燎原火的个人专页

牛牛花都本店做得超好，我係常客，佢喺粉中開分店，當然要百忙中搵機會支持下。Sorry囉，我唔應該有期望，入嚟幫襯係我唔啱，可能天氣熱令侍應哥哥燥底，我應該冬天先嚟，對唔住囉🙏🏼但一定唔係我態度問題，我從來對人超客氣，你唔辣著我底線，我係唔得閒同你計較，至多下次唔嚟啫。毫無本店果種員工熱情同服務態度，冷冰冰唔憂做咁，金毛型仔哥哥落單，我係對餐牌少少誤解，溝通過程被你輕藐冷笑冇緊要，可能你型過我後生過我，覺得我似大陸人？我又未試過喎，講完嘅唔記得要再問我都算，新人？（公道講句佢有講唔好意思）但我容忍唔到佢覆焯，行過大大力劈塊單牌落枱，我個女都比佢嚇親。你有性格，大把青春本錢，型得起，我哋就只能夠唔型咁北上消費囉。我觀察埋其他伙記，冇乜特別，但服務態度同本店就一定有距離。食物方面，我哋只係嗌基本嘢，食唔出兩間分別，但凍檸茶好似淡咗啲。環境衛生又係要彈吓，明明開咗冇耐都好似污糟邋遢，明白部分物品例如餐牌可能係搬過嚟，但入嚟坐低就感受到。珠玉在前，體驗非常差，粉嶺咁多間茶記都好少趕客，喂大佬北區嚟㗎，過關好方便㗎咋，我肯支持留港消費，你哋都要做好啲吖，做唔到質同價，態度都唔好咁串吖🙏🏼如果牛牛老闆睇到，我戥你難過，你分店應該好難做。如果係合伙人或管理層睇到，我建議你認真留意吓我寫嘅嘢，不服來辯。…查看更多

三個人四個餸，食唔哂要打包，跟飯跟嘢飲埋單只需三百幾，份量好足味道又唔錯，真係充滿驚喜。生意好好全場爆場，唔怕熱嘅話可以坐出邊，有大排檔風味。椒鹽大蝦同金沙魷魚都好香好惹味，八珍豆腐好多料（如果有豬潤就更經典），潮州滷水拼盤又係好豐富，裡面咩都有，墊底嘅豆腐反而唔多，好有良心。鍾情口味奄尖嘅細佬都讚個蝦整得好食，節約慳儉嘅阿媽都話抵食唔貴，我就整體嚟講都好滿意。菜式甚多選擇，街坊家常便飯好地方！👍🏼…查看更多

今天中午一行三人去吃午市茶點，中肯地說，食物質素是不錯的，在平均水準之上，價錢適中，因此在沒有競爭對手的粉嶺南，皇座匯的生意還算可以。習慣了那些漏水的茶壺，習慣了樓面人手短缺的難處，還好等了好久的最後一碟煎釀茄子也沒有漏單.....我們還是懷著滿意的心情去埋單的。排在我前面是一位先生，我聽著收銀員說二伯二，那位先生也給了$220然後轉身離開，收銀員才大叫：「先生！係二百八十二呀！」那位先生也沒甚麼脾氣，笑著說明明聽到是二百二呀。我也說是聽到二百二。收銀員即態度惡劣地把收銀機的價錢顯示屏轉給他看，辯稱第一次是說二百八十二，而且價錢有顯示出來。本來是件小事....那位先生又給了一百塊就轉身走了，收銀員把幾十塊零錢用力拍在櫃臺上，但那位先生已離開，收銀員沒有半點意思叫他回來。我就又看不過眼了，大聲把他叫回來提醒他把零錢收了。收銀員少賺了幾十元小費，應該很恨我的多事吧。到我給錢，我固意問清楚是多少錢，她又把顯示屏轉過來要我自己看！我說：「吓？要自己睇架？」她說：「唔識字果d咪唔識睇囉！」我說：「原來咁架？我都唔識字架喎！」另一收銀員即時答咀：「你唔識字，咁我地話幾多你咪比幾多囉！」我話：「好野！你地真係勁！」…查看更多

寒風凛凛，在街頭吃一碗熱辣辣的拉麵實在別有風味，老闆很有禮貌，食物價錢適中，更令人倍感温暖。叫了一碗招牌叉燒拉麵，湯底味道平衡，頗有水準，筍很香而且爽口，一點不老，溏心蛋最正，好想散叫多隻， 叉燒也很入味，肥瘦適中，配菜的確是一流。要彈的也有，麵條是獨立膠袋包裝即開即燙，比較大路，並非我喜歡的那種。較欠缺特色和噱頭的外表，還有使用廉價一次性木筷都是比較失色的地方。有心經營的特色小食肆是值得支持的，我還會去試試其他款式如地獄拉麵和雞翼等。…查看更多

同死黨二人飯局，貪呢間野人少夠静方便吹水，結果中大伏，每人接近兩舊水的放題基本上係壯烈犧牲，絕對冇下次!食物方面，先講鐵板燒， 食材其實唔算最差，但胡亂整熟上碟實在不敢恭維。睇住九十後mk小廚師求其亂兜，邊唱歌邊做， 果個場境真係甚有喜感。 雖然明知你地係冇正式培訓過，係亂黎，都算! 因為我佩服你地予工作於娱樂!不過真係要講句，太難食喇…串燒方面，牛肉香口膠，雞肉唔夠熟，雞軟骨乾哂，素菜又油得滯， 燒冬菇仲要係凍既! 最叻係樣樣野都可以冇味，你灑幾粒鹽都好丫。魚生……唔靚唔新鮮就梗架啦，得幾款揀仲可以其中超過一半都暫停供應! 壽司……建議用手，因為一夾即散。其他野食都冇乜好講，因為點果樣冇果樣! 成晚真係冇乜野食過!講下服務，唉，後生仔野唔係咁做架，雖然我唔知你地有冇糧出，但野食求其pat低，唔收碟，不聞不問，點左既野冇又唔話返比客知 (我都知好難，因為太多野係冇供應), 但點兩次汽水啫你地唔好漏哂丫，冇提醒last order, 算! 因為都冇野好食，但未叫埋單情况下，無端端擺低張單，找錢又係唔出聲静静擺低，喂，同顧客溝通講句野唔駛死啩?環境衛生，都係算把啦，我地坐bar枱，近距離睇住鐵板燒同魚生檔，我可以話，早知坐遠d眼不見為乾淨，在這個惡劣的環境，睇住個外科實習醫生戰戰兢兢地解剖舊三文魚，我諗起在非洲救人那些無國界醫生的偉大……經典! 真係經典中的經典! 建議正在研究社會新生代問題的學者或學生，一定要惠顧親身感受一下!…查看更多