已開始有d燶，嚇到我地要拿拿聲食晒佢。另外，其實唐生菜有幾貴，收得$38碟，得十幾條幼幼菜仔，唉！燒鴨粥($28)─餐牌有燒鴨粥/燒鴨絲粥，心諗前者應該係燒鴨件啦，點知都係一絲絲架喎，真令人費解。份量只係同普通粥檔既艇仔粥差不多，味道只屬ok而已，唔值咁貴囉！食晒大家都係得五成飽，但都無意欲再叫其他野，最後解決辦法係各自隊左一隻鹹肉粽同一條粢飯，吹脹！…查看更多

17/11晚十點鐘，0係上環文娛中心睇完話劇，醒起要0黎試0下出名0既手打墨魚丸，可惜河粉賣晒，就叫0左碗墨丸牛筋米($22)---(單拼$15-$17/雙拼+$5)，加$5有碟油菜，因見人地隔離枱碗炸魚皮好正，再加碗炸魚皮($5)添！試一啖牛味湯底，覺得夠味之餘好清又唔肥，牛筋炆得超腍又入味，份量好足有成六七大條；墨丸則只有3小粒，雖然細細粒，但係就超彈牙兼好有鮮味，後來聽到有人買生墨魚丸，原來賣成$96/斤，難怪只比得3粒我啦！炸魚皮本身好薄，再加上無蘸好多粉去炸，所以炸得極脆，又無咩味精，$5/碗真係抵到爛！米粉ok，見隔離阿叔食緊最後一碗河粉，d粉睇落好薄好滑，下次一定要食，仲要試埋佢另一手打之作---魚蛋。p.s. 鋪面同廚房似乎係兩公婆，好好禮貌又有笑容，特別係阿姐，好親切！…查看更多