十爺的个人专页

太太突然夜收，環顧整個馬鞍山市中心，得呢間改咗名嘅茶記未收。之前食過，問心價錢唔平，又唔係好食，服務又差勁，叫做無選擇下嘅選擇，別無他選，唯有照去。真係啱啱遇着剛剛，有一個女人快我一步，入到去，全場爆滿，呢個時候，剛好有一張4人卡位枱埋單，唔係自私，理論上店員應安排我前面位女士一個人去其他大圓枱度搭枱，但佢就安排左佢一個人坐張4人卡位，叫我出去等，話唔好阻住個門口。我出咗門口，跟住有兩個男人入去，同店員打招呼，原來係熟客，不過冇位都要走出店外等。呢個時候，店員出嚟，叫我同嗰位獨坐女士搭枱。我面有難色，佢就話:”一陣有枱我free 返比你，坐住先好唔好？”我諗住坐住等，所以冇叫嘢食住。等咗一陣，見有對明明食完嘢打死都唔肯走掛住喺度玩手機嘅父子終於起身埋單。我火速䡓去嗰張卡位度，然後禮貌地同店員交代一聲”我坐呢張枱無問題吧？”點知佢鬼鼠地細細聲同我講”你後面仲有枱二人，不如比人哋坐低先。況且你又未人齊，一陣有枱我再free 返比你！”擺明益熟客，把之前講好的反口，處事極不公平，服務差到冇朋友！跟住我老婆就喺呢個時候出現，我同佢講:”唔食呢間喇！”頭也不回，去咗福安嗰間”馬記”，雖然都係唔好食，但點都好過受氣！在此要修整一下上面嗰句話，唔係”唔食呢間喇！”，而係”呢一世都唔會再食呢間喇！”！…查看更多

本來都不想為小事而投訴，不過希望管理層真係要注意下，安排適當的員工做適當的崗位。事緣今早與太太吃了兩個港式早餐，共$76；埋單時，前面有個小孩買外賣，不知買甚麼，跟著到我時，便跟女收銀說用八達通，該女收銀就好委屈的跟我說，前面的小孩不知甚麼理由，要我用現金結賬，那只是小問題，就給她現金……當時她出了2張單，其中一張是$84，我便給了她$84。到走出店時，瞧了餐牌一眼，確認自己該付$76，便走回店內跟女收銀說收多了錢，前後才不過10多秒的時間，跟著她就好像失億了，問了我檯號，然之後再向我收錢，而且不是$76，而是百多元，簡直一塌胡塗！擾攘了很久，一個男主管才出現，終於解決了問題，但就令人尷尬而且浪費時間！那8塊錢不算甚麼大問題，但那女收銀我估計是由侍應的充當，可能人手不足才去幫手吧？但明顯她不能應付這份工作，簡單計算也會出錯，像是面對千軍萬馬般大陣仗，真令人摸不著頭腦！我甚至懷疑她是有焦慮症之類的問題，很容易精神緊張和情緒失控，所以在此懇請有關餐廳的管理層要正視問題，不要隨便加插工作給本來只是負責簡單工作的同事，最後引致一場不必要的不愉快，職員不開心，客人給嚇怕，那又何苦呢？…查看更多

完全是趕時間和肚子餓的錯。因為要探病，所以晚上9點才有空吃晚飯；匆匆忙忙去到荃灣，見這間「富都」門面不錯，便走進去坐下。心知第一次食，叫基本野如餐肉、煎蛋那類食品最穩陣，難食極都有個譜；於是點了個特餐 ($55) 。在等上餐時，無聊看一看這裡的食評，才知負評多過乜；不過既然叫左，無理由走人；況且各有不同，可能我覺得好正都未定呢？結果一食，就知大數據無錯！那塊多士，無味的！至於火腿奄列，也是淡而無味！跟著我點了碗通粉，配煙肉和豬柳漢堡；通粉的湯鹹到不得了！那塊豬柳漢堡明顯是殭屍肉，煙肉煎得過老，硬到不得了！而最後那杯熱奶茶，只可以用死甜來形容！一點茶味也沒有，跟奶茶扯不上關係！附上的圖片，見我好像吃得一乾二淨；並不是因為好味，而是想試清楚，才寫這個負評！結論：就算趕時間，寧願捱肚子餓，都要好好去選擇食物！特餐都可以整到咁難食，真心佩服！…查看更多

多年前光顧 Mr Steak 的 Dinner Buffet，甚多野食，雖然價錢不便宜，但絕對覺得順氣；殊不知今天捲土重來，轉食 Lunch Buffet，卻差得要命！當中無野食嘅程度，去到我係要食 d 平時唔會食嘅野填飽個肚！你話係咪恐怖？首先要講自己衰貪小便宜，同埋信網上果 d 鱔稿傳媒，才會上這個大當！因為見到最近有 d 來自果兩間本地傳媒嘅「飲食優惠」，話只需$290，仲有7折，兩個人落樓$522，就可以用 Lunch Buffet嘅價錢，食到 Dinner Buffet嘅水準，又生蠔、又龍蝦、又和牛鐵板燒，自己自然即刻 book 位去食啦！首先我訂咗2位，收到佢嘅 confirmation，都係話2位；去到現場嗰時，接待處嗰位小姐問我係咪3位？佢話只訂咗2位，佢唔信，只係話「你依家改2位啦即係」，好似我講大話咁？！不過呢啲都係小事。跟住坐低，可能因為以為我係「3位」，所以只係有張位置一般嘅檯，而唔係卡位，咁都算喇！最失望嘅，係我第一時間衝出去海鮮果欄，想攞生蠔食，點知……係無生蠔嘅！當然亦無龍蝦，只有長腳蟹腳、青口、蝦、蜆等；連最基本嘅翡翠螺都冇？！長腳蟹腳本人唔好，所以無食，唔知味道點；而青口我素來食buffet都唔會攞嚟食，今次食咗5隻，就知幾咁無野食啦！不過平心而論，d 青口係 OK 嘅！之後撲去和牛果邊，發現只有「SRF極黑牛壽喜燒」，係無傳說中嘅和牛鐵板燒！開始感覺中伏了，之後高速兜咗個圈，發現真係無乜野食！唔好話燉湯，連最基本嘅西湯都欠奉，只有一個好似茶記例水嘅中式湯！我飲咗一碗就算！而「SRF極黑牛壽喜燒」，我食咗2份，味道都係正常嗰隻。最後，我食得最多嘅係即場煮嘅生滾粥，因為 d 料都算 OK，足足飲咗3碗！就可想而知呢個場有幾多幾野呢？！至於熱盤，味道、款式還可以啦；但連最基本嘅燒味都無，真奇怪？而刺身都新鮮好味嘅，但想食刺身點解我唔去食日式放題？跟住甜品就普普通通，唯一值得讚，係可以寫低心意卡，甜品師傅會唧落隻碟度，然後整個心太軟上去，味道正常，但起碼叫做有 d 心思。仲有一樣不滿，就係無乜野飲，咖啡機都要排隊；2點半完場，但2點過 d，連熱水都唔供應，想沖杯茶都唔得？！還有那個雪糕又係伏，大大隻字寫住「Kit Kat」，我心諗乜「Kit Kat」有出雪糕咁有趣？於是叫咗椰子、綠茶，同香芋3隻味，除咗香芋正常之外，綠茶淡到爆，椰子直頭得個死甜！之後睇清楚，原來「Kit Kat」係指灑落雪糕上面的朱古力滿天星？！可惡！結論：呢個 Lunch Buffet 性價比嚴重的低，絕不推介！$261一個人，可以食得更好的朋友！…查看更多

之前Home office時來這裡飲茶，獲派一張贈券，見一個是燒賣，另一個是豆沙餅；燒賣很吸引，不過寫了「2款選1款，售完即止」，而且只限星期一至五才能使用，心諗返工後都未必享用到，所以便拋諸腦後。跟著碰巧今天補假，無意中看見這張coupon，便心想來一碰運氣也無妨，跟著一坐低，向四眼女侍應遞出coupon，佢笑笑口話：「好早換晒喇！畀錢都無呀！」乜燒賣咁受歡迎，連想畀錢叫都無？不過算了，既然坐低，就繼續飲茶，享用那個本來就不太想吃的豆沙餅。跟著另外叫了三個點心，然後當點心陸續上檯時，發現同我差唔多同時入座的隔離檯，竟然有燒賣？！仲聽到係送既添？！乜唔係連想畀錢叫都無咩？向四眼女侍應查詢，佢話「人地好早入單」，明明我見佢同我同步坐低入點心紙，根本一句講完：熟客就留比你，三唔識七？就食豆沙餅啦！本來如真係免費點心換罄，都無所謂，但如存在不公平現象，就實在令人很不滿！不知是酒家還只是這位四眼女侍應的個人操守問題，若是前者，手法很差，為何不乾脆不送點心？或講明只送個平既點心，咁我來不來光顧，都是自己選擇。現在用個燒賣引我黎，但最後原來根本就無，簡單而言，是取巧，也很搵笨！至於後者，就更差勁，因為涉及不公平，存在一個由來已久的中國人陋習，一切是講關係的，唔識人就講多都無謂！結果整餐茶都飲得甚不愉快，至於食物平心而論，味道一般，叫3個點心下午茶要過一百元埋單，很清楚了，我以後不會再來幫襯！就係咁！跟住埋單，佢又「醒」張「換蝦餃」的coupon給我，影完張相放上來後，我就扔了！…查看更多

家陣通街都係「冰室」，但其實個裝修就扮懷舊，餐單就抄「澳牛」，食嚟食去都係「常餐」－－炒蛋多士熱奶茶，驚喜零蛋，味道不分高下，最多係隻蛋有無滑啲咁話。近日有澳門朋友到訪，一落船就問上環有無懷舊冰室想試下，仲講明唔要扮嗰隻，要係「堅冰室」，有啲考起，印象中「海安」最近碼頭，但行過見人山人海，好驚，唯有即刻轉場！四圍逛下，估唔到另有發現：喺東街轉過彎，落樓梯去地鐵站時，發現咗「華樂」！真係行快兩步，都可能會錯過！老老實實，「華樂」個樣一定係舊嗰隻，茶餐廳就堅係；算唔算堅冰室，就要試過至知。見唔算太多人，價錢亦合理，就姑且入去試下啦！坐低四圍望，果然如樓上食評師兄所講，確係好有特色下；但環境唔係我杯茶，食物好味至係重點！而「華樂」，果然畀到驚喜我！正值午飯時段，我叫咗個午餐($46)，當中詳列如下：黑椒豬扒意－－豬扒同意粉分開上，豬扒大大塊，炸得香噴噴；意粉份量好夠，配上黑椒汁，十分惹味！煎蛋牛油方包－－恕我孤陋寡聞，咁大個人，都唔知道茶記有呢款食物供應：一隻荷包蛋，放上搽滿牛油的方包上，十分邪惡，但味道出奇咁夾！一啖咬落去，蛋汁流出、鮮味湧現，配合埋牛油香滑，整體就是完美結合！天呀，這正正是我想像中的「冰室風味」！奶茶－－正正常常，都算香滑有茶味。以$46嚟講，真係冇得輸！至於老友就點咗個咖哩雞扒意($48)，同樣都係分開上，嗰碟咖哩直頭滿到瀉，而雞扒亦碎上方便客人享用。問老友味道如何，佢剩係不停食同不停點頭，唔得閒招呼我，咁睇嚟都應該合格以上。最後兩個人埋單，都唔駛一舊水，就食到捧住個肚走！呢間「華樂」我唔敢講話係好出眾嘅冰室，但就好隱世下，而且唔係扮冰室，而當中嘅環境同食物確係充滿正宗冰室風味；香港呢啲地方，已經越來越少呢類寶物，應該要珍惜。…查看更多

因為之前的「5蚊雪糕」事件，在看「動新聞」時，竟然介紹了這間店；西九龍中心我極少會去光顧，但見其介紹的「黑金魷魚」好像不錯，於是姑且去試一次。結果，感覺有點中伏；又一次證明，傳媒實在信不過！我這樣說並不是說這間餐廳味道價錢或服務有問題，其實這間店只屬一般茶記水平，只要沒期望便好了；最不幸是我有期望，問題出在本人身上，怪不得她。之前我還「隆重其事」，用Openrice的訂檯服務，到達後，方發覺大把位，幾時 Walkin 都無問題。不過訂檯也有個好處，就是在消費滿$200後，可獲贈一個小食；事後回想，兩個人在這間店消費二百大元，其實有點過份。因為她就只是一般的茶餐廳，而且定價有點偏貴。為何我會這樣說？雖然這店也有晚餐供應，但其本上那些小菜套餐都是要大約$88左右；如果單叫小菜，想變套餐，要另加$15一位。坦白說，我認為不值。先說環境，算乾乾淨淨，但普普通通，還不過是茶記一間。然後服務，真心，是好的，侍應有禮；只是最難頂的，是不知是老闆還是主管的人，在門口不停狂叫拉客，實在令人心煩；老老實實，如果我經過，本來有心來望一望，都會給他嚇走！至於價錢，以這間餐廳的水平來說，我認為偏貴。最後是食物的質素，短評如下：例湯(另加$15轉套餐包飯)－－正正常常，都是茶記例水，唔會呃自己話係老火湯；泰式雞翼(消費$200訂座送的)－－是單骨雞翼，OK香口，跟KFC差不多；風沙蓮藕餅($88)－－避風塘式煮法，起初好有期望，點知發現那些炸蒜根本黏不到在餅上，紛紛落下；而每塊餅都用兩片蓮藕片包著，又硬又淡又頂胃！而中間夾著的肉又少又無味！呢個餸，一個字：差！黑金魷魚($88)－－即是「黃金蝦」式造法的椒鹽魷魚，味道算最好，但$88真的有點貴。最後埋單$206，價錢不算貴，但在這種環境吃這種質素的食物，個人認為可以有更多更好的選擇。曾經有考慮過是否應給予負評，不過算了，第一，又未至於差到要比負評；二，食這間店都是自己戇居決定(見「題外話」)，怪不得人。以後不再光顧，不向他人推介就是了。…查看更多

日前途經沙田，看見周圍都要等位，呢間似最少人，便選擇一吃；果然等一陣就有位。叫了兩個晚餐，分別是羊扒及黑松露帶子意粉，價錢不便宜，兩個餐共：$158 x 2 再加一，坦白說，近 $400 在這裡進食，不值。首先，環境一般，不能加分。至於食物，評價如下：(1) 餐湯味道偏淡，無甚可取。(2) 多士算是最有名的了，脆脆的有點甜味，很好味。(3) 主菜 - 羊扒肉夠騷味，算幾好食。(4) 主菜 - 黑松露帶子意粉都叫足料，唔錯。(5) 甜品另加 $15 叫了酒心朱古力蛋糕，及芒果忌廉批，前者味濃；後者芒果亦鮮甜。但如要正價 $28 就不值了。(5) 餐飲叫了兩杯凍咖啡，味淡，感覺求其，自己沖好飲過佢，是完全沒有水準之作。食物其實還算可以，但最大問題是服務－－當我坐下時，想落單，不停揮手都無人理，是侍應不足吧？這點可以體諒，最大問題是有一個馬尾中女侍應，來落單時，態度馬虎、而且不客氣，好像要了她的命似的。之後問她有沒有 $15 蛋糕，說會去看，跟著無影了，亦沒有回來交代。跟著到叫餐飲時，找了另一個略胖的女侍應落單，她態度好好多，但話想要 $15 甜點時，說「已賣光」，我不禁奇怪，因為我才在落單前去了洗手間，見櫃子內還有不少的。感到奇怪，待她離開後，再找另一個四眼男侍應落單，今次成功落了；之前說「已賣光」的那位，也有去看看那個櫃子有沒有，為何會說「賣光」呢？諗住賣唔晒收工有得食嗎？真是百思不得其解。這間餐廳，我或許還會去，但希望下次去時，侍應的態度已變回正常，及真正認真的回應客人落單的要求。阿門！…查看更多